Read Maru CAUNG: KHIN" 63 Bible Online

CAUNG: KHIN" 63 - Maru bible

CAUNG: KHIN" 63

¹O" Mao"So we"- nao wa nga" Mao"So ngad: ra". Airumung:- ngo wa nao re nhag' nghae" na: ra". Nga" gaung khyao alhab' yang nao re kao bau: na: ra". Kyaug' ho mung: pe" mayaug: ra" qid majo; myid gaung we' dakhyo: nga" alo zo: wa nao re shab' na: ra".

²Nao re ni" gyang" lho" yham mo" khug mae the' myao nhao la,- nao khoqhi" qam: bo mung: phungbao qi" rure ngo the' myao nug: ra".

³Ni" mabaui mabyo; ra" jhid'de; myid wa kao so' tho' mae" lhao" re: je: gai: ra". Aimung: ngo wa nao re caung:khin" byid: nae".

⁴Ngo adaui: na na wa nao re jeju beim: so: byid' na nae". Ngo wa nga" lo, re tau mung:- nao jhao" akyu" mho' na nae".

⁵Nga" alo zo: wa zo: shaug' mung: gyi: nae"- Ngo wa nao re ngaui bau: nghaui" caung: jham caung: byid: nae".

⁶Ngo wa yab qo mae lang" jo; au: re- nao re myid: beim" ra". Ni" khyo re ngo damyi khyeim myid: qu" na:.

⁷Pe"mung:ga"re nao wa- khonhae" re: nga" bao" thaug' yaug ngad: ra". Ni" daung qab khug mae ngo wa ngaui bau: ngaui lho" nghaui"caung" ra".

⁸Ngo wa nao mae cao: de; jo; rumung:- ni" lo; yang ngore gug: gam byid' ra".

⁹Ngo re se' pye' nae" ga: phin" na mo, wa- movo: mug: khyo gyo" lo" byaug: li" genae".

¹⁰Yao: bam wa gyekhe' jao: mae se' pye' ru qhug' mung: yao: bam: mao gaung jham wa zag nae jham: yang zo" pye' byid' ru qhug' genae".

¹¹Mao"So: yang yao: re aung doe; ru byid' ra" mathao mae kho:kham wa ngaui bau: ngaui lho" ngad nae". Mao"So: mang a mae dao:so: to: mo, wa yao: re caung:khin" byid' li" genae". Ngadqere: mhug' hab' qenho: nhad' jham re kam" wa pyid' pye' byid' ru qhug' genae".