Read Maru CAUNG: KHIN" 60 Bible Online

CAUNG: KHIN" 60 - Maru bible

CAUNG: KHIN" 60

¹Mao"So we"- nao wa ngonhaung" re ngag: lhaui" pye' byid: mung:- ngonhaung" re jeim: nhao va". Nao wa ngonhaung" re nhag' yo: va". Ngadqere: ana" ngonhaung" jhao" dam: tug' lo wa,.

²Nao wa myid gaung re nin" nhao: ra". Aimung: aire nao kho' sin" pye' ra". Ai: ru wa agao gao byo; sin" lo" na: rumung: aire ana" dae gai byid: wa,.

³Nao wa ni" byumyu" qere- xo sho' dayin dayo: kham zo: nhao: ava". Ngonhaung" wa yhid yid: ruru: apyi avhang: su" qin" bam va".

⁴Nao wa nao re gyaug phug' mo, re- byo; qeim: rumae" loe, vageshao: ga: yang: ta" peim: byid' ra".

⁵Ni" qam: so' yang ngonhaung" re khyad' yu la,- ngonhaung" akyu" mho' thoe re tau: byid: la,- aire nao jhid'de; ra" byumyu" qe qo" loe; lo genae".

⁶Mao"So wa yao" gyang" lho" yham mo" mae" Shekhem re aung doe; ruyang ngo kho' pyo: pye' nae". Aimung: Sukod lao:khaung: re nga" byumyu" qe: qhid' mae" gae byid: nae".

⁷Gilead wa nga" mae" ngad:- Manashe: re: nga" mae" ngad:- Ephrim: wa nga" jo, to' maug ngad:- aimung: Yuda wa nga" kho:kham zaung: bao" ngad: ra".

⁸Ngadqere: Moba, re nga" jarung: khyo" ci nae". Nga" khyid zhaung: re Edom mae pye' jam nae". Airu: kad' mung: aire ngo sang: ein: ra" aso: re qhu" byid: nae". Philisti qe wa- ngore aung: pye' mung: qo" hug' nae" ga: myid ko" ra" i?

⁹O" Mao"So we"- ngonhaung" re gye khyae kyae" lhaung" to" ra" vogaung: mo" khyo khag' yang jhui" ye: nae" i? Edom khyo ngore khag' yang jhui" ye: nae" laug i?

¹⁰Nao ngonhaung" re gaigai: yao: ngag: lhaui" pye' va" i? Nao wa ngonhaung" gyetab we' daga" gyekhe' mathug' ye: lo: nae" i?

¹¹Ngonhaung" nho: gyevo re khe' zin: nae" qhid' mae" ngonhaung" re bao" yu la,- xao su byu: yang jho" bao" ru wa pe" aphug' made,-

¹²Ngonhaung" shad' mae Mao"So bo mung: aung doe, nae". Yao: wa ngonhaung" nho: gyevo qere aung: pye' byid' li" nae".