Read Maru CAUNG: KHIN" 99 Bible Online

CAUNG: KHIN" 99 - Maru bible

CAUNG: KHIN" 99

¹ASANG wa kho:kham ngad: ra". Aimung: yang: mung" byu qe gyaug: nin" ako". Yao: wa kherubin dao mae- kho:kham tao" khau" dao mae zaung: jo, mung: myid gaung alhab' laui" nin" na: ra".

²ASANG wa Ziun mae qam: so' qi" jo; ra". Yao: wa- byumyu" alhab' bam: dao mae qi" qhang: thao" yaug ngad: ra".

³Yaug khao: ngo" wa qi" qhang: thao" ra" yao" mang re caung:khin" byid' li" genae". Yao: wa gyang" lho" ra" wo".

⁴Qam: bo: thao" ra" kho: kham we"- nao wa jo: rure o: ra". Nao wa Israel mae tarha" dangman" rure kyae: to: byid: va". Nao wa dangman" ru we' jao dang jo: rure cili" byid: va".

⁵Ngonhaung" nho: Mao"So ASANG re caung:khin" byid: ge, yao" kho:kham zaung tao" qhid' kheim: mae caung:pa" ge,- yao: wa gyang" lho" ra" wo".

⁶Moshe we' Arun wa yao" khinjaung ngad: ako". Samuela re: yao: re akyu" mho' yaug ngad: ra". Yao: bam wa ASANG re mho' yao mung: yao" yang tau: byid' ra".

⁷Yao: wa jham thaui: zang baung: mae" yao: bam re jhau: ke' ra". Yao: bam wa yao" yang byid' ra" tarha" jham we' amyin" jham re phug' cao" ako".

⁸O" ASANG ngonhaung" nho: Mao"So we"- nao wa ni" byumyu" qere tau: byid' ra". Nao wa yao: bam yao" qobo: nho: mathao mae yao: bam re qobo dae byid: ngad sho' ngadqere: qobo khyad' pye' byid' ra" Mao"So ngad: ga" ru yao: bam re qhu" byid' ra".

⁹Ngonhaung" nho: Mao"So re caung:khin" byid: ge,- aimung: yao" gyang" lho" ra" bam mae caung:pa" byid: ge, ngonhaung" nho: Mao"So ASANG wa gyang" lho" ra" wo".