Read Maru CAUNG: KHIN" 51 Bible Online

CAUNG: KHIN" 51 - Maru bible

CAUNG: KHIN" 51

¹O" Mao"So we"- ni" mabaui mabyo; ra" jhid'de; myid: mathao mae ngore nhag' khyag' yu la,. Ni" qi" qhang: ra" nhag' khyag' myid: mathao mae nga" qobo jham re boe; sad' pye' byid: la,.

²Nga" makhyang: mashab: ru alhab' re cid' pye' byid: mung:- nga" qobo mae" ngore kyang" shao: yu la,

³Nga" shad' nghung" ra" qobo re ngo beim: so: va". Nga" qobo jham re ngo khonhae" re: myid: beim" na:.

⁴Ngo wa nao re qobo shad' va"- nao re za: qobo ashad'- nao: yang makhyang: mashab: ru ga: myid: jho: to" rure ngo kad' lai: lo va". Aimung: nao: yang ngore dao: kho' ru wa jo: ra"- ngore dao: kho' yang: nao din:man" ru qhu" ava".

⁵Ngo wa khau: li" ba mae" makhyang: mashab- Ngo wa nga" myhi" aung mae" yao: qobo byang" jo; ra".

⁶Nhag' lam: phyu: ru we' dangman" ru wa- nao mho' na: ru ngad: ra". Nga" nhag' lam: khug mae ni" pha,jhi" ke' byid: la,.

⁷Nga" qobo re yu: pye' byid: la,- aire ngo gyang" shao: lo: li" nae". Ngo re cid' pye' byid' re ngo wa gyu: tho' je: phyu: lo nae".

⁸Ngaui bau: ngaui lho" thoe jham re the' gyo: nhao la,- nao ngore khyoe' pye' mung: khyug' to: ngadqere: ngo dalhang dam: qo" ngaui bau: nae".

⁹Nga" qobo jham re daqu" byid: la,- nga" makhyang: mashab: ru alhab' re boe; sad' pye' byid: la,.

¹⁰O" Mao"So we"- nga" aung khug mae gyang" san: ra" nhag' lam: phan" ke' byid: la,. Aimung: jhaug' zaug: ra" byo asag' re ngo mae ke' byid: la,.

¹¹Ngo re ni" qhid' kheim: mae" dakhe' thug' pye' la,- ni" gyang" lho" byo re ngo mae" dayu: pye' byid: la,.

¹²Ngo re ni" khyad' yu: rumae" joe" li" ra" ngaui bau: ngaui lho" re dam: byid: la,- aimung: ngore ni" mho dao: tae" gyo: nug sho' kad' yu la,.

¹³Ailao" ngo wa qobo shad' lhoe" mo, re- ni" amyin" dao: jham mho" shid' byid: nae". Aimung: yao: bam wa nao jhao" dam: tug' lo: li" genae".

¹⁴O" Mao"So we"- nga" kao so' re tang" to: mung: ngore khyad' yu la,- ailao" ngo wa ni" din:man" ra" khyo re ngaui bau: taung" ta" kyo: nae".

¹⁵ASANG we"- ngore dao: jhau nae" qhid' mae" bao" yu la,- ailao" ngo wa nao re caung:khin" nae".

¹⁶Nao wa ngaui" xeim: jham re ma-o ngad: ra"- airu: mangad: re wa ngo ngaui" byid: naeva". Nao wa phad' ngaui" byid' ra" xeim: jham re mangaui ngad: ra".

¹⁷O" Mao"So we"- nga" nho: ngaui" xeim: wa- nyham: khyo" ra" nhag' lam: ngad: ra". Nao wa nhag' lam: nyham: khyo" ru we' myid tha" ba: ra" nhag' lam: re ngag: ha: pye' byid: nae" mangad:.

¹⁸O" Mao"So we"- Ziun re nhag' khyag' mung: yao: re bao" thaug' byid: wa,- Yerusalem vang re dam: zao: to' byid: wa,.

¹⁹Ailao" nao wa jo: ra" ngaui" xeim: we' ngonhaung" nho: phad' ngaui" xeim: jham re lham: qu" ngaui mung:- ni" phan dao mae nung: jaung lo: jham re ngaui" byid' li" genae".