Read Maru CAUNG: KHIN" 83 Bible Online

CAUNG: KHIN" 83 - Maru bible

CAUNG: KHIN" 83

¹O" Mao"So we"- sae za: datae" to:- sae dana: jo,- datae" to:

²Qu" wa, ni" gyevo qe wa tau: lhan" na: ako". Nao re nghang: mo, wa gye kad' na: ako".

³Yao: bam wa ni" byumyu" qere gye kad' nae" qhid' mae" byin phyo: khug' zin" na: ako". Yao: bam wa nao gug' gam byid' to: mo, re gyekhe' ako".

⁴Yao: bam wa- Ro"- yao: bam: mung"dan: re phyo' sin" pye' gelang: ailao" Israel re apyad ato mae qo" to" myhid' pye' nae" ngad:- ga: ta" na: ako".

⁵Yao: bam wa nao re tug' khe' nae" qhid' mae" yao: cao: yao: jho" qham: to" rumae myid vang" na: ako".

⁶Ai bam wa Edom byumyu" qe Israel byumyu" qe Moba byumyu" qe we' Hagara byumyu" qe-

⁷Gebala- Amon: we' Amaleg byumyu" qe Philisti we' Ture mae" byu qe ngad: ako".

⁸Asuri re: Lod nho: myid:zo: qe ngad ko" ra" Amon we' Moba byumyu" qenho: qam: bo: ra" ba nam phung: khyo" bo: ra".

⁹Midian byumyu" qere nao kad' lai: lo: ruru: yao: bam re kad' pye' wa,- Kishon qid gyaung: nhae mae Sisera we' Yabin re kad' pye' ruru: yao: bam re kad' wa,

¹⁰Nao wa yao: bam re Endo mae" aung: pye' mung: yao: bam: mao gaung jham wa myid gaung mae bab: lo" ako".

¹¹Oreb we' Zeeb re kad' ruru: yao: bam: au: jhaung qere kad' wa,- Zeba we' Zalmunna re jeim: nhao: ruru: yao: bam: zug: kho:kham alhab' re aung: pye' wa,.

¹²Yao: bam wa Mao"So sang: ra" mug: myid re ngonhaung" yu: sang: pye' nae" ga: ta" ako".

¹³O" Mao"So we"- yao: bam re phalhug we' dakhyo:- la hug' yang hug' sin" pye' ra" khovho re we' dakhyo: lhau: sin" pye' wa,

¹⁴Myi: wa seyo: thao" jam" re nga" pye' ruru: myi: shae jham wa bug gaung jham re nga" pye' reru:-

¹⁵Ni" la qam" yang yao: bam re khe' phao: pye' wa,- aimung: ni" gyaug pho: la hug' yang yao: bam re kyaug' tin" ke' wa,.

¹⁶O" ASANG we"- yao: bam: myo,khung: re qho' phau: nhao wa,- aimung: ni" kheim: so' re yao: bam: yang lhang: yu sho' kad' byid: wa,

¹⁷Yao: bam wa seim" mung: apyad ato mae gyaug: din: na vageshao:- yao: bam wa bin sho' nga: phoe: thao" khyo" shid geshao:.

¹⁸Yao: bam wa nao dayaug za: ASANG ngad: rure ba: yu vageshao:- Myid gaung geim" mae lo" thao" kheim: so' yang eib: ra" Kho:kham ngad: ru ba: yu vageshao:,