Read Maru CAUNG: KHIN" 7 Bible Online

CAUNG: KHIN" 7 - Maru bible

CAUNG: KHIN" 7

¹O" ASANG nga" Mao"So we"- ngo wa gug:gam qhug' nae" qhid' mae" nao jhao" li" wo". Ngo re khe' taung" na: ra" mo, alhab' mo; nho: lo, mae" ngore khyad' yu la,.

²Ai mangad: re yao: bam wa khangkhyi ru: khag' yang maqo" khyad' yu: ra" jo, qo khyo ngore dao: phao: lo" li" genae". Ai: jo, qo mae ngore aje, aman" phyo' cad' sin" pye' li" genae".

³O" ASANG nga" Mao"So we"- ngo: yang dayaug yaug re shad' re- ngo: yang ba nam dayaug yaug re ab: pye' ngad: re- mangad: lao"- nga" nho: gyevo re pe" si: mabo: rumae aqan alan kad' ngad: re-

⁵nga" gyevo qe:yang ngore cao" khe' mung: qhug' taung" yu vageshao: Yao: bam: yang ngore zin: mung: se' pye' vageshao:. Aimung: ngore myid gaung mae ashid to: co' vageshao:.

⁶O" ASANG we"- ni" nhag' yo" ruyang to" li" wa,- nga" gyevo qe: nhag' jam: yo" rure to" mung: ngag: tam" pye' wa,- naoyao" gaung re nhug' to" ke' mung: ngore bao" yu la,- Nao o: ru wa tarha" din: nyang: ru ngad: ra".

⁷Airu: mung: ni" lhang" gam: mae" byu alhab' re khai: zhang: to: yang: yao: bam re mug:tho' mae" eib: na wa,.

⁸Nao wa byumyu" alhab' nho: tarha" agyi ngad: ra". O" ASANG we"- nga" bo: de, mung: dao: kho' byid: la,. Ngo qobo maqo" rure nao ba: ra".

⁹Nao wa din:man" ra" Mao"So ngad mung: ngonhaung" myid: ru we' ngaui: rure dao: kho' byid' ra" Makhyang: mashab mo; nho: kaui: ra" mau" zo" re tam" pye' wa,- aimung: gai shab mo, re aphug' jhaung qhu" byid: wa,.

¹⁰ASANG wa ngore gug: gam byid: yaug ngad: ra"- yao: wa yao: re phug' cao" mo, re khyad' yu: ra".

¹¹Mao"So wa din:man" ra" tarha" agyi ngad: ra". Aimung: makhyang: mashab mo, re khonhae" re: dao: phyid' ra".

¹²Yao: bam wa yao: bam yao" khyo jham re matha" pye' gere wa- Mao"So wa yao" shae pyang: re saui" tho' li" nae"- yao: wa yao" lo, la: re thaung mung: aire nyhang" ci: ra".

¹³Yao: wa yao" shid pho: shae lhae jham re yu mung: yao" myi: myo: jham re qang: ci: ra".

¹⁴Byu jham khonho" makhyang: mashab: rure myid: thug' na ko" rure myid: qu" wa,- yao: bam wa qug: khai: re yaung: to: mung: mhug' pyag' rure lo, joe" kad' na: ako".

¹⁵Ngadqere: su gaje: qhid' mae" yao: bam thaung: to" ra" lha" mae yao: bam yao: myi" ako".

¹⁶Aimung: yao: bam wa yao: bam yao" makhyang: mashab: mau" yang qobo dae byid' ru qhug' mung: yao: bam yao" aqan alan: mau" yang dae de' ako".

¹⁷Ngo wa ASANG re yao" tarha" din: nyang: ru: mathao mae jeju beim: so" ra"- Ngo wa ASANG myhao: thao" ra" yaug re nghaui"caung: yang: caung:khin" ra".