Read Maru CAUNG: KHIN" 69 Bible Online

CAUNG: KHIN" 69 - Maru bible

CAUNG: KHIN" 69

¹O" Mao"So we"- ngore khyad' yu la, qid wa nga" lang zang: mae joe" jo, va".

²Ngo wa no; ra" tham: bab: bam" mae nab: lo" na: ra". Aimung: myid gaung qao re: majo,- ngo wa qid tham: kao" khug mae joe" na va". Aimung: bang: lhung" jham: yang ngore nhai" se' lo" na va".

³Ngo wa bao" yu nae" ru mho' yang: qam: gan: ru we' pyaung" pyaung" mung: byaug va". Aimung: nga" khyaung: gyao: byaug va". Ngo wa nao: yang bao" yu nae" rure qho: na mung: myo, kyam sho' zhaug' qu" na:.

⁴Pe" si: mabo: mae ngore nghang: mo, wa- nga" au: mae" xae khe' jham tho' je: myo" ako". Nga" gyevo qe wa nga" khyo re mhug' ta" ako". Yao: bam wa qam: bo mung: ngore se' pye' nug: ako". Yao: bam wa ngore ngo makhug' yu: ra" ru qhid' mae" khyug' nhao: ako".

⁵Mao"So we"- nga" qobo jham wa nao mae" maqo" nyham" to: ngad: ra" Ngo khonho" nhag' magyang" rure nao ba byid' ra".

⁶Qam: so' bo: thao" ra" phung ASANG we"- Nao re lam khug: na mo; dao mae ngore qho' daphau: nhao. Israel nho: Mao"So we"- nao re caung:pa" mo; dao mae ngore nga: phoe khyo daci: thug' nhao.

⁷Ngo wa ni" mathao mae ceim" roe" ru phau: zo" lo va". Aimung: ngo wa qho' phyo' qhug' ru ngad:.

⁸Ngo wa nga" mao:nhaung: qe: qhid' kheim: mae byu bang" we' dakhyo: ngad: jo;- nga" yham byu qe: qhid' mae" taung bug lamai: we' dakhyo: boe" jo;.

⁹Ni" Caung:pa" Yham re ngo phug' myao" ru wa nga" aung khug myi: nga" ruru: mung: jo;- nao re ceim" roe" ru jham wa nga" dao mae gyo" zao" ako".

¹⁰Ngo wa zo:ve jao" yang: nga" gaung re ngo nyham: khyo" na: Aimung: ngore ceim" roe" zo" ako".

¹¹Ngo wa kaug' qhui: ra" mai bau: ve, mung: ngore yao: bam ceim" qi: pye' ako".

¹²Yao: bam wa nga" khyo re hau" mo" khyo jham mae ta" mung: yhid ya: qe wa nga" khyo we' sin: yang: nghaui" caung: khin"ako".

¹³Ngadqere: ASANG we"- ngo wa nao re akyu" mho' na nae". Mao"So we"- nao khyin: to" ra" ayo, mae ngore tau: byid: la,. Ni" qi" qhang: ra" jhid'de; myid mathao mae khyad' yu nae" ga: ta" to" ra" ni" dao:so: re nao cao" na: ra" mathao mae ngore tau: byid: la,.

¹⁴Ngo re tham: bab: bam mae nab: lo" na: rumae" re:- nga" gyevo qenho: lo, khug mae" re: no; ra" qid tham: mae" re:- gug: gam sho' khyad' yu la,

¹⁵Nga" dao mae qid: yang daje" nhai" nhao la,- no; ra" tham: kao" mae danab; shid nhao la,- Lab khung: khug khyo re: dagyo" vao nhao la,

¹⁶ASANG we"- ni" mabaui mabyo; ra" jhid'de; myid gai: ra" mathao mae ngore tau: byid: la,. ni" qi" qhang: ra" nhag' khyag' myid: mathao mae ngojhao" phaug' lo wa,.

¹⁷Ni" daui daui yaug mae" daphao: vho' lo" byaug- ngo mae qug: khai: mo" joe" jo; ra"- ana" ngore tau: byid: la,-

¹⁸Ngo jhao" li" mung: ngore khyad' yu la, nga" gyevo qe: lo, mae" ngore khyad' yu la,-

¹⁹Ngo re khonho" ceim" roe" ko" rure re: ngo khoqhi" myo, nho sham mung: nga: ngai: rure: nao myao byid' ra". Nao wa nga" gyevo qe alhab' re myao: ra".

²⁰Ngo re ceim" roe" zo: ko" ruyang nga" nhag' lam: byo, va". Aimung: ngo wa nhag' lam: thao" va". Ngo re nhag' khyag' yu nae" myid: lao" qere: nhag' khyag' yu nae" khag' mana- ngore nhag' tang" byid: nae" byu re myid: lao" qere:- dayaug re: mana.

²¹Ngo vae: moe' ra" au: re yao: bam ngore khin cid' myono; ru" ru byid' ako". Ngo qid shab' ra" au: re yao: bam ngore sabyi jhin qang: byid' ako".

²²Yao: bam: zo: shaug' poe wa yao: bam: byo; qeim khyo re boe" nhao vashao:- yao: bam: caung:pa" poe jham wa yao: bam gyo" zaung: lo" nae" ru boe" vashao:

²³Yao: bam re myo, jid nhao: pye' wa,- Yao: bam: phyid' dam: jham re khonhae" re: qam: nang: nhao wa,.

²⁴Ni" nhag' yo" rure yao: bam: dao mae vhe' sheim: byid: wa,- Nao nhag' yo" ru wa yao: bam re myhi: yu vashao:.

²⁵Yao: bam: na jao: re cae: jhug tag phao: lhaui" to: co' vageshao:- Yao: bam: zaung jham mae dayaug re: adaui mana: dang vageshao:

²⁶Yao: bam wa nao: yang qobo dae byid: mo, re ceim" yhin" ako". Yao: bam wa nao: yang dae te' mo, dayin dayo: kham zo" na: ra" khyo re jho" ta" na: ako".

²⁷Yao: bam: qobo jham alhab' re tung" xam" to: wa, Ni" khyad' yu: ra" khyo mae yao: bam re dajhid' re: daqo" bo:bo nhao.

²⁸Yao: bam: mang jham re kao so' daui: na: ra" mo; mugsug' paug' khug mae" sad' paui" pye' byid: wa,- ni" byumyu" qenho: japhin: mae yao: bam re dabo: nghe' ke' byid:.

²⁹Ngo kam" wa dae jam: no mung: nhag' lam: thao" na:- O" Mao"So we"- ngore tau: to' yu mung: khyad' yu la,

³⁰Ngo wa Mao"So re nghaui" caung: yang caung:khin" byid: nae" Ngo wa yao: re jeju beim: so: byid: mung: yao" qi" qhang: ra" khyo re ta" hau: byid: nae".

³¹Ceru wa ASANG re nung: qhaug' byid' ra" tho'- qi" dang va" nung: jaung lo: dadau: geim" phad' ngaui" byid' ra" tho' je yang: nhag' dag nhao: li" nae".

³²Deim" zag zo: qhug' mo, myao lao"- qu" ngaui bau: genae". Mao"So re caung:pa" mo, wa qam: qu" qo" genae".

³³ASANG wa qo ca" mo, re tae" gyo: byid' ra". Aimung: thaung: laung" jo; ra" yao" byu qere mato" myhid' ngad: ra".

³⁴O" mug:gaung we' myid gaung we"- Mao"So re caung:khin" byid: ge, Pang:lai:: jham we' ai: mae bo: ra" gug'nyhug' qe we"- Mao"So re caung:khin" byid: ge,

³⁵Yao: wa Yerusalem re khyad' yu mung: Yuda vogaung: jham re dam: te: byid' li" nae". Yao" byumyu" qe wa ai: jo, qo mae na mung: ai: mug: myid re sang ngho" li" genae".

³⁶Yao" daui daui mo; nho: myid:zo:qe wa ma re qo" xo' sang: yu: li" genae". Aimung: yao: re jhid'de; mo, wa ai: jo, qo mae na: li" genae".