Read Maru CAUNG: KHIN" 34 Bible Online

CAUNG: KHIN" 34 - Maru bible

CAUNG: KHIN" 34

¹Ngo wa ASANG re khonhae" re: jeju caung:khin" nae". Yao: re caung:khin" ru khonhae" re: mathang: pye' nae".

²Yao: kad' rure ngo caung:khin" nae". Deim" zag zo" ru qhug' mo, alhab' tae" gyo: mung: ngaui bau" na geshao:.

³ASANG qi" qhang: ra" khyo re ngo we' daga" hau" kyo: ge,- yao" mang re daga" caung:khin" gelang:.

⁴ASANG re ngo akyu" mho' mung: yao: ngore tau: byid: va". Nga" gyaug pho: alhab' mae" ngore loe; beim nhao va".

⁵Deim" zag zo" ru qhug' mo, wa yao: re khug ngha mung: ngaui bau" ako". Yao: bam wa khonhae" re: qam: shan genae" mangad;.

⁶Bao" thaug' yu nae" ru maqo" ra" mo, yao: re khai mung: yao" yang tau: byid' ra". Yao: bam: qug: khai: alhab' mae" khyad' yu byid' ra".

⁷ASANG re phug' te' nga: yhe' mo, re yao" mug: lagyo" yang lhaug' zaung" byid' ra". Aimung: yao: bam re gyaug ci" ja: mae" khyad' khyui: yu: ra".

⁸ASANG khonho" gai: rure nao yao: cao" qho: qu" yang: ba wa,. Yao: mae gug: gam qhug' myao: yu mo, wa ngaui lho" ako".

⁹ASANG: byu alhab' mo, we"- yao: re nga: yhe' na ge,- yao" mho dao gyo: mo, wa yao: bam ca" ru alhab' qo" ako".

¹⁰Khangkhyi jham lhao" re: zo:ve moe' ru qhug' ako". ASANG: mho dao: gyo: mo, kam" wa gai: ru daja: re: mamyaung ngad: ako".

¹¹Nga" ba nam nau" qe we"- li" ge, Aire ngo wa ASANG re khoru: gyaug phug' ca" ru naonhaung" re mho" byid: geli".

¹²Ni" pyad mae na: dai nug: i? Kao qhang: ru we' ngaui bau" rure nao o: i?

¹³Aire wa makhyang" ra" dao: re dajhau- mhug' re: damhug' ta".

¹⁴Makhyang: mashab: rumae" lhang: phaug' lo mung: gai: ru kad' wa,. Ni" nhag' lam: alhab' yang yaug yo cae: tae" rure phin: yang: qho: yu wa,.

¹⁵Din:man: mo, re ASANG lhaug' zaung" ra". Airumung: yao: bam: hug' yao thoe re tae" gyo: byid' ra".

¹⁶Ngadqere: makhyang: mashab: ru kad' mo, re yao: lham: ngag: thaug' mung: yao: bam shid: lo" gelao"- aijao" yao: to" myhid' pye' ru qhug' ako".

¹⁷Din:man: mo, ASANG re yao ko" re- yao" yang tae" gyo: byid' ra". Yao: bam: qug: khai: alhab' mae" khyad' khyui: yu: ra".

¹⁸ASANG wa nhag' lam: gyug: mo, we' jhao" na: ra". Myid: lao" nae" ru maqo" lo" ra" mo, re yao" yang khyad' yu: ra".

¹⁹Byugai wa qug: khai: aja: ja: phau: zo" ra". Ngadqere: ASANG wa yao: re aijham alhab' mae" khyad' yu: ra".

²⁰ASANG wa yao: re bin sho' lhaug' zaung" to" ra". Yao" shoqug: dakhe' re: magyug:.

²¹Makhyang" ra" ru wa nhag' lam: kaui yaug re se' pye' nae". Din:man: yaug re nghang: mo, wa qobo dae byid' ru qhug' genae".

²²ASANG wa yao" byumyu" re khyad' yu: li" nae". Gug: gam byid' ru qo" yu nae" qhid' mae" yao: jhao" gug: gam nae" yemho' mo, wa lhoe' to" ru qhug' genae".