Read Maru CAUNG: KHIN" 6 Bible Online

CAUNG: KHIN" 6 - Maru bible

CAUNG: KHIN" 6

¹ASANG we"- ngore nhag' dayo: la,- Daqeim la,- ni" nho: nhag' yo" ruyang ngore qobo dae dabyid: la,.

²O" ASANG we" Ngo wa pyaung" ngad: byaug: kyiva". Ngo re nhag' khyag' yu la,- ngore qam: o: byid: la,- ngo wa bin sho' qam: gan: byaug va".

³Nga" gaung dagaung: geim" re: lo" thao" sho' qug: khai: qhug' na va". O" ASANG we"- nao wa ngore khyad' yu nae" qhid' mae" khomyhao" myao" sho' lao" na shi:nae" i?

⁴ASANG we"- ngore li" khyad' yu la,- ni" nho: nhag' khyag' shogu: ruyang ngore khyad' yu la,.

⁵Movo: mug: mae nao re mamyid: beim: ngad: ako". Ai: jo, qo mae nao re khag' maqo" caung:khin" ngad: ako".

⁶Ngo wa kaug' qhui: ruyang pyaung" ke' pye' kyiva". Myi khao: ngo" nga" yab qo wa ngo ngug: ruyang jhug' jo; ra". Nga" au: khau" wa nga" ngug byid: yang bab bab jhug' byaug va".

⁷Ngo nyang" mathe' myao lo:- nga" gyevo jham: mathao mae ngo ngug mung: nga" myo,jid' jham gyai qae" jo, va".

⁸Makhyang: mashab mo, naonhaung" we"- ngo mae" phao: lo" ge,- ASANG wa nga" ngug thoe re gyo: byid' ava".

⁹Yao: wa bao" yu nae" qhid' mae" ngo mho' yao: ra" thoe re tae" gyo: byid: va". Aimung: nga" akyu" mho' dao: re phaug' tau: byid' li" nae".

¹⁰Nga" gyevo jham wa jeim" lo" ra" mathao mae alo akho: qho' rure ba: li" genae". Amung:- nyag din taung" athaui: anhaung" boe" ruyang yao: bam re she: sin" pye' li" nae".