Read Maru CAUNG: KHIN" 25 Bible Online

CAUNG: KHIN" 25 - Maru bible

CAUNG: KHIN" 25

¹ASANG we"- nao re nga" akyu" mho' thoe kyo" ke' ra".

²Nga" Mao"So we"- nao mae ngo khug ngha: na:- Jeim: mung: qho' phau: nae" khyo mae" ngore khyad' yu la,- nga" gyevo qe:yang ngore daqu" ngai nhao la,.

³Nao re khug ngha: na mo, majeim:- nao re tau: lhan: nae" hin mo, kam" wa jeim" lo" li" genae".

⁴O" ASANG we"- ni" khyo jham ngore mho" byid: la,- Ngo re aijham ba nhao la.

⁵Ni" dangman" khyo khyo" kao so' daui nae" mho" byid: la, Pe"mung:ga"re nao wa ngore khyad' yu: ra" nga" Mao"So ngad: ra". Nao re ngo khonhae" re: khug ngha: na:.

⁶O" ASANG we"- nao ganhae" gaco' mae" qhu" byid' lo: ra" nhag' khyag' khyo we' mabaui mabyo; ra" jhid'de; myid re myid: beim: wa,.

⁷Nga" ve, qae" yo, mae" qobo we' shad' rure khyad' byid: la,- ASANG we"- ni" mabaui mabyo; ra" jhid'de; myid we' gai: ra" khyo" yang ngore myid: beim: la,.

⁸ASANG wa din:man: mung: gai: ruyang qobo byu qere yao: bam cao" ang: ra" khyo mho" byid' ra".

⁹Yao: wa nhag' lam: nyham: khyo" mo, re jo: ra" khyo qhu" byid: mung: yao: myid: o: ra" khyo yao: bam re mho" byid' ra".

¹⁰Yao" dao: thang" we' amyin" dao: re cao" mo, re yao" jhaug' zaug: ru we' jhid'de; myid: yang au: she: ra".

¹¹ASANG we" Nga" qobo myo" laug: jo, mung: ni" dao:so: re myid: beim: yang: ngore qobo khyad' byid: la,.

¹²ASANG re gyaug phug' mo, wa yao: bam cao" ye: gai: ra" khyo re yao: mae" qo" mho" yu: li" genae".

¹³Yao: bam wa khonhae" re: na: dai mung: yao: bam: myid:zo: qe wa mug: myid re qo" sang genae".

¹⁴ASANG wa yao" mho dao: tae" gyo" ra" mo; nho: ba nam ngad: ra". Aimung: yao: wa yao: bam we' to" ra" yao" dao: thang" re tang nhao: ra".

¹⁵Ngo wa yo, khyin: khao: ngo" ASANG re bao"yu nae"mho'yao mung: yao: wa ngore gyaug ci" ja: mae" khyad' yu: ra".

¹⁶ASANG we"- ngojhao" lhang: lo mung: ngore nhag' khyag' yu la,- pe"mung:ga"re ngo wa ngo yao: za: ngad: na mung: qam: nang" jo; kyi:-

¹⁷Nga" myid myo: myid: ci" khyo mae" nhag' lam: zhao: nhao la,- Nga" qug: khai: alhab' mae" re: khyad' yu la,

¹⁸Nga" nhag' lam: ngai: ru we' dayin yo" rure bo:myid: qu" byid: mung: nga" qobo alhab' re khyad' pye' byid: la.

¹⁹Ngo mae gyevo khonho" myo" rure myao byid: la, Yao: bam ngore khonho" nghang: ko" rure qu" wa,-

²⁰Ngo re gug: gam byid: mung: khyad' yu la,- Ngo majeim: nae" qhid' mae" zam" to: byid:la,- Ngo wa gug: gam qo" yu nae" qhid' mae" nao jhao" li" ra".

²¹Ngo wa nao mae khug ngha: na: rumung: nga" gai: ra" khyo we' nhag' lam: zaung" ruyang ngore lhaug' zaung" byid: la, wo".

²²O" Mao"So we"- ni" byumyu" Israel qere yao: bam: qug: khai: alhab' mae" khyad' yu wa,.