Read Maru CAUNG: KHIN" 79 Bible Online

CAUNG: KHIN" 79 - Maru bible

CAUNG: KHIN" 79

¹O" Mao"So we"- Mao"So re maba: ra" taung bug qe wa ni" mug: myid khug khyo jhin" vao li" ako". Yao: bam wa ni" nho: gyang" lho" ra" Caung:pa" Yham re masan masin" kad' pye' mung: Yerusalem re phyo' qheim" to: co' ako".

²Yao: bam wa ni" byumyu" qenho: maogaung jham re nangda qe: qhid' mae" to: byid: co' mung: ni" daui nhao okaung qenho: maogaung jham re seyo: gug'nyhug' lhe: jham yang zo" pye' nae" qhid' mae" to: co' ako".

³Yao: bam wa ni" byumyu" qenho: sa: re qid we' dakhyo: yug: thug' nhao: ako". Sa: jham wa Yerusalem khug khyo" qid we' dakhyo: yug: lai: lo" va". Aimung: sushid re tai: bam" nyhab' nae" byu dayaug re: madang lo:.

⁴Avai: ayae mae" byumyu" qe wa ngonhaung" re roe" zo" ako". Yao: bam wa ngonhaung" re qi mung: jung" na: ako".

⁵ASANG we"- nao wa ngonhaung" re apyad ato mae nhag' yo" na naeva" i? Ni" nho: nhag' yo: wa myi: we' dakhyo: xo' yang: nga" na nae" i?

⁶Ni" nho: nhag' yo" rure nao re macaung:pa" mo; dao mae- nao jhao" akyu" mamho' mo; dao mae tug' byid: wa,

⁷Pe"mung:ga"re yao: bam wa ni" byumyu" qere se' pye' mung: ni" mung"dan: re phyo' qheim" pye' ako".

⁸Ngonhaung" nho: phug' phyid' qe: qobo mathao mae ngonhaung" re qobo dae dabyid:. Ana" ngonhaung" re nhag' khyag' yu la,- ngonhaung" wa myid: lao" khyo alhab' re ci:phyaug' pye' bam va".

⁹O" Mao"So we"- ngonhaung" re bao" byid: yang: khyad' yu la,- nao yao" nga: ye, khyo: nho: mathao mae ngonhaung" re khyad' khyui: yu mung: ngonhaung" nho: qobo re khyad' pye' byid: la,.

¹⁰Byumyu" qe wa pe"mung: yang: ngonhaung" re- naonhaung" Mao"So khai: mae na: i? ga:gai: myid: genae" i? Ni" nho: daui daui mo; nho: sa: re yao: bam: yang yug nhao: ra" mathao mae byumyu" qere nao: yang qobo dae byid' rure myao nhao la,

¹¹Thaung: byu qe nokyang: kyang" ra" thoe re tae" gyo: byid: mung: se' pye' nae" qhid' mae" qobo dae byid' to: va" mo, re ni" nho: qi" qhang: ra" kheim: so' yang loe; beim nhao byid: wa,.

¹²ASANG we"- nao re gatau: byumyu" qe:yang nug: khyo: roe" zo" ru alhab' atha" yao: bam re nhad' zhao" dam: tug' xe' byid: wa,.

¹³Ailao" ni" nho: yao kyaung" mae" yao jham ngad: ra" ni" byumyu" ngonhaung" wa nao re apyad ato mae jeju beim: so: byid' na mung: joe" lo nae" ce:thao: ne, ayo, byang" sho' mae nao re ceim" caung:khin" byid' na: bam nae".