Read Maru CAUNG: KHIN" 66 Bible Online

CAUNG: KHIN" 66 - Maru bible

CAUNG: KHIN" 66

¹Byumyu" alhab' mo, we" Mao"So re ngaui bau: ngaui lho" hug' yang: caung:khin" ge,.

²Yao" nho: mang a phungbao re nghaui"caung: byid: ge, Yao: re yaung" lho" ra" khyo" caung:khin" byid: ge,.

³Mao"So re nao kad' ra" mau" zo" jham wa khoqhi" mug' pho: ngad: i? Ni" kheim: so' qi: yang: ni" gyevo qe wa ni" qhid' kheim: mae goe; pa" ako" ein: ta" byid: ge,.

⁴Myid gaung dao mae" yaug khao: ngo" nao re pa" caung: ko" ra". Yao: bam wa nao re nghaui"caung: byid' ako". Yao: bam wa ni" mang a re caung:khin" ako" ein: ta" byid: ge,

⁵Mao"So pe" kad' to: va" rure li" qu" qu" ge, Byu jham: phaung gaung: mae yao: kad' ra" yao" mug' pho: lo, mau" jham re li" qu" ge,

⁶Yao: wa panglai: re myid ho boe" nhao: ra". Ngonhaung" nho: phug' phyid' qe wa ai: qid gyaung: re khyid: yang nag: phyid'ako". Ai: jo, qo mae yao: kad' ra" lo, mau" mathao mae ngonhaung" ngaui bau" lo va".

⁷Yao: wa yao" qam: so' yang apyad ato mae eib: na: ra". Aimung: yao" myo,jid' jham: yang byumyu" qere qu" na: ra". Yao: re khag' datau: lhan: ge,

⁸Byumyu" qe alhab' mo, we"- ngonhaung" nho: Mao"So re caung:khin" byid: ge, Naonhaung" caung:khin" rure the' gyo: nhao ge,.

⁹Yao: wa ngonhaung" re daui: na nhao mung: ngonhaung" re magyang: lang: nhao ngad: ra".

¹⁰Mao"So we"- nao wa ngonhaung" re jham" qu" ra". Myi" yang ngaui re phad' kyang" yu: ruru: ngonhaung" re jham" qu" ava".

¹¹Nao wa ngonhaung" re lha" khug mae gyo" myi" nhao mung: ngonhaung" nho: dao kao" mae qola: vhin byid' ra".

¹²Nao wa ngonhaung" re ngonhaung" nho: gyevo qe:yang zab: pye" pye' nhao: ra". Ngonhaung" wa myi: gye- qid gye khyo" kho' lai: lo va"- ngadqere: nao wa ana" ngonhaung" re gug: gam: ra" jo, qo khyo jhui" lo va".

¹³Ngo wa ni" yham khyo phad' ngaui" xeim: cili" byid: nae". Nao re ngo dao:so: to" rure qhaug' byid: nae".

¹⁴Ngo qug: khai: qhug' ra" au: re nao re byid: nae" ein: ngo ta" to" rure ngo nao re byid: nae".

¹⁵Ngo wa xeim: ngaui" phan dao mae ngha" nae" yao re qhaug' byid: nae". Ngo wa nung: jaung we' cad' be, phad' ngaui" byid: nae". Aimung: myi:khug' wa mug:gaung joe" sho' do, lo" nae".

¹⁶Mao"So re nga: yhe' byid: mo, alhab' we" Li" mung: tae" gyo: ge,- aire yao: nga" qhid' mae" yao: pe" kad' byid: va" rure ta" kyo: nae".

¹⁷Ngo wa bao" yu nae" qhid' mae" yao: re hug' yao va". Ngo wa yao: re nghaui" caung: yang caung:khin" byid: va".

¹⁸Ngo wa nga" qobo jham re qu" lhaui" pye' ngad: re ASANG wa ngore tae" gyo: byid: nae" mangad:.

¹⁹Ngadqere: Mao"So wa ngore gaigai: yao: gyo: byid: va". Yao: wa nga" nho: akyu" mho' dao: re tae" gyo: byid: va".

²⁰Ngo wa Mao"So re caung:khin" byid' ra". Pe"mung:ga"re yao: wa nga" akyu" mho' dao: re magyo" lhaui" pye' byid: mung:- yao" mabaui mabyo; ra" jhid'de; myid re ngo mae" madam: tug' yu: pye' ngad: ra".