Read Maru CAUNG: KHIN" 39 Bible Online

CAUNG: KHIN" 39 - Maru bible

CAUNG: KHIN" 39

¹Ngo wa- ngo kad' ra" mau" re nyang" jhaug' zaug nae". Nga" sho rere: qobo maboe" nhao nae". Makhyang: mo, avai: ayae mae na: ra" au: re ngo pe" mata" thug' nae"- ein: ta" va".

²Ngo wa dao: dakheim: re: majhau- gai: ru lhao" pe" mata" lo: sae za: tae" jo;- Ngadqere: ngo kham zo" ra" dayin dayo: wa je: za: axo: lo: na: ra".

³Amung: ngo wa myid: qug: myid: khai: mung: byaug va". Ngo je: myid: qu" re je: sang: kho" li" va".

⁴ASANG we"- ngo khomyhao" qo" daui: na nae" i? Ngo khonhae" shid nae" laug i? Khomyhao" myao" re nga" kaoso'thao" nae" laug i? Ngo re ta" kyo: la, ein: mamyid: lo: maqo" na.

⁵Nao wa nga" kao so' re khoqhi" lang" ra" khyo" kad' to: va" i? Ni" qhid' kheim: mae nga" kao so' wa pe" za: lhao" mangad:- gaigai: ga" re daui: na: ra" byu yaug khao: ngo" wa la dalhang mad za: angad: ra".

⁶Khapao tho' mae" pe" maje- Yao: kad' ru alhab' wa pe" mangad:- yao: wa jo,nho" re qho: zhang: to: qere: aire khag' the' sang nae" rure yao: maba.

⁷Aire ASANG we"- ngo pe" re qo" myid: lao" na nae" i? Ngo wa nao mae lam khug: to: va".

⁸Nga" qobo alhab' mae" ngore khyad' yu byid: la,- ago qeyang ngore dajung" pye' nhao.

⁹Ngo re ceru: dayin dayo: kham zo: nhao yaug wa nao ngad: rumung: ngo wa- sae za: tae" to: yang:- pe" dao: dakheim: re: majhau nae".

¹⁰Ngo re qobo dae dabyid: lo:- nao: yang cebe, mung: ngo shid: lo" na va".

¹¹Ni" qeim: mho" ra" dao: thoe: yang- byu dayaug: qobo qhid' mae" qobo dae byid' ra". Aimung: phyophyab' re we' dakhyo:- yao" jhid'de; rure phyo' qheim" pye' ra". Gaigai: yao:- byu dayaug wa la dalhang mad tho' maje ngad: ra".

¹²ASANG we"- nga" akyu" mho' thoe re gyo: byid: la,. Ngo hug' yao thoe re tae" gyo: byid: la. Ngo ngug: ra" au: re ngore bao" yu nae" qhid' mae" li" wa. Nga" phug' phyid' qe alhab' we' dakhyo:- ngo wa dazab daso' au: mae" ni" bang" vo za: angad:.

¹³Ngo malo" byaug shi:re- ngaui bau" ru dajhid' kho: lhao" lhau" qo" yu nae" qhid' mae" ngo yao: reza: nha: to: byid' qu" shi:la,.