Read Maru CAUNG: KHIN" 33 Bible Online

CAUNG: KHIN" 33 - Maru bible

CAUNG: KHIN" 33

¹Din:man: mo, alhab' we"- ASANG kad' ra" mau" zo" qhid' mae" ngaui bau: taung" hug' ge,- yao" mho dao: gyo: mo, alhab' yao: re caung:khin" ge,.

²ASANG re tang: be, mung: jeju beim: so: ge,- taui: de; ra" tang: jham: yang yao: re nghaui" caung: khun"nghaui"caung: ge,.

³Yao: re nghaui" caung: asag' yang khun" caung: ge, tang: re jhao jhao za: be, mung: ngaui bau: taung" hug' ge,

⁴ASANG: dao: jham wa din:man" ra"- yao" mau" alhab' wa lam ga" ra".

⁵ASANG wa din:man" ru we' tarha" nyang: rure jhid'de; ra". Yao" mabaui mabyo; ra" jhid'de; myid wa myid gaung byang" sho' ngad: ra".

⁶ASANG wa yao" amyin" yang mug:gaung re phan" to" ra". Yao" dao: thoe: yang ba- lho" we' kyi jham re phan" to" ra".

⁷Yao: wa panglai: alhab' re dajo, qo mae za: zhang" ke' ra". Yao: wa nammugdara tham: no, jham re kug, qe, mae pyid' lhaung" to" ra".

⁸Myidgaung alhab' we"- ASANG re caung:pa" ge, mug: myid byu alhab' mo, we"- yao re nga: yhe' ge,.

⁹Yao: jhau: ke' re mug: myid phan" thug' li" ra". Yao" amyin" yang ja: nam jab boe" thug' li" ra".

¹⁰ASANG wa mung"dan: byu jham myid: yaung: to" rure lhau: sad' pye' byid' ra". Yao: bam kyae: to" ru maqo" kad' boe" nae" khyo: tam" pye' byid' ra".

¹¹Yao: myid: kyae: to" ru kam" wa apyad ato mae gang" tang: jo; ra". Yao: yaung: to" ru wa apyad ato dang: jo; ra".

¹²Mao"So re yao: bam: ASANG khyo" qo" to" ra" mung"dan: wa ngaui lho" ra". Yao" qhid' mae" khyin: yu: ru qhug' ra" mo, wa ngaui lho" ako".

¹³ASANG wa mug:gaung mae" qu" ke' mung: xao su byu alhab' re myao: ra".

¹⁴Yao: eib: na: ra" jo, qo mae" myidgaung dao mae na mo, jhao" qu" khyo" ke' ra".

¹⁵Yao: bam myid: ra" khyo alhab' re yao" yang kyae byid: mung: yao: bam kad' ru alhab' re ba byid' ra".

¹⁶Kho:kham wa qam: bo: ra" yao" gyetab; yang magai: aung- gyezo: wa yao" qam" yang magai: aung doe,.

¹⁷Gyekhe' myao: jham wa aung doe, nae" qhid' mae" akyu" mabo- yao: bam: qam: zang: yang maqo" khyad' yu.

¹⁸ASANG wa yao: re gyaug phug' na mo, we'- yao" mabaui mabyo; ra" jhid'de; nhag' lam: re khug ngha mo, re lhaug' qu" na: ra".

¹⁹Yao: wa yao: bam re shid: rumae" khyad' yu: ra". Bao" khug' khug' ra" ayo, re yao: bam re daui: na nhao: ra".

²⁰Ngonhaung" wa ngonhaung" nho: myid: lao" khyo re ASANG: khug mae ngha: to". Yao: wa ngonhaung" nho: gug: gam yaug we' bao" yu yaug ngad: ra".

²¹Yao" mathao mae ngonhaung" ngaui bau" na: bam:- yao" gyang" lho" mang a mae ngonhaung" lam khug: na:.

²²ASANG we"- nao mae ngonhaung" myid: lao" na: ru we' dakhyo: ni" gang" tang: ra" jhid'de; myid wa ngonhaung" we' daga" jo, vashao: wo".