Read Maru CAUNG: KHIN" 65 Bible Online

CAUNG: KHIN" 65 - Maru bible

CAUNG: KHIN" 65

¹O" Mao"So we"- ngonhaung" yang- nao re Ziun mae caung:khin" byid: mung: nao re byid' to" ra" ngonhaung" nho: dao:so: re cao" nae" gai: ra".

²Pe"mung:ga"re- nao wa akyu" mho' thoe re tau: byid' ra". Khyi" khao: ngo" mae" byu qe wa- yao: bam yao" qobo jham: ra" mathao mae nao jhao" li" li" genae".

³Ngonhaung" nho: qobo wa ngonhaung" re jeim: nhao: ra". Ngadqere: nao wa ai: qobo jham re khyad' pye' byid' ra".

⁴Nao: yang khyin: yu mo,- ni" gyang" lho" yham mo" mae na nhao nae" ga: nao: yang jhui" to: mo, wa ngaui lho" ako". Ni" yham mae" gai: ra" ru jham we' ni" gyang" lho" ra" Caung:pa" Yham mae" shaman" jeju dao mae ngonhaung" nhag' dag: na nae".

⁵Nao wa ngonhaung" re aung doe; ru byid: mung: tau: byid' ra". Aimung: nao wa ngonhaung" re khyad' yu nae" qhid' mae" mug' pho: mau" jham kad' ra". Mug: myid geim" mae" byu qe we' va" ra" panglai: jham kyo: rumae" byumyu" qe wa nao re lam khug: ako".

⁶Nao wa ni" nho: qam" yang- bam jham re yao: bam: jo, qo mae zhaung: to: mung: ni" kheim: so' mo" re qhu" byid' ra".

⁷Nao wa panglai: jham hug' myang: ra" thoe jham we' bang: lhung" jham: myang thoe re tam" pye' ra". Nao wa byumyu" qe: hug' yhai thoe re tae" byaug nhao: ra".

⁸Mug: myid geim" wa nao kad' ra" mug' pho: mau" zo" jham re qu" mug' mung: ye; hao" bam: ako". Nao kad' ra" mau" zo" jham: mathao mae myid gaung dathao mae" dathao joe" sho' ngaui bau: ngaui lho" hug' ako".

⁹Nao wa mug: qu re nhao: ke' mung:- ai: mug: myid re qu" caung: na: ru qhu" byid' ra". Nao wa aire jo,nho" qo" nhao mung: myid xau gai nhao: ra". Gyaung: zo: qe re qid byang" nhao: ra". Nao wa myid gaung re qhovo: qhoshi: byang" jo, nhao: ra". Ce wa nao kad' ra" khyo ngad: ra".

¹⁰Nao wa- phaug' to" ra" yothaung: gyu" jham mae mug: qid magan: mago" nhao: ke' byid: mung: aijham re qid; yang dag nhao: ra". Nao wa mug: byam byam qu: ruyang myid gaung re au" nhao mung: qho:vo: zo: qe re yaug nhao: ra".

¹¹Ni" nho: gai: ruyang bao" thaug' byid: yang: qhovo: qhoshi: khonho" qo" yad: yu: i? Nao khai: ye: khai: mae magan: mago" jo; ako".

¹²Mhin: gyo, jao: jham mae yao kyaung" cad' kyaung" jham byang" jo; ako". Bug zeim" jham mae ngaui bau: ngaui lho" byang" jo, va".

¹³Pa: din" jham mae yao jham byang" na: bam: ako". Lao: geim: jham mae gaug zo byang" jo; ra". Ja: khao: ngo" wa ngaui bau: ngaui lho" hug' yang: nghaui"caung: khin" ako".