Read Maru CAUNG: KHIN" 72 Bible Online

CAUNG: KHIN" 72 - Maru bible

CAUNG: KHIN" 72

¹O" Mao"So we"- ni" kho:kham nho: dangman" ruyang dao: kho' byid: nae" qhid' mae" mho" shid' byid: wa,- yao: re nao yao" tarha" din: nyang: ru myho" byid: wa,.

²Ailao" yao: wa ni" byumyu" qe: dao mae tarha" din: nyang: ra" khyo" eib: na mung: deim" zag zo: qhug' mo, re dangman" ra" khyo" yang eib: li" nae".

³Ai: mug: myid wa qo" zo: qo" shaug' mung: dangman" rure qo" kham zo: vashao: wo".

⁴Kho:kham wa myaung sho: mo, re tarha" din" ra" khyo" dao: kho' mung: maqo" mo, re bao" yu: ru we' yao: bam re deim" zag zo: mo, re jeim: nhao vashao:.

⁵Ni" byumyu" qe wa- ba za: azho: na na wa- joe" lo nae" ayo, mae lho" azho: na na mae nao re caung:pa" na vageshao:.

⁶Kho:kham wa yothaung: din" jham mae mug: we' dakhyo:- myid gaung mae qu: tag' byid' ra" mug: ce' we' dakhyo: angad: na vashao:.

⁷Yao" apyad mae dangman" ru bu" yaung" bam vashao:- Lho" azho: na na mae re: qo" zo: qo" shaug' na: dai: ru gang" tang: jo, vashao:.

⁸Yao" nho: kho:kham mung"dan: wa panglai: datham: mae" datham: joe" sho' mae Uphrad qid gyaung: mae" mug: myid thao" sho' lu: jo; li" nae" wo".

⁹Din" pyad' yo mae" byu qe wa yao" qhid' kheim: mae goe; pa" li" genae". Yao" gyevo qe wa yao: bam yao" gaung re myid gaung khyo goe; gyo" khyo" li" genae".

¹⁰Spain we' gagyo: kao" mae" kho:kham qe wa yao: re jhaung qhu" byid: mung: Sheba: we' Seba mae" kho:kham qe wa yao: re ngaui" xeim: jham cili" byid: genae".

¹¹Kho:kham alhab' wa yao" qhid' kheim: mae goe; pa" mung: byumyu" alhab' wa yao: re caung da" byid' li" genae".

¹²Yao: wa yao: re hug' khai: ra" myaung sho: mo, we' jo,nho" maqo" mung: su: yang qu" lhaui" to: mo, re khyad' khyui: yu: ra".

¹³Yao: wa qam: nang: mung: myaung sho: mo, re nhag' khyag' yu: ra". Yao: wa bao" yu ca" mo; nho: kao so' re khyad' yu byid' ra".

¹⁴Yao: wa yao: bam re deim" zag zo: qhug' rumae" we' aqan alan gye mae" khyad' khyui: yu: ra". Yao: bam: kao so' wa yao" qhid' mae" gyai phug' de; ra".

¹⁵Kho:kham kao qhang vashao: wo"- yao: re Arabia mung" mae" qhang li" byid: vageshao:- Yao" qhid' mae" yo, byang" sho' akyu" ceim" mho' byid' na vageshao:- Mao"So: shaman" jeju jham wa yao" dao mae khonhae" re: ajo; jo, vashao:.

¹⁶Ai: mug: myid mae gaug zo myo" laug: jo, vashao: ai: bug gaung jham mae wa Lebanon mae" qhovo: qhoshi: we' dakhyo:- gaug zo jham byang" sho' yaug: jo, vashao:- vogaung: mo" jham wa vohau: byang" sho' yaug: ra" jao: dae jham we' dakhyo: byu jham byang" jo, vageshao:.

¹⁷Kho:kham: nho: mang re khonhae" re: mato" myhid' pye' vageshao: yao" mang lahau: qi" ru wa ba ajo; jo, mae gang" tang: jo, vashao:- byumyu" alhab' mo, wa Mao"So: yang kho:kham re shaman" byid' lo: ru we' dakhyo: yao: bam re shaman" byid: nae" qhid' mae" Mao"So re ceim" mho' vageshao:.

¹⁸Israel nho: Mao"So ASANG re caung:khin" byid: ge,- airu" ra" mug' pho: mau" jham re kad' ru yao: za: ngad: ra".

¹⁹Yao" phungbao qi" ra" mang a re apyad ato mae caung:khin" byid: ge, yao" phungbao wa mug: myid geim" mae byang" jo, vashao:-

²⁰Ce:mae Yese nho: yao: zo: Davi akyu" mho' ra" dao: jham thao" va".