Read Maru CAUNG: KHIN" 88 Bible Online

CAUNG: KHIN" 88 - Maru bible

CAUNG: KHIN" 88

¹Nga" khyad' yu: ASANG Mao"So we"- ngo wa daba: geim" nao re hug' yao: na:- Myi" rere: ngo wa nao jhao" li" ra".

²Nga" akyu" mho' dao: re gyo: byid: la,- Ngo re bao" yu nae" qhid' mae" hug' yao: ra" nga" thoe re tae" gyo: byid: la,.

³Nga" dao mae qug: khai: gyai myo: sho' gyo" zao" mung:- ngo wa shid: lo" na va".

⁴Ngo wa shid nae" jhao" ra" gayaug alhab' we' dakhyo: za: ngad: ra". Nga" qam: alhab' wa gan: byaug va".

⁵Ngo wa sushid jham: phaung mae shapye' to" ru qhug' va". Se' pye' ru qhug' mung: lab khug mae lang" jo, mo, we' dakhyo: boe" jo, va". Nao: yang matho' bao" yu lo sho'- nao: yang bin sho' to" myhid' to: va" mo, we' dakhyo: boe" jo, va".

⁶Nao wa ngore lab thai: khug khyo shapye' khyo" pye' va". No; thao" mung: cad' no; ra" dungkhung: khyo shapye' khyo" pye' ra".

⁷Ni" nhag' yo" ruwa- nga" dao mae nhai" zag: to: mung: ngo wa bang: lhung" jham: khug mae nhai" khyoe' pye' ru qhug' va".

⁸Nao wa ngore nga" ba nam qeyang shapye' to: nae" khyo" kad' va". Nao wa ngore yao: bam: yang ca' pye' nae" khyo" kad' va". Ngo wa pyid' lhaung" to" ru qhug' mung: maqo" phao: thug' lo:.

⁹Nga" myo,jid' jham wa dayin dayo: dae no: ruyang kyam: byaug va". ASANG we"- ngo wa ba khao: ngo" nao re khai: yao mung: nga" lo, tau: ci yang: nao re akyu" mho' na:.

¹⁰Nao wa shid: lo" va" mo; qhid' mae" mug' pho: mau" kad' qhu" byid' i? Yao: bam to" li" mung: nao re caung:khin" byid' ako" i?

¹¹Ni" mabaui mabyo; ra" jhid'de; myid khyo re lab mae ye:ta" kyo" i? Mangad: lao" ni" jhaug' zaug: rure byo; qeim: ra" jo, qo mae ta" kyo" i?

¹²Ni" mug' pho: mau" jham re ai: cad' no; ra" jo, qo mae gai: the' myao: i? Mangad: lao" ni" gai: ra" khyo re to" myhid' pye' ra" mug: mae gai: the' myao: i?

¹³ASANG we"- ngo wa bao" yu nae" nao re mho' yao: na: ra". Ne, seim khao: ngo" nao re ngo akyu" mho' ra".

¹⁴ASANG we"- pe"mung: nao ngore ngag: lhaui" pye' i? Nao wa pe"mung: ngo mae" phaug' lo" byaug: i?

¹⁵Ngo ngai shi" yo, mae" qug' khai: dayin dayo: qhug' lo mung: alaug laug shid: pye' va". Ngo wa nao: yang qobo dae byid' ra" mathao mae qo la: vin mung: bin: gyoe; gyo" lo" na va".

¹⁶Ni" gyaug ca" ra" nhag' yo" ru wa ngore khyoe' ke' va". Nao: yang qu" gyaug qu" lhaung khe' zin" ruyang ngore phyo' qheim" pye' ra".

¹⁷Ba geim" geim" yao: bam wa ngore qid je" li"ra" qid we' dakhyo: lhang" kham" to" ako". Yao: bam wa ngore shad' khao: ngo" khyo" jhid' lhaung" ako".

¹⁸Nao wa ngore- te' thao" ra" nga" ba nam qeyang lhao" re:- ceim" shalhaui" pye' nae"khyo: kad' va". Aimung: nga" byin cao: wa cad' no; ru za: angad lo" ra".