Read Maru CAUNG: KHIN" 90 Bible Online

CAUNG: KHIN" 90 - Maru bible

CAUNG: KHIN" 90

¹O" ASANG we" nao wa khonhae" re: ngonhaung" nho: yham ngad: lo va".

²Bug gaung jham re nao maphan" to: shire mug: myid re maboe" nhao shi:re nao wa mathao" magan: ayo, mae" Mao"So ngad mung: apyad ato mae Mao"So ngad: li" nae".

³Nao wa xao su byu qere yao: boe" lai: lo: ra" khyo dam: tug' nae" ta" mung: nao: yang yao: re phalhug dam: tha" boe" nhao: ra".

⁴Ni" qhid' mae" zin lam: dataung wa daba na we' dau: ra"> Aijham wa ayenhe' we' dakhyo: ngad mung: lai" byaug: avako". Myi" ayo, mae lang" ra" yo, qug we' dakhyo: lai: byaug: ako".

⁵Nao wa ngonhaung" re qid je" li" ru we' dakhyo: pyaung" khyad' lo" ra". Ngonhaung" wa yab mo, daja: mo; ra" myhao" maje: myao" daui: na- ngonhaung" wa ne, seim mae yaug: thug' li" ra" mhin: zo: qe we' dau: ra".

⁶Aijham wa yaug: qi" li" ru we' abu" bu" mung: myi" thao zo" re kyaug' shid: lo" ako".

⁷Ngonhaung" wa ni" nho: nhag' yo" ruyang phyo'qheim" pye' ru qhug' ra". Nao nhag' yo" ruyang gyaug: din: bam va".

⁸Nao wa ngonhaung" nho: qobo jham re ngonhaung" qhid' kheim: mae khyo" to: byid' ra". Ngonhaung" nho: zug' nyham" to" ra" qobo jham re nao myao byid' ra".

⁹Ngonhaung" nho: kao so' wa nao nhag' yo" ruyang phyid' lang" pye' byid' ra". Aiwa dao: so' so' ra" dao: kheim: we' dakhyo: tae" byaug: ra".

¹⁰Ngonhaung" qo" daui: na: ru wa zin lam: nhad' xe ngad: ra"- Gyai gang" re she' xe zin qo" na: ra". Ngadqere: ai: zin na jham wa ngonhaung" re qug: khai: we' kaug' qhui: ru za: cili" byid' ra". Apyad wa khomyhao" mamyao" re thao" byaug mung: ngonhaung" wa baui" byaug: ra".

¹¹Ni" nho: nhag' jam: yo" ra" kheim: so' re dae xo sho' khag' leim zo" ra" i? Nao nhag' yo" ruyang khoru" ra" gyaug ja: qo" thug' li" rure khag' ba: i?

¹²Ngonhaung" pha,jhi" bo sho' ngonhaung" nho: apyad khonho" lang" ru ngonhaung" re mho" shid' byid: la,

¹³Nao nhag' yo" ru wa khomyhao" xo' myao" shinae" i? O" ASANG we' ni" daui daui re nhag' khyag' yu la,

¹⁴Ne, seim khao: ngo" ngonhaung" re ni" gang" tang: ra" jhid'de; myid ke' byang" byid: la, aire ngonhaung" nghaui"caung: mung: pyad geim" ngaui bau" na: bam nae".

¹⁵Ngonhaung" phyag' jhin: ra" zin na gyo: mae ngonhaung" re nao: yang kaug' qhui: ru byid' ra" nho" ngaui bau" ru byid: la,

¹⁶Ni" qam: so' qi" ra" mau" zo" jham re ni" daui daui mo, re myao nhao la,- ni" phungbao qi" ra" qam: so' re ngonhaung" nho: myid:zo: qere qhu" byid: wa,

¹⁷Ngonhaung" Mao"So ASANG we" ni" shaman" jeju wa ngonhaung" we' ngad: jo, vashao:- Ngonhaung" kad' ru alhab' mae aung doe; ru byid: la,.