Read Maru CAUNG: KHIN" 30 Bible Online

CAUNG: KHIN" 30 - Maru bible

CAUNG: KHIN" 30

¹ASANG we"- nao ngore khyad' yu va" ruyang nga" gyevo qe ngore maqo" qu" jung" nae khyo: kad' pye' mung:- nao re ngo caung:khin" ra".

²O" ASANG nga" Mao"So we"- nao re ngo mho' yao mung: nao ngore no dae gai byid' ra".

³Nao wa ngore lab khung: mae" qhaung: yu va" Ngo wa myid khug khyo vao lo" na: re nao nga" kao so' re dam: taui byid' ra".

⁴ASANG: jhaug' zaug mo, alhab' we"- ASANG re caung:khin" ge,- Gyang" Lho" Yaug kad' byid' rure myid: beim: mung: yao: re jeju caung: ge,.

⁵Yao" nho: nhag' yo" ru wa dazab za: myao" ra"- yao" gai: shab: ru wa pyad geim" kham: ra". Myi" ayo, re ngug byid yug qere: ne, kao re ngaui bau" ru joe" li" ra".

⁶Ngo wa ngo yao" gaung re- Gug: va"- ein: myid: lam mung: ngo khonhae" re jeim: nae" mangad: ein: ta" va".

⁷ASANG Nao wa nga" dao mae gyai gai: lai: lo va"- Nao wa ngore bam dao mae" gyetab ru: gug: gam byid: va". Ngadqere: nao wa ngo mae" phao: vho' byaug lao" kam" wa ngo gyaug: ra".

⁸ASANG we"- nao re ngo khai mung: bao" yu nae" qhid' mae" mho' yao:.

⁹Ngo shid: lo" rumae" nao pe" akyu" qo" yu nae" i? Lab khug khyo ngo vao lo" re nao pe" gau pai: qo" yu nae" i? Shid: jo, mo, wa nao re qo" caung:khin" genae" i? Yao: bam wa ni" mabaui mabyo; ra" gai: shab: rure qo" ta" hau: byid: genae" i?

¹⁰ASANG we"- ngore gyo: byid: mung: nhag' khyag' yu la,- ASANG we"- ngore bao" thaug' yu la,.

¹¹Nao wa nga" kaug' qhui: rure ngaui bau: ngaui lho" go" nhan" ru boe" nhao: ra"- nga" kaug' qhui myid re yu: pye' mung: ngaui bau" ruyang ngore lhang" kham" to: byid: va".

¹²Aimung: ngo wa sae za: matae" jo, lo: nao re nghaui"caung" na nae". ASANG we"- nao wa nga" Mao"So ngad: ra"- ngo nao re apyad ato mae jeju caung:khin" na nae".