Read Maru CAUNG: KHIN" 92 Bible Online

CAUNG: KHIN" 92 - Maru bible

CAUNG: KHIN" 92

¹ASANG we" nao re jeju beim: so" ru wa khoqhi" gai: ra" i? Myhao: thao" ra" Mao"So we" nao re Nghaui"caung: mung: nga: yhe' byid' ru wa khoqhi" gai: ra" i?

²Ne, seim khao: ngo" ni" nho: mabaui mabyo; ra" jhid'de; myid re ta" hau: mung: myi khao: ngo" ni" jhaug' zaung: rure ta" hau" kyo: nae" gai: ra".

³Taui: de; ra" tang: she thoe: yang we' taui: myo: sho' de; ra" tang: thoe: yang caung:khin" byid: gai: ra".

⁴O" ASANG we" ni" kheim: so' qi" ra" mau" zo" jham wa ngore ngaui bau: nhao: ra". Pe"mung:ga"re nao kad' ra" rure ngo wa ngaui bau: ngaui lho" nghaui"caung: byid' ra".

⁵ASANG we" ni" mau" zo" lo, thao jham wa khonho" qi" qhang: ra" i? Nao myid: ra" khyo jham wa khonho" no; ra" i?

⁶Ceru wa ko:pyad' dayaug maqo" ba: gyo" ru ngad: ra" nhag' magyang: yaug maqo" ba: gyo: ngad: ra".

⁷Nhag' lam: kaui: ra" makhyang: mashab yaug wa myo, we' dakhyo: yaug: qi" li" mung: shad' nghung" rure kad' mo, wa na: dai: ako". Ngadqere: yao: bam wa bin sho' phyo' qheim" pye' ru qhug' genae".

⁸Pe"mung:ga"re ASANG nao wa apyad ato mae gyag: thao" ra" yaug ngad: ra".

⁹Ni" gyevo jham shid: shao" genae" rure ngonhaung" ba: aimung: nhag' lam: kaui: ra" makhyang: mashab: mo, alhab' wa jeim" lo" genae" rure ngonhaung" ba: ra".

¹⁰Nao wa ngore nung: lae" lo: dadau: ru: qam: bo nhao: ra". Aimung: ngore ngaui bau" ru we' shaman" byid: ra".

¹¹Ngo wa nga" nho: gyevo jham jeim" lo" rure the' myao va". Aimung: nhag' lam: kaui: ra" makhyang: mashab mo, ngug: hug' na thoe re the' gyo: va".

¹²Din:man: mo, wa zo: ja" the' gae jham we' dakhyo: yaug: qhang: lo: li" genae". Yao: bam wa Lebanon mae" shaug' gae jham we' dakhyo: yaug: qi" li" genae".

¹³Yao: bam wa ASANG: yham mae qho" to" ra" sag' gae jham we' dakhyo: ngonhaung" Mao"So: Caung:pa" Yham mae yaug: qhang: li" ra" sag' gae we' dakhyo: ngad: ra".

¹⁴Aijham wa mao: qere: ashi: zaui: mung: khonhae" re: nyug: ru we' gang" tang: jo; ako".

¹⁵Ceru wa ASANG: tarha" dangman" rure qhu" byid' ra". Ngo re gug: gam byid: yaug mae shad' ru pe" mabo: rure qhu" byid' ra".