Read Maru CAUNG: KHIN" 85 Bible Online

CAUNG: KHIN" 85 - Maru bible

CAUNG: KHIN" 85

¹ASANG we"- nao wa ni" mug: myid re nhag' khyag' yu: ava". Nao wa Israel re dalhang dam: na: dai nhao: ava".

²Nao wa ni" byumyu" qenho: qobo jham re khyad' pye' byid: mung: yao: bam shad' nghung" ra" gu: re khyad' byid' ava".

³Yao: bam re nhag' yo" rure nao to" myhid pye' mung: ni" nhag' jam: yo" rure dam: tam" yu: pye' ava".

⁴O" Mao"So ngonhaung" khyad' yu: ASANG we"- ngonhaung" re dam: jhui" tug' yu la, Aimung:ngonhaung" re maqu" nug: rure thang: pye' wa,

⁵Nao wa ngonhaung" re apyad ato mae nhag' yo" na nae" i? Khonhae" re: ni" nho: nhag' yo" ru magyo" lo nae" la,

⁶Ngonhaung" re qam: dam: bo nhao byid: la, aire ni" byumyu" ngonhaung" wa nao re caung:khin" byid: nae".

⁷O" ASANG we"- ngonhaung" re ni" gang" tang: ra" jhid'de; myid qhu" byid: la, aimung: nao: yang khyad' yu: ra" bao" thaug' ru byid: la,.

⁸Ngo wa ASANG Mao"So ta" na: rure tae" gyo" na:. Ngonhaung" qe ngonhaung" nho: nhag' magyang" khyo jham khyo madam: tug' lo" ngad: re wa ngonhaung" re ngaui pyo: yaug yo: ru byid' na: ga: yao: wa yao" byumyu" ngonhaung" re dao:so: byid' to" ra".

⁹Gaigai: yao:- yao: wa yao: re nga: yhe' byid: mo, re khyad' yu nae" jin" gau ngad: rumung: yao" khyad' yu: ra" kheim: so' wa ngonhaung" mug: myid mae dang: jo, nae".

¹⁰Jhid'de; myid we' jhaug' zaug: ru jho" qhug' gemung: dangman" ru we' ngaui pyo: yaug yo: ru wa jho" po: li" genae".

¹¹Xao su byu: nho: jhaug' zaug: ru wa myid gaung mae" do, lo" mung: Mao"So: dangman" ru wa mug:khaung mae" qu" khyo" ke' li" nae".

¹²ASANG wa ngonhaung" re na: dai nhao: li" nae"- aimung: ngonhaung" nho: mug:myid wa gaug zo myo: sho' re thug' byid: li" nae".

¹³Dangman" ru wa ASANG qhid' khyo ye" lo" mung: yao" qhid' mae" khyo re nyhang" byid' li" nae".