Read Maru CAUNG: KHIN" 96 Bible Online

CAUNG: KHIN" 96 - Maru bible

CAUNG: KHIN" 96

¹ASANG re nghaui" caung: asag' yang caung: byid: ge, mug: myid geim" mae" alhab' mo, we"- ASANG re nghaui" caung: byid: ge,

²Asang re nghaui"caung: mung: caung:khin" byid: ge, Yao" yang ngonhaung" re khyad' yu: ra" khyo ngaui bau" lau dao: re ba khao: ngo" ta" hau" na ge,

³Yao" nho: phungbao re byumyu" alhab' mo, re ta" hau" kyo: ge,- byumyu" alhab' re yao" qam: so' thin: ra" mau" zo" jham ta" hau" kyo: ge,

⁴ASANG wa qi" qhang: rumung: gyai yao: caung:khin" byid: nae" man: qi" ra". So alhab' tho' mae je yang: yao: re nga: yhe' byid: ca" ra".

⁵Gatau: byumyu" alhab' mo; nho: so jham wa solho jham za: ngad: ako". ngadqere: ASANG wa mug: khaung jham re phan" to" ra".

⁶Phungbao we' kho:kham aso' wa yao: re lhang" kham" to" ra". Yao" nho: Caung:pa" Yham mae kheim: so' we' yaung" ru byang" jo; ra".

⁷Myid gaung: dao mae" yao" byu qe we"- ASANG re caung:khin" byid: ge, Yao" nho: phungbao we' qam: o: re caung:khin" byid: ge,

⁸ASANG: phung bo: ra" mang a re caung:khin" byid: ge,- Ngaui" xeim: ci mung: yao" Caung:pa" Yham khyo vao li" ge,

⁹Gyang" lho" yaug thug' li" re yao" qhid' kheim: mae goe; pa" ge,- mug: myid geim" mae" mo, we" yao" qhid' kheim: mae gyaug: nin" na ge,

¹⁰Byumyu" alhab' re- ASANG wa kho:kham ngad:- myid gaung wa yao" jo, qo mae tang: jo, nhao mung: yao: wa byumyu" qere tarha" dangman" ru we' dao: kho' byid: nae"- ein: ta" kyo: ge,

¹¹Myid gaung we' mug:gaung we"- ngaui bau: ge,- panglai: we"- nao mae bo: ra" gug'nyhug' ja: khao: ngo" we"- hug' myang ge,

¹²Jao: gyu" jham we"- naonhaung" mae bo: ru alhab' we' daga" ngaui bau: ge,- seyo mae" sag' gae jham wa

¹³ASANG gyo" li" mung: myid gaung re eib: ra" au:- ngaui bau: ngaui lho" hug' li" genae". Yao: wa mug: myid mae" byumyu" qe re tarha" dangman" ru we' jao dang jo: ra" khyo" eib: li" nae".