Read Maru CAUNG: KHIN" 91 Bible Online

CAUNG: KHIN" 91 - Maru bible

CAUNG: KHIN" 91

¹Gug: gam: ru qo" yu nae" qhid' mae" ASANG jhao" ye: yaug khag' ngadqere:- qam: so' bo: thao" ra" ASANG khug mae gug: gam za: na: jo, yaug khag' ngadqere:-

²Yao: re- nao wa ngore gug: gam byid' ru we' gye vha byid: yaug ngad: ra". Nao wa nga" Mao"So ngad mung: nao mae ngo lam khug: na:- ga: qo" ta" ra".

³Yao: wa nao re vho' jo; ra" gyaug ci" ja: alhab' mae" gug: gam byid: nae". Shid nhao ba: ra" no phyo: alhab' mae" re: gug: gam byid: nae".

⁴Yao: wa nao re yao" daung jham: yang nghoe' byid: nae". Yao: qu" caung: ra" khug mae nao qo" gug: gam: na nae". Yao" jhaug' zaug: ruyang nao re gug: gam byid: mung: gye vha byid: nae".

⁵Nao wa myi" ayo, mae" gyaug ci" ja: re magyaug ca". Na" ayo, mae nyag din taung" khe' zin" lo: rure re: magyaug ca".

⁶Mug: cad' mae boe" ra" qam" no jham we' na" gaung: kao" mae khe' se' lo: ra" makhyang: mashab: ru jham rere: magyaug ca".

⁷Ni" nhae mae dataung yaug- ni" avai: ayae mae datug yaug gyang: shid qere" nao re dae maqo" te' genae".

⁸Nhag' lam: kaui: ra" makhyang: mashab mo, khoru: qobo dae qhug' de, zo" rure nao the' qu" myao: li" nae".

⁹Nao wa qam: so' qi" qhang: thao" ra" ASANG re ni" gug: gam byid: yaug khyo" boe" nhao: ava".

¹⁰Aimung: nao re byo; qeim: ru pe" yang re: the' thaung" zao" nae" mangad: ni" yham nhae khyo aqan alan: ru pe" joe" tin" li" nae" mangad:.

¹¹Nao khai: ye: qere: lhaug' zaung" gug: gam byid: nae" qhid' mae" ASANG wa yao" mug: lagyo: jham re jaung: to: byid: nae".

¹²Laugbaui mae ni" khyid au: mathaung: shao: ga: yao: bam: lo; yang ceim" vo; yu byid' li" genae".

¹³Nao wa khangkhyi jham we' lhao maui jham re- gyai lhe" ra" khang khyi jham we' daug bo: ra" lhao maui jham re qo" zab: pye" pye' li" nae".

¹⁴Mao"So wa- ngore jhid'de; mo, re ngo khyad' yu nae"- Ngo re ASANG khyo" toe' mo, re ngo gug: gam byid: nae".

¹⁵Yao: bam ngore khai: yao lao" ngo tau: byid: nae" yao: bam qug: khai: qhug' na: au: yao: bam we' ngo daga" na nae". Yao: bam re ngo khyad' khyui: yu mung: nga: yhe' byid: nae".

¹⁶Ngo yao: bam re kao qhang nhao: ruyang aphug' jhaung qhu" byid: nae". Yao: bam re ngo khyad' yu nae"- ga: ta" ra".