Read Maru CAUNG: KHIN" 64 Bible Online

CAUNG: KHIN" 64 - Maru bible

CAUNG: KHIN" 64

¹Mao"So we"- ngo wa qug: khai: qhug' na:- nga" akyu" mho' thoe re tae" gyo: byid: la, ngo wa nga" gyevo qere gyaug:- nga" kao so' re khyad' yu la,

²Nhag' lam: kaui mo; nho: magai: ra" byin phyo: zin" rumae" we' makhyang" ra" byu phaung mae" ngore gug: gam: yu la,

³Yao: bam wa yao: bam: sho jham re shae pyang: jham we' dakhyo: saui" tho' ci mung: zao" no nhao: ra" myo:khe' jham we' dau: ra" dao: kheim: jham: yang qang: to" ako".

⁴Yao: bam wa qho' maba lo:sho' ra" mhug' ta" dao: jham re phyad phyad pyo: kyo" ako". Yao: bam wa byu gai qere mhug' pyag' mung: ju" phyo' ruyang phyo' qheim" ako".

⁵Yao: bam yao: cao: makhyang: mashab: ra" byin phyo: mau" mae qam: jho" byid' ako". Yao: bam wa khai: mae lha" thaung nae" laug ga: jho" ta" na: ako". Ai: lha" jham re khag' mathe' myao- ga: ta" ako".

⁶Yao: bam wa makhyang: mashab: ra" mau" re kyae mung:- ngonhaung" wa jab byang" ra" xao- au: yug: mau" re byin phyo: zin" nyho' to: va"- ga: ta" ako". Byu: nho: nhag' lam: we' aung khug: myid wa ba: gyo: qug' ra".

⁷Ngadqere:- Mao"So wa yao" myo:khe' jham: yang yao: bam re bag: ra". Aimung: yao: bam wa dalhang: dae- dae de; ako".

⁸Yao: wa- yao: bam yao" dao: kheim: jham: mathao mae yao: bam re phyo' qheim" pye' nae". Yao: bam re myao mo, alhab' wa au: lhang lhang: li" genae".

⁹Yao: bam alhab' gyaug: byaug genae". Yao: bam wa Mao"So kad' rure myid: qu" mung: yao" lo, mau" jham: khyo re ta" kyo" li" genae".

¹⁰ASANG kad' ke' ra" ru: mathao mae- din:man" ra" byu qe alhab' ngaui bau: ngaui lho" ngad genae". Yao: bam wa yao: mae gug: gam: ru qhug' yu mung:- byu gai alhab' mo; yang yao: re caung:khin" byid' li" genae".