Read Maru CAUNG: KHIN" 89 Bible Online

CAUNG: KHIN" 89 - Maru bible

CAUNG: KHIN" 89

¹O" ASANG we"- ni" mabaui mabyo; ra" jhid'de; myid re ngo khonhae" re: Nghaui"caung: caung: nae". Ngo wa ni" jhaug' zaug: ra" khyo re apyad ato mae ta" hau: byid' na nae".

²Ni" jhid'de; myid wa yo, khyin: khao: ngo" mae gang" tang: jo, nae" rure- ni" jhaug' zaug: ra" khyo re mug:gaung we' dakhyo:- mabaui mabyo, jo; rure ngo ba:.

³Nao wa- ngo khyin: yu: ra" yaug we' ngo dao: thang" to: va" nga" daui daui yaug Davi re dao:so: byid: va".

⁴Ni" myid:zo: qemae" dayaug yaug wa khonhae" re: kho:kham boe" na nae". Ni" kho:kham yham khaung re apyad ato mae ngo tang" to: byid: nae"- ga: ta" ra".

⁵Mug: khaung mae" mo, wa nao kad' ra" mug' pho: mau" jham re nghaui"caung: byid' ako". ASANG we"- gyang" lho" mo, wa ni" jhaug' zaug: rure nghaui"caung: byid' ako".

⁶ASANG we"- nao we' dau: ru mug: khaung mae khag' dayaug re: mana. Mug: khaung mae" mo, wa nao we' mai qi" ru khag' mana.

⁷Nao re gyang" lho" mo; phaung qham mae phug' myao" ako". Yao: bam alhab' mo, wa nao re gyaug phug' yang: ye; bam: ako".

⁸Qam: so' bo: thao" ra" ASANG we"- nao we' dakhyo: qam: bo: ru khag' mana. O" ASANG we"- khyo ja: khao: ngo" mae nao wa jhaug' zaug: ra".

⁹Nao wa kheim: so' qi" yang: panglai: re eib: na: ra". Nao wa ai: nho: nhag' yo" ra" bang: lhung" jham re tae" lo" nhao: ra".

¹⁰Nao wa gug'nyhug' qi:- min: yui Rahab re khyoe' ke' mung: se' pye' ra". Ni" qam: so' qi" yang ni" gyevo qere nao aung: pye' ra".

¹¹Mug: khaung wa ni" mae" ngad: ra". Myid gaung re: ni" mae" ngad: ra". Mug: myid we' aimae bo: ru alhab' re nao kad' to" ra".

¹²Nao wa mug: am: we' mug: thao re phan" to: mung:- Tabo bam we' Hermon bam wa nao re ngaui bau: ngaui lho" nghaui"caung: byid' ako".

¹³Nao wa khonho" kheim: so' qi" ra" i? Ni" qam: wa khonho" qi" qhang: ra" i?

¹⁴Ni" kho:kham mung"dan: wa- dangman" ru we' tarha" din" rumae aqao: te" to" ra". Nao kad' ra" mau" zo" alhab' mae jhid'de; myid we' jhaug' zaug: rure qhu" byid' ra".

¹⁵Nao re nghaui" caung: jham khyo" caung:pa" mo, wa khoqhi" ngaui bau: nga: lho" ako" i? Ni" nhag' khyag' ra" bo" bao khug mae daui: na mo, wa khoqhi" nga: lho" ako" i?

¹⁶Ni" mathao mae yao: bam wa ba geim" ngaui bau" na: ako". Aimung: yao: bam wa ni" gai: ra" mathao mae nao re caung:khin" byid' ako".

¹⁷Nao wa ngonhaung" re qi: sho' aung doe; khyo byid' ra". Ni" jhid,de; myid khyo" yang nao wa ngonhaung" re caung: nhao: ra".

¹⁸O" ASANG we"- nao wa ngonhaung" re gug: gam byid: yaug re khyin: to: byid' ra". Israel nho: Gyang" Lho" ra" Mao"So nao wa ngonhaung" re kho:kham byid: va".

¹⁹Nao wa ni" nho: jhaug' zaug: ra" daui daui mo, re ganhae" gaco' mae" qhu" lho khyo" ta" va". Ngo wa mang qi" ra" gyezo: dayaug re bao" thaug' byid: va". Nga" byumyu" qemae" ngo khyin: yu: to" ra" yaug re ngo: yang kho:kham zaung tao" byid: va".

²⁰Ngo wa gyang" lho" ra" xau gyad mung: nga" daui daui yaug Davi re kho:kham boe" nhao va".

²¹Nga" qam: wa khonhae" re: yao: we' daga" jo; jo, nae". Nga" kheim: so' wa yao: re qam: bo nhao: li" nae".

²²Yao" gyevo qe wa khonhae" re: yao: re maqo" aung: pye' li" genae". Nhag' lam: kaui: ra" makhyang: mashab mo, wa yao: re nghang: mo, yaug khao: ngo" re se' pye' byid: nae".

²³Yao" gyevo qere ngo: yang khyoe' pye' mung: yao: re nghang: mo, yaug khao: ngo" re se' pye' byid: nae".

²⁴Ngo wa yao: re jhid'de; mung: yao" dao mae jhaug' zaug: na nae". Ngo wa yao: re khonhae" re: aung doe, nhao nae".

²⁵Ngo wa yao" mung"dan: re- Mug:gaung: Pang:lai: mae" Uphrad' qid gyaung: joe" sho' ce" laung: byid: nae".

²⁶Yao: wa ngore- nao wa nga" Pho" we' nga" Mao"So ngad: ra". Ngo re gug: gam byid: yaug we' nga" khyad' yu: ASANG ngad: ra"- ga: ta" ra".

²⁷Ngo wa yao: re yauggai zoqhid' boe" nhao mung:- kho:kham alhab' tho' mae je yang: qi" qhang: thao" yaug boe" nhao nae".

²⁸Ngo wa yao: re byid' to" ra" dao:so: re khonhae" re: zam" to: mung: yao: we' to" ra" nga" dao: thang" wa apyad ato mae gang" tang: jo, nae".

²⁹Yao" nho: kho:kham yham khaung nyaug wa- mug:gaung we' dakhyo: gang" tang: jo, nae". Yao" myid:zo: qemae" dayaug yaug wa khonhae" re: kho:kham boe" na: li" nae".

³⁰Ngadqere: yao" myid:zo: qe wa nga" tarha" jham re shad' mung: nga" amyin" jham we' dakhyo: maphug' cao" ko" ngad: re-

³¹Ngo mho" shid' ra" khyo jham re yao: bam pe" xan: masun: mung: nga" amyin" jham re maphug' cao" mazam: gengad: re

³²Ngo wa yao: bam: qobo: qhid' mae" yao: bam re qobo dae byid: nae". Yao: bam: shad' ra" khyo jham: qhid' mae" yao: bam re dayin dayo: kyi: zo: nhao nae".

³³Ngadqere: ngo wa Davi re jhid'de; rure mathang: pye' nae". Yao: re byid' to" ra" dao:so: rere: mabaui mabyo, nhao nae".

³⁴Yao: we' to" ra" nga" dao: thang" rere: maphyo' pye' nae". Yao: re byid' to: va" dao:so: dalam: rere: madam: tug' yu: pye' byid: nae".

³⁵Ngo wa nga" gyang" lho" ra" mang-a mae dalhang: dae bin sho' dao:so: ke' to: va". Ngo wa Davi re khonhae" re: mamhug' nae".

³⁶Yao: wa myid:zo: qe khonhae" re: aqo" na: li" nae". Aimung: ba azho: na na wa yao" kho:kham mung"dan: re lhaug' qu" byid' na nae".

³⁷Ai: ru wa mug:gaung mae" sagse: boe" jo; ra". lho" we' dakhyo: yo, byang" sho' ngad: jo, nae".

³⁸Ngadqere: nao wa nao: yang khyin: to" ra" kho:kham re nhag' yo: va". Nao wa yao: re shapye' to: co' mung: ngag: lhaui" pye' va".

³⁹Nao wa ni" daui daui yaug we' dang: to" ra" dao:so: re phyo' pye' va". Aimung: yao" ba maug: re tham: bab bam" mae shapye' khyo" pye' ava".

⁴⁰Nao wa yao" vomo" nho: vang jham re phyo' khyo" pye' mung: yao" gyezaung jham re byo; qeim: jo, nhao: ra".

⁴¹Ayae khyo" su" lai: lo" mo, alhab' wa- yao" jo,nho" jham re khug' yu: lo" ako". Yao" yham kyo: cao: alhab' mo, wa yao: re ceim" qi: pye' ako".

⁴²Nao wa yao" gyevo qere aung doe, nhao: pye' ava". Nao wa yao: bam alhab' re ngaui bau: nhao: ava".

⁴³Nao wa yao" gyezai shae lhae jham re pe" akyu" mabo lo: boe" nhao: pye' ava". Aimung: yao: re gyekhe' jao: mae seim" nhao: pye' ava".

⁴⁴Nao wa yao" kho:kham zaung: bao" re yu: pye' byid' ava". Aimung: yao" kho:kham zaung tao" re myid gaung khyo tau: lhang" khyo" pye' ava".

⁴⁵Nao wa yao: re yao" ayo, majoe" shi:re mao: nhao: ava". Aimung: yao: re nga: yeim nhao: pye' ava".

⁴⁶ASANG nao wa apyad ato mae vho' byaug naeva" i? Ni" nhag' yo" ru wa khomyhao" myao" sho' myi: we' dakhyo: nga" na nae" i?

⁴⁷Nga" kao so' wa khonho" lang" rure myid: beim: wa,- Shid: lo" ba: ra" mo, ngonhaung" alhab' mo, re nao: yang phan" to" rure myid: beim: byid: la,.

⁴⁸Mashid losho' khag' qo" daui: na nae" i? Xao su byu wa lab bug khyo malo" nae"khyo: khoru: qo" kad' nae" i?

⁴⁹ASANG we"- qhid' phyao: mae" ni" nho: jhid'de; ra" sagse: jham wa khai: lo" byaug va" i? Nao: yang Davi re byid' to" ra" dao:so: jham wa khai: lo" byaug va" i?

⁵⁰Ni" daui daui yaug ngo khonho" roe" zo" ru qhug' na: rure dato" myhid' pye'- Mao"So re maba: ra" taung bug qeyang ceim" nhang" ru alhab' re ngo khoru: phau: zo" lai: lo: rure dato" myhid' pye' byid:.

⁵¹O" ASANG we"- ni" gyevo qe wa nao: yang khyin: yu: ra" kho:kham Davi re ceim" roe" zo" ako". Yao: khai: lo" khai: mae ceim" roe" zo" na: ako".

⁵²ASANG re apyad ato mae- caung:khin" byid: ge, wo". Amen! Amen!