Read Maru CAUNG: KHIN" 97 Bible Online

CAUNG: KHIN" 97 - Maru bible

CAUNG: KHIN" 97

¹ASANG wa kho:kham ngad: ra". Myidgaung we"- ngaui bau: wa,- Pang:lai:: mae" gagyo: kao" jham we"- ngaui bau: ngaui lho" na ge,

²Jham thaui: we' cad' no; ru wa yao: re lhang" kham" to" ra". Yao: wa dangman" ru we' tarha" din" ra" khyo" yang eib: na: ra".

³Yao" qhid' kheim: mae myi:shae ye" lo" mung: yao" avai: ayae mae" gyevo qere nga" pye' ra".

⁴Yao" nho: lhe' cad' wa mug: myid re bo" bao byid' ra". Aire myid gaung myao mung: laui" nin" ra".

⁵Bug gaung jham wa ASANG: qhid' kheim: mae- myid gaung alhab' geim" nho: ASANG: qhid' kheim: mae byomin" we' dakhyo: aqang: yug: byaung" lo" va".

⁶Mug: khaung wa yao" dangman" ra" khyo re- byumyu" cao jab alhab' mo, wa yao" phungbao re the' myao: ako".

⁷Solho jham re caung:pa" ra" mo, yaug khao: ngo" wa qho' phau" ako". So alhab' wa ASANG: qhid' kheim: mae goe; pa" ako".

⁸O" ASANG we"- ni" dao: kho' ra" ru jham: mathao mae Ziun mae" byumyu" qe wa ngaui bau" na: ako". Yuda vogaung: mo" jham re: ngaui bau" ako".

⁹Qam: bo: thao" ra" ASANG we"- nao wa mug: myid geim" mae" mo; zug: kho:kham ngad: ra". Nao wa so alhab' tho' mae je: qi" qhang yaug ngad: ra".

¹⁰Makhyang: mashab: rure nghang" ra" mo, re ASANG jhid'de; ra". Yao: wa yao" byumyu" qenho: kao so' re gug: gam byid' ra". Yao: wa yao: bam re makhyang: mashab: ra" kheim: so' mae" khyad' khyui: yu: ra".

¹¹Bo" bao wa din:man: mo; dao mae bao byid' ra". Byu gai qere re: ngaui bau" ru byid' ra".

¹²ASANG kad' ra" mau" zo" mathao mae din:man: mo, alhab' ngaui bau" na ge,- Gyang" lho" ra" Mao"So kad' va" rure myid: beim: mung: yao: re jeju beim: so: byid: ge,.