Read Maru CAUNG: KHIN" 146 Bible Online

CAUNG: KHIN" 146 - Maru bible

CAUNG: KHIN" 146

¹ASANG re caung:khin" byid: ge,- nga" alo zo: we"- ASANG re caung:khin" byid: wa,

²Ngo kao so' adaui: na na wa yao: re caung:khin" byid: nae". Ngo wa nga" ASANG re- nga" pyad geim" mae caung:khin" byid: nae".

³Xao su byu: au: she kad' mo, re damyid: lam khug. Xao su byu khag' re: nao re maqo" khyad' yu.

⁴Yao: bam shid: lo" re phalhug khyo dam: tug' lo" ako". Ai: ba na mae yao: bam myid: yaung: to" ru alhab' thao" byaug va".

⁵Bao" yu nae" qhid' mae"- Yaku nho: Mao"So re qo" to: yaug- yao" Mao"So ASANG re myid: khug ngha yaug wa- ngaui lho" ra".

⁶Mug:gaung myid gaung we' panglai:- aijham mae bo: ru alhab' re phan" to: yaug re khug ngha yaug wa ngaui lho" ra". ASANG wa- yao" dao:so: re khonhae" re: zaui" pyang" yaug ngad: ra".

⁷Yao: wa deim" zag zo" ru qhug' mo, shad' de, mung:- dao: kho' byid' ra". Aimung: vae: moe; mo, re zo: shaug' byid' ra". ASANG wa thaung: laung" mo, re loe; beim nhao: ra".

⁸Aimung: myo, jid qere myao nhao: ra". Yao: wa gyang: lang: mo, re tau: to" yu: ra". Yao: wa yao" din:man" ra" byu qere jhid'de; ra".

⁹Yao: wa ngonhaung" mug: myid mae"- taung bug byu bang" qere gug: gam byid' ra". Yao: wa cug' mo" cug' zo: qere bao" byid' ra". Ngadqere: nhag' lam: kaui: ra" makhyang: mo, re kam" wa- yao: bam: byo; qeim khyo khyo jhui" lo" ra".

¹⁰ASANG wa apyad ato mae kho:kham ngad: ra". O" Ziun we"- ni" Mao"So wa ayo, byang" sho' eib: na nae". ASANG re caung:khin" byid: ge, wo".