Read Maru CAUNG: KHIN" 145 Bible Online

CAUNG: KHIN" 145 - Maru bible

CAUNG: KHIN" 145

¹Nga" Mao"So we' kho:kham we"- ngo wa ni" qi" qhang: ra" khyo re hau" kyo: nae". Ngo wa nao re apyad ato mae- jeju beim: so" na nae".

²Ngo wa nao re ba khao: ngo" jeju beim: so" na nae". Ngo wa nao re apyad ato mae caung:khin" na nae".

³ASANG wa- qi" qhang yaug ngad mung:- yao: re qi: sho' caung:khin" ca" ra". Yao: qi" qhang: ra" khyo re- ngonhaung" yang matho' ba: gyo: byid: ngad: ra".

⁴Nao kad' lo va" mau" re byu daqae: mae" daqae: caung:khin" byid' na genae". Yao: bam wa ni" qam: so' qi" ra" lo, mau" jham re ta" hau" na: li" genae".

⁵Yao: bam wa ni" phungbao we'- ni" kho:kham qam: so' khyo re ta" li" genae". Aimung: ngo wa- ni" nho: mug' pho: mau" zo" jham: khyo re myid: qu" na nae".

⁶Byu qe wa ni" qam: so' qi" ra" mau" zo" jham: khyo re- ta" thug' li" genae". Aimung: ngo wa- ni" qi" qhang: ra" khyo re ta" hau: nae".

⁷Yao: bam wa ni" gai: ra" khyo alhab' re ta" kyo" li" genae". Aimung: ni" nhag' khyag' myid: nho: khyo re- nghaui"caung: na genae".

⁸ASANG wa jhid'de; myid we' nhag' khyag' myid bo: ra". Yao: wa nhag' phyad maba: yo: mung:- gang" tang: ra" jhid'de; myid bo: ra".

⁹Yao: wa yaug khao: ngo" dao mae gai: ra". Aimung: yao: kad' to" ru alhab' dao mae nhag' khyag' myid bo: ra".

¹⁰ASANG we"- ni" nho: gug'nyhug' gug' du: alhab' wa- nao re caung:khin" byid: genae". Aimung: ni" byumyu" qe alhab' mo; yang nao re jeju beim: so: byid' li" genae".

¹¹Yao: bam wa ni" nho: kho:kham kheim: so' phungbao: khyo re- ni" qam: so' thin: ra" khyo rere: ta" li" genae".

¹²Aimung: ni" qam: so' thin: ra" mau" zo" jham re- yaug khao: ngo" yang ba: lo" genae". Ni" nho: kho:kham mung"dan: phungbao qi" rure ba: lo" genae".

¹³Nao eib: ru wa apyad ato mae ngad mung:- nao wa mathao" magan: ayo, mae" kho:kham ngad: ra". ASANG wa yao: byid' to" ra" dao:so: re jhaug' zaug: ra". Yao: kad' ra" mau" zo" alhab' mae nhag' khyag' myid bo: ra".

¹⁴Yao: wa qug: khai: qhug' mo, re bao" thaug' byid' ra". Yao: wa gyang: lang: mo, re tau: to' yu: ra".

¹⁵Kao so' daui nam alhab' wa nao re myid: lao" ru we' qu" ako". Aimung: nao wa yao: bam re zo:ve ca" ra" au: zo:ve byid' ra".

¹⁶Nao wa yao: bam re laug sho' byid: mung:- yao: bam alhab' mo, qo ca" rure nhag' dag, nhao: ra".

¹⁷ASANG wa yao: kad' ru alhab' mae din:man" ra". Yao" mau" zo" alhab' mae nhag' khyag' ba: ra".

¹⁸Yao: wa yao: re khai: yao mo, we' te' te' na: ra". Yao: re nhag' lam: san san za: yao mo, we' te' te' na: ra".

¹⁹Yao: wa- yao: re nga:yhe' byid: mo, mae ca" qo: rure bao" thaug' byid' ra". Yao: wa- yao: bam hug' khai: ra" thoe jham re gyo: byid: mung:- yao: bam re khyad' yu: ra".

²⁰Yao: wa yao: re jhid'de; mo, yaug khao: ngo" re- gug: gam byid'ra". Ngadqere: nhag' lam: kaui: ra" makhyang: mo, re kam" wa- phyo' qheim" pye' li" nae".

²¹Ngo wa ASANG re khonhae" re: caung:khin" na nae". Yao" gug'nyhug' gug' du: alhab' wa- yao" gyang" lho" mang a re- apyad ato mae caung:khin" byid' na vageshao: wo".