Read Maru CAUNG: KHIN" 81 Bible Online

CAUNG: KHIN" 81 - Maru bible

CAUNG: KHIN" 81

¹Ngonhaung" re gyevha byid' ra" ngonhaung" nho: Mao"So re ngaui bau: ngaui lho" hug' ge,- Yaku nho: Mao"So re caung:khin" byid' ra" Nghaui"caung: na ge,

²Nghaui" kyo" rure qhid mung: lo, be, jhu jao kheim" re be; myhang" ke' ge, taui: myo: sho' de; ra"tang: jham we' be, tang: she tang: jham mae gyo" ngaui gyo" yo taung" be; nghaui" ke' ge,

³Lho" xin: we' lho" lang" yo, re poe qhid' mae" labo" mad: ke' ge,

⁴Ce wa Israel mung" mae tarha"- Yaku nho: Mao"So mae" joe" li" ra" amyin" dao: ngad: ra".

⁵Yao: wa Egutu re yao" yang khe' zin" au: re Israel byumyu" qere ai: tarha" byid' to" ra". Ngo wa ngo maba: ra" thoe dathoe ceru: ga: ta" ru the' gyo: va".

⁶Ni" dao gaung: mae" qo re ngo yu: pye' byid: va" ni" zho:gam: qo jham re khyo" pye' nhao va".

⁷Nao qug: khai: qhug' na: ra" au: re nao ngore khai: yao mung: nao re ngo khyad' yu va". La qam" khug mae ngo vho' jo, qo mae" nao re tau: byid: va". Meriba qid thug' jham mae ngo nao re jham" qu" va".

⁸Nga" byumyu" qe we"- ngo ta" peim" rure tae" gyo: ge,- Israel we"- nao ngore tae' gyo" re khonho" gai nae" i? ein: lhaung" taung" myid:.

⁹Nao wa gatau: so re khonhae" re: maqo" caung:pa" nae".

¹⁰Ngo wa nao re Egutu mae" phoe' jhui" thug' lo: ra" ni" nho: Mao"So ASANG ngad:- ni" nho: nhad' re ho" ke' wa,- aire ngo nao re zo:ve zho: nae".

¹¹Ngadqere: nga" byumyu" qe wa ngo ta" rure manug: tae" gyo: ko" ngad: ra". Israel wa nga" mho dao: re magyo: ngad: ra".

¹²Aimung: ngo wa yao: bam re yao: bam yao" sang: dang: ra" khyo mae su: nhao mung: yao: bam kad' nug: ru pe" re: pe" kad' nhao va".

¹³Nga" byumyu" qe ngo mho: rure tae" gyo: ko" qa: we". Yao: bam nga" mho dao: gyo: ko" qa: we"- ein: lhaung" taung" myid:.

¹⁴Ngo wa yao: bam: gyevo qere aung: pye' byid: mung: yao: bam: gye alhab' re phyad za: gyekhe' aung: pye' nug: ra".

¹⁵Ngo re nghang: mo, wa nga" nho: qhid' kheim: mae gyaug: ru we' goe; pa" li" genae" ru- yao: bam: qobo dae wa apyad ato mae dang: jo; li" nae" ru ngad: ra".

¹⁶Naonhaung" re kam" wa ngo: yang gai: thao" ra" jung: gaug zho: nae". Aimung: naonhaung" re seyo mae" byo: yhid: yang gyi: sho' hkau nae" ru ngad: wo".