Read Maru CAUNG: KHIN" 86 Bible Online

CAUNG: KHIN" 86 - Maru bible

CAUNG: KHIN" 86

¹ASANG we"- ngore tae" gyo: mung: tau: byid: la, Pe"mung:ga"re ngo mae bao" yu nae" byu maqo" mung: qam: nang" jo;

²Ngo wa ni" dao mae jhaug' zaug: na: rumung: ngore shid: rumae" khyad' yu la, Ngo wa ni" daui daui yaug ngad: ru we' nao re ngha: na yaug ngad: ruyang ngore khyad' yu la,

³Nao wa nga" Mao"So ngad: ra". Aimung: ngore nhag' khyag' yu la,- ngo wa daba geim" nao re akyu" mho' na: ra".

⁴O ASANG we"- ni" daui daui yaug re ngaui bau: nhao la, Pe"mung:ga"re nga" akyu" mho' dao: jham nao jhao" do, lo" ra".

⁵Nao wa ngonhaung" dao mae gai mung: qobo khyad' byid' ra". Nao re akyu" mho' ra" mo; qhid' mae" mabaui mabyo; ra" jhid'de; myid byang" jo; ra".

⁶ASANG we"- nga" akyu" mho' dao: re tae" gyo: byid: la,- Bao" yu nae" mho' yao: ra" nga" hug' yao thoe re gyo: byid: la,.

⁷Nao wa nga" akyu" mho' dao: jham re tau: byid' rumung: qug: khai: qhug' ra" au: re ngo nao re hug' yao: ke' ra".

⁸O" ASANG we"- nao we' dau: ra" so mana ngad: ra". Nao kad' lo: rure khag' dayaug re: maqo" kad' ngad: ra".

⁹Nao: yang phan" to" ra" byumyu" alhab' wa nao jhao" li" mung: goe; pa" li" genae". Yao: bam wa ni" nho: qi" qhang: ra" khyo re caung:khin" byid' li" genae".

¹⁰Nao wa qam: so' qi" rumung: mug' pho: mau" jham re kad' ra". Nao dayaug za: Mao"So ngad: ra".

¹¹ASANG we"- nao ngore kad' nhao nug: ru mho" shid' byid: la,- aire ngo wa nao re jhaug' zaug taung" ni" mho dao: gyo" na nae"- Jab byang" ra" khyo" nao re phug' myao: mung: caung da" byid' na nae" qhid' mae" ngore mho" shid' byid: la,.

¹²O" ASANG nga" Mao"So we"- ngo wa nao re nga" nhag' lam: alhab' yang caung:khin" nae". Ngo wa ni" qi" qhang: ra" khyo re apyad ato mae ta" hau: byid: nae".

¹³Nga" dao mae to" ra" ni" gang" tang: ra" ni" jhid'de; myid wa khoqhi" qi" qhang: ra" i? Nao wa ngore lab khug mae" yao: khyad' yu va".

¹⁴O" ASANG we"- ngad beim: mo, wa ngore gye kad' nae" ga: li" na: ako". Nao re pe" xan: masun: ra" aqan alan: byu nghang: daphung: wa ngore se' pye' nae" ga: phin" na: ako".

¹⁵Ngadqere: ASANG we"- nao wa nhag' khyag' ru we' jhid'de; ra" Mao"So ngad: ra". Nao wa khonhae" re: nhag' lam: qhang mung: khonhae" re: nhag' khyag' myid bo: ru we' jhaug' zaug: ra" Mao"So ngad: ra".

¹⁶Ngo jhao" lhang: lo mung: ngore nhag' khyag' yu la,- ngore qam: byid: mung: khyad' yu la,- pe"mung:ga"re nga" myhi" ngore caung da" byid' ru we' dakhyo: nao re ngo caung da" byid' ra".

¹⁷ASANG we"- nao gai: ra" khyo ngore sagse: qhu" byid: la,- ngore nghang: mo, wa nao: yang ngore nhag' myan: byid: mung: bao" yu: rure yao: bam myao lao" qho' thug' li" genae".