Read Maru CAUNG: KHIN" 50 Bible Online

CAUNG: KHIN" 50 - Maru bible

CAUNG: KHIN" 50

¹Qam: bo: thao" ra" ASANG Mao"So dao: jhau: ke' ra". Yao: wa mug: myid alhab' khyo ba thug' shad' mae" ba vao shad' joe" sho' khai: yao: na: ra".

²Mao"So wa- qo mabo lo: sho' yaung" ra" Ziun vogaung: mo" mae" bao: byid' ke' ra".

³Ngonhaung" Mao"So wa li" na: ava"- ngadqere: sae sae za: mangad:- yao" qhid' au: mae nga" na: ra" myi: we' yao" avai: ayae mae myang: na: ra" la qam" bo: ra".

⁴Yao: wa yao" byumyu" re dao: kho' rure sagse: khyo" mug:gaung we' myid gaung re khai: yao: ra".

⁵Yao: wa- xeim: ngaui" byid: yang:- ngo we' dao: thang" to: mo, ngad ko" ra" nga" jhaug' zaug: ra" byu qe- ngojhao" zang" ham: li" geri:- ga: ta" ra".

⁶Mao"So wa din:man: mung: yao: yao: tarha" agyi ngad: rure mug:gaung wa hau" ke' ra".

⁷Nga" byumyu" we"- tae" gyo: ge,- ailao" ngo dao: jhau nae". Israel naonhaung" re ngo qobo zhaug' sagse: kham nae". Ngo wa Mao"So ngad: Naonhaung" nho: Mao"So ngad:.

⁸Ngo wa naonhaung" ngaui" xeim: mathao mae we' ngore naonhaung" ayo, byang" khonhae" re: ci: li" ra" phad' ngaui" byid' ra" xeim: jham: mathao mae naonhaung" re maqeim.

⁹Ngadqere:- naonhaung" nung: kyaung" mae" nung: jaung lo: jham rere: ngo ma-o. Naonhaung" cad' kyaung" mae" cad' be, jham rere: ngo ma-o.

¹⁰Seyo mae" gug'nyhug' alhab' wa nga" mae" ngad:- bug gaung myo: sho' mae na ko" ra" ataung atug myo" ra" nung: kyaung" rere: ngo sang:.

¹¹Seyo: ngho' alhab' we'- pa: din" mae" daui: na: ra" gug'nyhug' alhab' wa nga" mae" ngad:-

¹²Ngo vae: qe moe' re- naonhaung" mae" zo: shaug' mamho' nae". Pe"mung:ga"re mug: myid we' aimae bo: jo; gu: alhab' wa nga" mae" ngad:.

¹³Ngo wa nung: jaung lo: jham: sho: zo" ra" i? Mangad: lao" cad' be, jham: sa: re ngo shaug' ra" i?

¹⁴Jeju beim: so" ru wa naonhaung" yang Mao"So re ngaui" byid' ra" xeim: ngad vashao:- Amung: naonhaung" dao:so: to" ru alhab' qam: bo: thao" ra" yaug re qhaug' byid: ge,.

¹⁵Qug: khai: qhug' li" au: ngore khai: yao ge,. Ngo naonhaung" re khyad' yu nae". Ailao" naonhaung" wa ngore caung:khin" byid' li" genae".

¹⁶Ngadqere:- Mao"So wa makhyang: mashab yaug re- nao wa amyin" dao: jham re pe"mung: nhad' yang za: ta" na: i? Nga" dao: thang" khyo re nao pe"mung: ta" keim" na: i?

¹⁷Ngo: yang nao re mho" khyang: byid: nae" rure nao ha: pye' ra". Nga" amyin"dao: jham re nao ngag: lhaui" pye' ra".

¹⁸Khug' hab' yaug khao: ngo" nho: ba nam nao boe" lo: ra". Nao wa su: myi: shad' mo, we' zam" khug: ra".

¹⁹Nao wa makhyang: mashab: rure ta" nae" qhid' mae" khonhae" re: jin" jin" ngad: jo; ra". Nao wa mhug' ta" nae" qhid' mae" khonhae" re: mamyid: tha: ngad: ra".

²⁰Nao wa- nao yao" mao:nhaung: qere qobo zhaug' nae" jin" jin" ngad mung:- yao: bam re qobo qho nae" jin" na: ra".

²¹Nao wa cegu: alhab' re kad' ava"- ngadqere:- nao re ngo pe" mata". Airumung: nao wa ngore nao we' dakhyo: ngad: laug- ga: myid: jho: ra". Ngadqere: ana" ngo nao re qeim mung: boe" ra" khyo re nao re ngo sho' kyo: va".

²²Ngo re pe" shui manho qu" to: yaug we"- cere tae" gyo: wa,- mangad: lao" wa nao re ngo phyo' qheim" pye' nae". Ailao" wa nao re khyad' yu nae" khag' mana nae".

²³Jeju beim: so" ru wa ngore nga: yhe' byid' ra" ngaui" xeim: ngad: ra". Aimung: nga" mho dao: gyo: mo, alhab' rere:-ngo dang dang yao: khyad' yu nae".