Read Maru CAUNG: KHIN" 147 Bible Online

CAUNG: KHIN" 147 - Maru bible

CAUNG: KHIN" 147

¹ASANG re caung:khin" byid: ge, wo"- ngonhaung" nho: Mao"So re Nghaui"caung: yang: caung:khin" byid' na nae" gai: ra". Yao: re caung:khin" byid' ru wa ngaui bau: pho: we' jo: ru ngad: ra".

²ASANG wa- Yerusalem re dam: tau: to' yu: na: ra". Yao: wa taung bug: mug: khyo pyaung" yu qhug' mo, re- dam: jhui" phao: lo: na: ra".

³Yao: wa nhag' lam: gyug: mo, re dae gai byid: mung: yao: bam: dae jad: re pin: cug' yang thab' byid' ra".

⁴Yao: wa kyi jham khonho" ce' ngad: rure nghe' to" ra". Amung: kyi ce' khao: ngo" re mang mhang" byid' ra".

⁵Ngonhaung" ASANG wa- qi" qhang mung: qam: so' qi: yaug ngad: ra". Yao" pha,jhi" re khoru: maba: tho' ka".

⁶Yao: wa nhag' lam: khyo" mo, re tau: to' ra". Ngadqere: nhag' lam: kaui: ra"- makhyang: mo, re kam" wa- myidgaung khyo deim" khyoe' pye' byid' ra".

⁷ASANG re nghaui"caung: kyo: ge,. Tang: nghaui" thoe: yang- ngonhaung" nho: Mao"So re caung:khin" ge,.

⁸Yao: wa jham thaui: re mug:gaung mae myhung" to" ra". Yao: wa myid gaung: qhid' mae" mug: qu nhao: ra". Aimung: bug gaung jham mae mhin: yaug nhao: ra".

⁹Yao: wa gug'nyhug' jham re zo:ve byid: mung:- kano, nau" jham myang lao" zo:ve byid: zho" ra".

¹⁰Yao: wa qam: bo: ra" myao: jham mae qu" ngaui: ru mangad:- gyekhe' lhe" ra" gyezo: qere qu" ngaui: ru mangad:.

¹¹Ngadqere: yao: wa yao: re nga: yhe' byid' ra" mo, we' yao" mabaui mabyo; ra" jhid'de; myid re lam khug: na: ra" mo, mae myid: ngaui: na: ra".

¹²O" Yerusalem we"-ASANG re caung:khin" byid: wa, O" Ziun we"- ni" Mao"So re caung:khin" byid: wa,.

¹³Yao: wa ni" vogaung: kham: mo" jham re gang" tang nhao: ra". Ni" byumyu" re yao: shaman" byid' ra".

¹⁴Yao: wa ni" mug: kyo: re gug: gam: to" ra". Aimung: nao re gai: thao" ra" jung: gaug: yang nhag' dag nhao: ra".

¹⁵Yao: wa myid gaung re amyin" byid: mung: yao: ta" ru phyad za: kad' boe" ra".

¹⁶Yao: wa gyu: re mai pho' we' dakhyo:- myhung" to: mung:- gyu: khai" jham re phalhug reru: gag: sin" ke' ra".

¹⁷Yao: wa lagqu re laug zo: we' dakhyo: nhao: ke' mung:- yao: nhao: ke' ra" angin" re khag' maqo" kham ngad: ako".

¹⁸Ailao" yao: amyin" byid' ke' mung:- qid khai" wa aqang: yug: lo" ra". Yao: wa la hug' re nhao: ke' re qid yug: li" ra".

¹⁹Yao: wa yao" byumyu" re lau dao: kyo: byid' ra". Yao" mho" shid' dao: we' tarha" Israel byu qere byid' ra".

²⁰Yao: wa gaje: byumyu" qere ceru: makad' byid:- yao: bam wa yao" tarha" jham re maba ngad: ako". ASANG re caung:khin" ge, wo".