Read Maru CAUNG: KHIN" 78 Bible Online

CAUNG: KHIN" 78 - Maru bible

CAUNG: KHIN" 78

¹Nga" byumyu" qe we"- nga" mho" shid' dao: re tae" gyo: ge, aimung: ngo ta" rure gyo" yu ge,

²Ngo wa pha,jhi" dao: jham ci mung: lai: lo" va" ayo, mae" vai: sham" we mhug' pho: jham re sho' kyo: nae".

³Ngonhaung" gyo" qu" mung: myao: qu" va" ru jham ngonhaung" nho: phug' pho" qe ngonhaung" re ta" kyo" lo: ru jham re sho' kyo: geli".

⁴Ngonhaung" wa ai: gu: re ngonhaung" nho: zo: dau qe mae" zug' to: nae" mangad:- ngonhaung" wa ce: thao: ne, mae" myid:zo: qere ASANG: kheim: so' we' yao" qi" qhang: ra" mau" zo" jham: nho: khyo- yao: kad' lai: lo: ra" mug' pho: mau" jham: khyo ta" kyo: nae".

⁵Yao: wa Israel byumyu" qere tarha" byid: mung: Yaku nho: myid:zo: qere amyin" dao: jham byid' ra". Yao: wa yao" tarha" re yao: bam: myid:zo: qere mho" byid: nae" qhid' mae" ngonhaung" nho: phug' phyid' qere mho" shid' ra".

⁶Airulao" thao mae" myid:zo: qe wa- ai: tarha" jham re zhao: yu mung:- yao: bam: myid:zo: qere dam: kai" mho" shid' nae" ngad: ako".

⁷Ce:khyo" yang yao: bam re: Mao"So re lam khug: na mung: yao: kad' rure mato" myhid' pye' lo: yao" amyin" jham re khonhae" re: phug' cao" na: li" genae".

⁸Yao: bam wa Mao"So re lam khug: ru khonhae" re: matang: ru we' yao: re jhaug' mazaug mung: tau: lhan: yang: maphug' cao" ra" yao: bam: phug' phyid' qe we' madau genae".

⁹Lo, la: jham we' myo:khe' jham seim" vin: ci: ra" Ephrim byu qe wa mang: zin" ra" ba re tao" phao: lo" ako".

¹⁰Yao: bam wa Mao"So we' dang: to" ra" yao: bam: dao: thang" re macao" ngad: ako". Yao: bam wa yao" tarha" re manug: cao" mung: ngag: pye' ako".

¹¹Yao: bam wa yao: kad' rure yao" yang kad' qhu" ra" mug' pho: mau" jham re to" myid' pye' ako".

¹²Yao: bam: phug' phyid' qe lhaug' qu" na ko" au: re Mao"So wa Egutu mung" mae" Ziun jao: dae yo mae mug' pho: mau" jham kad' qhu" va".

¹³Yao: wa panglai: re kho' pye' mung: yao: bam re agyo: khyo" jhui" lai: lo: ra". Yao: wa qid jham re khinqae jham ru: yhe' to" ra".

¹⁴Yao: wa na" gaung re jham thaui: we' mung: yao: bam re jhui" lo: ra". Aimung: myi" re myi: bao: yang jhui" lo: ra".

¹⁵Yao: wa din"pyad' yo mae laug bam jham kho' pye' mung: yao: bam re no; ra" myid kao" mae" qid byid' ra".

¹⁶Yao: wa laug bam mae" qid baug: gyaung: yug: thug' nhao mung: qid gyaung: mo" we' dakhyo: qid yug nhao: ra".

¹⁷Ngadqere: yao: bam wa Mao"So re xo' yang: qobo shad' ako". Aimung: yao: bam wa din"pyad' yo mae myhao: thao" yaug re tau: lhan" ako".

¹⁸Yao: bam wa yao: bam o: ra" zo: shaug' mho' yang: Mao"So re thaug thaug jham" qu" ako".

¹⁹Yao: bam wa Mao"So re phaug' tau: yang:- Mao"So wa din"pyad' yo mae zo:ve qo" i?

²⁰Yao: wa laug bam re be, mung: taung byaung: ru: qid moe dang: thug' nhao: ru dang: ngadqere: yao: wa ngonhaung" re mug we' yao" byumyu" qere sho: re: qo" byid: nae" i? ga: ta" ako"

²¹Aimung: ASANG wa yao: bam ta" rure the' gyo: lao" nhag' yo" ra". Aimung: yao: wa yao" byumyu" qere myi" yang khe' mung: yao: bam re nhag' yo" ru wa je: laung" xo: li" ra".

²²Pe"mung:ga"re yao: bam wa yao: re malam khug mung: yao" yang yao: bam re khyad' yu nae" ga" rure malam" ko" ngad: ra".

²³Ngadqere: yao: wa- mug:gaung khyo jhau: ke' mung: mug:gaung kham: jham re bung" lo nae"qhid' mae" amyin" byid' ke' ra".

²⁴Yao: wa yao: bam zo: nae" qhid' mae" manna re khyo" byid: yang: mug:gaung mae" gaug zo byid' ra".

²⁵Aimung: yao: bam wa mug: lagyo: qe: zo: shaug' zo: mung: yao: bam o: ru alhab' re Mao"So byid: va".

²⁶Yao: wa ba thug' shad' mae" la hug' re hug' nhao mung: yao" kheim: so' yang mug: thao shad' mae" la re nhug' to" ke' ra".

²⁷Aimung: yao: wa yao" byumyu" qere- panglai: yae mae" ma coe nho" myo" ra" ngho' jham khyo" byid' ra".

²⁸Ai: ngho' jham wa- yao: bam thang: na: ra" jo, qo agaung: zaung jham: avai: ayae mae byang" sho' gyo" bam: jo; ako".

²⁹Aimung: ai: byu qe wa gyi: sho' qhug' zo" ako". Mao"So wa yao: bam o: rure byid: va".

³⁰Ngadqere: yao: bam shu: ru matho' byan: mung: azo" na: shiko" ra".

³¹Mao"So wa yao: bam re nhag' yo" li" mung: yao: bam mae" qam: bo: thao" mo, re we' Israel qemae" qao" zin" thao" ra" zolau: qere se' pye' va".

³²Ceru: bin: mung qere: ai: byumyu" qe wa xo' yang: qobo shad' ako". Yao" nho: mug: pho: mau" jham re myao qere: yao: re malam ngad: ako".

³³Aimung:- yao: wa yao: bam: khyo re so' dadae she we' dakhyo: thao" nhao mung: yao: bam: kao so' re nyag din taung" byo; qeim: ra" khyo" yang thao" lo" nhao: ra".

³⁴Yao" yang yao: bam mae" daqhae: re se' pye' khao: ngo" dang: ra" mo, wa yao: jhao" dam: tug' lo mung: nhag' lam: tha" ru we' yao: re vintang: za: akyu" mho' ako".

³⁵Mao"So wa yao: bam re gug: gam byid: yaug ngad mung: Qam: so' bo: thao" yaug wa yao: bam re bao" yu: rure myid: beim" ako".

³⁶Ngadqere: yao: bam: dao: kheim: alhab' wa mhug' dao: jham za: ngad: ra". Yao: bam ta" ru pe" re: aung khug mae" mangad:.

³⁷Yao: bam wa yao" dao mae jhaug' mazaug- yao: we' dang: to" ra" yao: bam: dao: thang" re jhaug' mazaug ngad: ako".

³⁸Mao"So wa yao" byumyu" qere nhag' khyag' mung: yao: bam: qobo re khyad' pye' byid' ra". Aimung: yao: bam re maphyo' qheim" pye' ngad: ra". Myo: sho' lhang yao" nhag' yo" rure zang" pye' mung:-yao" nhag' jam: mayo" thug' li" ngad: ra".

³⁹Yao: bam wa hug' lai: lo" ra" la hug' we' dakhyo: shid: lo" ba: ra" mo, za: ngad: rure yao" yang myid: beim: byid' ra".

⁴⁰Yao: bam wa din"pyad' yo mae yao: re ana" na" za: tau: lhan: ko" ra" i? Yao: re khonho" lhang kaug' nhao: lo: ako" i?

⁴¹Yao: bam wa Mao"So re dam: jham" qu" qu" mung: Israel nho: Gyang" Lho" ra" Mao"So re no nhao: ako".

⁴²Yao: bam wa yao" qi" qhang: ra" kheim: so' re we' yao: bam re yao: bam: gyevo qe: lo, mae" khyad' yu: ra" ba na re to" myhid' pye' ako".

⁴³Egutu mung" Zoan jao: gyu" mae kad' qhu" ra" qam: so' qi" ra" mug' pho: jham re to" myhid' pye' ako".

⁴⁴Yao: wa qid gyaung: jham re sa: boe" byaug nhao mung: Egutu byumyu" qe wa qid pe" maba: shaug' lo:ngad: ako".

⁴⁵Yao: wa yao: bam re yhin" ra" pyab' zha" yang yao: bam: mung" re phyo' qheim" pye' ra". Pohaung jham re yao: bam: phaung gaung: khyo nhao: ke' byid' ra".

⁴⁶Yao: wa- yao: bam: qho:vo: re zo" pye' byid: nae" yao: bam: yo jham re phyo' qheim" pye' nae" khyag' phaung" jham re nhao: ke' ra".

⁴⁷Yao: wa lagqu: yang yao: bam: sabyi naui jham re phyo' qheim" pye' nhao: ra". Yao: bam: pho' ham" gae jham re nghin kho" yang pe' se' pye' nhao: ra".

⁴⁸Yao: wa yao: bam: nung: jham re lagqu: yang se' pye' byid: mung: yao: bam: cad' kyaung" yao kyaung" jham re lhe' myi" yang se' pye' byid' ra".

⁴⁹Yao: wa shid: ra" lagyo: we' dakhyo: yao" nhag' yo: we' gyaug pho: nhag' jam: yo" rure vhe' sheim" khyo" ke' mung: yao: bam re qi" ra" qug: khai: phau: zo: nhao: ra".

⁵⁰Yao: wa yao" nhag' yo: re mazang" cilo: yao: bam: kao so' rere: matang" to:- qam" no: yang yao: bam re se' pye' ra".

⁵¹Yao: wa Egutu yham khaung ug' khug' alhab' mae" yauggai zoqhid' qere se' pye' byid' ra".

⁵²Ai: thao yao: wa yao" byumyu" qere yao zaung" yaug we' dakhyo: jhui" phao: thug' yu mung: yao: bam re din"pyad' yo khyo" jhui" lo: ra".

⁵³Yao: wa yao: bam re gug: gam taung" jhui" lo mung: yao: bam magyaug ngad: ako". Ngadqere: panglai: wa yao: bam: gyevo jham re bodang" nghoe' pye' ra".

⁵⁴Yao: wa yao: bam re gyang" lho" mug: khyo jhui" lo mung: yao: yao" yang aung: to" ra" bam jham khyo jhui" vao lo: ra".

⁵⁵Yao" byumyu" qe byaung" vao lo: ra" au: re ai: mug: mae" na xug' qere yao" yang khe' pye' byid' ra". Yao: wa yao: bam: mug: myid re Israel kaung jham: qhid' mae" kho' myho" byid: mung: yao: bam: yham jham re yao" byumyu" qere byid' pye' ra".

⁵⁶Ngadqere: yao: bam wa qam: so' bo: thao" ra" Mao"So re tau: lhan: mung: yao: re jham" qu" ako". Yao: bam wa yao" amyin" jham re maphug' cao" ngad: ako".

⁵⁷Ai: atha" yao: bam wa yao: bam: phug' pho" qe we' dakhyo: za: angag zang tau: lhan: mung: jhaug' mazaug ngad: ako". Kaui: ra" myo:khe' we' dakhyo: magai: lam ngad: ako".

⁵⁸Yao: bam wa Mao"So re maba: ra" byumyu" qenho: caung:pa" jo, qo jham we' yao: bam kad' ra" yao: bam: solho jham: yang- yao: re nhag' jam: yo: nhao: ako".

⁵⁹Mao"So wa ai: rure myao lao" nhag' yo: mung: yao" byumyu" qere bin sho' ngag: lhaui" pye' ra".

⁶⁰Yao: wa- ngonhaung" phaung gaung: mae na: ra"- yao" yham ga" ra" Shilo mae jo; ra" yao" zaung re shapye' to: co' ra".

⁶¹Yao: wa ngonhaung" nho: dao: thang" ban" re- yao" kheim: so' we' phungbao aso: re ngonhaung" nho: gyevo qeyang taung" pye' nhao: ra".

⁶²Yao: wa yao" byumyu" re nhag' yo: mung: yao: bam: gyevo qeyang se' pye' ru qhug' zo: nhao: ra".

⁶³Zolau: qe wa gyekhe' ra" mang: zin: jao: mae se' pye' ru qhug' mung: zomyi: qere yu nae" byu mana lo:.

⁶⁴Khinjaung qe wa aqan alan mau" yang shid: ako". Aimung: yao: bam: cug' mo" qe wa kaug' ngug nae" akhang" maqo" ngad: ako".

⁶⁵Lo" thao" mae ASANG wa yab myi: so" li" nhohab yao: wa sabyi qang" yang byan" to" li" ra" qam: bo yaug we' dakhyo: so" li" ra".

⁶⁶Yao: wa yao" gyevo qere myao" sho' qho' thug' mung: seim" na naekhyo: khe' thug' pye' ra".

⁶⁷Ngadqere: yao: wa Yoseb nho: myid:zo: qere ngag: lhaui" pye' ra". Yao: wa Ephrim kaung re makhyin: yu ngad: ra".

⁶⁸Ai: atha" yao: wa Yuda kaung re khyin: yu: ra". Aimung: yao: gyai nhag' lam: taui: sho' jhid'de; ra" Ziun bam re khyin: yu: ra".

⁶⁹Ai:jo, qo mae yao: wa yao" yham re mug:gaung mae zhaug' to" ruru: yao" Caung:pa" Yham re zhaug' to" ra". Yao: wa myid gaung re we' dakhyo: ayo, byang" mae gug: gam sho' ai: rure tang za: te" to" ra".

⁷⁰Yao: wa- yao" daui daui yaug Davi re khyin: to" ra". Yao: re mhin" gyo, jao: mae" yao" cad' yao kyaung" re zam" na: ra" jo, qo mae" khai: yu: ra". Aimung: yao: re Israel kho:kham Mao"So: byumyu" nho: yao zam: yaug boe" nhao: ra".

⁷¹

⁷²Davi wa yao: bam re yao" qhid' mae" pe" mamyid losho' qo" gun caung: ra". Aimung: yao: bam re jhao jhao za: jhui" au: she: ra".