Read Maru CAUNG: KHIN" 41 Bible Online

CAUNG: KHIN" 41 - Maru bible

CAUNG: KHIN" 41

¹Myaung sho: mo; qhid' mae" bo:myid mo, wa ngaui lho" ako". Yao: bam qug: khai: qhug' ko" au: ASANG wa yao: bam re bao" thaug' byid' li" nae".

²ASANG wa yao: bam re gug: gam byid: mung: yao: bam: kao so' re khyad' yu: li" nae". Yao: wa yao: bam re ai: mung" mae ngaui bau: nhao nae". Yao: bam: gyevo qenho: qam: so' khyo yao: bam re mashapye' to: co' nae".

³Yao: bam no phyo: qhug' re ASANG: yang bao" yu mung: dam: qao" zin" lo nhao nae".

⁴Ngo wa ASANG we"- ngo wa nao re qobo shad' va". Ngo re nhag' khyag' mung: no gai byid: la,- ein: ta" ra".

⁵Nga" gyevo qe wa ngore gyo" no ja" dao: ta" ako". Ngo shid: byaug mung: ceim" to" myhid' pye' ru qhug' nae" rure yao: bam o: ako".

⁶Ngo re li" qhug' mo, wa nhag' lam: san mabo ngad: ako". Yao: bam wa ngo we' tin: yang: magai: ra" lau dao: re zhang: ci mung: khyi" khao: ngo" mae cao" ta" hau" qin" ako".

⁷Ngo re nghang: mo, alhab' wa yao: cao: yao: nga" khyo re jho" so' ta" ako". Yao: bam wa nga" khyo re magai: thao" ru ga: myid: jho: ako".

⁸Yao: bam wa- yao: shid no yao: no: ava". Yab qo mae" khonhae" re: dam: qo" to" nae" mangad: lo:- ga: ta" ako".

⁹Ngo lam: thao" ra" nga" ba nam sang- nga" zo:ve bocao: zo: yaug lhao" re: ngore gye tug' kad' lo: ra".

¹⁰ASANG we"- ngore nhag' khyag' yu mung: ngore dam: qao" zin" lo nhao la,- Ailao" ngo wa nga" gyevo qere loge, dam: qo" phaug' nae".

¹¹Yao: bam ngore qo" aung genae" mangad:- aimung: nao ngore ngaui: rure ngo ba: li" nae".

¹²Ngo wa jo: rure kad' rumung: nao ngore bao" yu: li" nae". Nao wa ngore ni" qhid' kheim: mae apyad ato mae zam" to" li" nae".

¹³Israel nho: Mao"So ASANG re caung:khin" ge,- yao: re ana" re:- apyad ato mae re: caung:khin" na ge, wo"- Amen! Amen.!