Read Maru CAUNG: KHIN" 74 Bible Online

CAUNG: KHIN" 74 - Maru bible

CAUNG: KHIN" 74

¹Mao"So we"- nao ngonhaung" re pe"mung: ceru: shapye' to" i? Nao wa nao yao" byumyu" qere apyad ato mae nhag' yo" na nae" i?

²Ganhae" gaco' mae" nao: yang nao yao" qhid' mae" khyin: yu: ra" byumyu" re- nao yao" byumyu" boe" nae" qhid' mae" jeim mae" khyad' jhui" yu: lo: ra" byumyu" re myid: beim: byid: la,- nao dalhang na co' ra" Ziun bam re beim: so: wa,.

³Ce: byo; qeim: jo; ra" ja: dao mae li" su" qu" wa, Ngonhaung" nho: gyevo jham wa- Caung:pa" Yham khug mae" jo, majo, re phyo' qeim" pye' avako".

⁴Ni" nho: gyevo qe wa ni" Caung:pa" Yham khug mae aungdoe; ra" khyo" hug' ako". Yao: bam wa aung doe; ra" aso: khyo" yao: bam: khyi jham re ai: jo, qo mae to' to" ako".

⁵Yao: bam wa sag' gae jham re vozaung" yang thau: khyang: pye' ra" sag' thau mo, we' dau: ako".

⁶Yao: bam wa sag' pye: khu:tung" jham alhab' re yao: bam: vozaung: jham we' be, dau jham: yang be; khyoe' pye' ako".

⁷Yao: bam wa ni" Caung:pa" Yham re phyo' pye' mung: myi: ngha" pye' ako". Nao re caung:pa" ra" jo, qo re yao: bam maca' majhad' kad' pye' ako".

⁸Yao: bam wa ngonhaung" re bin sho' khyoe' pye' nug: ako". Yao: bam wa ai: mung" mae" gyang" lho" ra" jo, qo alhab' re myi: ngha" pye' ako".

⁹Ngonhaung" nho: gyang" lho" ra" aso: alhab' baui" byaug va". Lapa qe dayaug re: madang lo:- aimung: ceru khomyhao" myao" nae" ga" ru khag' maba.

¹⁰O" Mao"So we"- ngonhaung" nho: gyevo qe:yang nao re khomyhao" myao" sho' ceim" qi: jung" na genae" laug i?

¹¹Nao wa pe"mung yang: ngonhaung" re bao" thaug' yu nae" rure ha: pye' i? Ni" lo, re pe"mung yang: lo, pyid' thag' ci yang: na: i?

¹²Ngadqere: O" Mao"So we"- nao wa sao qhid' maqhid mae" ngonhaung" nho: kho:kham ngad: lo: ra". Nao wa ngonhaung" re myo: sho' lhang khyad' yu va".

¹³Nao wa ni" nho: qi" qhang: ra" qam: so' yang panglai: re kho' pye' mung: panglai: mae" tham: lhaug' gug'nyhug' qi: jham: nho: au: re khyoe' pye' ra".

¹⁴Nao wa Levithan mao jaung: au: jham re khyoe' pye' byid' ra". Aimung: yao" mao gaung re din"pyad' yo mae" gug'nyhug' jham re zho" pye' ra".

¹⁵Nao wa qid baug: jham we' qid gyaung: zo: qe re yug nhao: ra". Nao: yang qid gyaung: mo" jham re kyaug' kin" lo" nhao: ra".

¹⁶Nao wa na" we' myi" re phan" to" ra". Nao wa ba we' lho" re yao" jo, qo mae yao: to: byid' ra".

¹⁷Nao wa myid gaung re mug: kyo: to: byid: mung: zin gaung: we' xaung: gaung re kad' to" ra".

¹⁸Ngadqere: O" ASANG we"- ni" gyevo qe wa nao re qi: na ko" rure myid: beim: wa,- Yao: bam wa Mao"So re malam mung: nao re manug mung: ca' pye' ko" rure beim: wa,.

¹⁹Bao" yu nae" byu maqo" ra" ni" byumyu" qere yao: bam: aqan alan mung: ra" gyevo qe: lo, mae dashapye' to:- Yhin" ru qhug' na: ra" ni" byumyu" qere dato" myhid' pye' wa,.

²⁰Ngonhaung" we' dang: to" ra" dao: thang" re myid: beim: wa,- Aimung" mae" cad' no; ra" jheim khao: ngo" mae se' da: be, khyad' aqan alan jo; ra".

²¹Deim" zag zo" ru qhug' ra" mo, re qho' daphau: nhao- Jo,nho" maqo" mo,- myaung sho: mo, we' qo ca" mo, wa nao re caung:khin" byid: vageshao:.

²²Mao"So we"- nao yao" gaung re lhau: zhung: mung: ni" khyo re ta" khyad' yu wa, Mao"So re malam: ra" mo, wa nao re ba gyam gyam qi: na ko" rure myid: beim: wa,

²³Ni" gyevo qe nhag' yo" ru we' hug' na ko" ru dato" myhid' pye'- ni" gyevo qe: thoe re mathang mano: dathug' nhao wa,.