Read Maru DAO: ZHAM" 10 Bible Online

DAO: ZHAM" 10 - Maru bible

DAO: ZHAM" 10

¹Cejham wa Sholamon: nho: dao: zham" ngad:- pha,jhi" bo: ra" yauggai zo: wa yao: pho" re ngaui bau: nhao: ra". Nhag' magyang" ra" yaug wa yao: myhi" re kaug' nhao: ra".

²Mangad maang: ra" khyo" the' yu: ra" ni" jo,nho" wa nao re pe" akyu" byid' li" nae" mangad:- din:man" ra" khyo kam" wa ni" kao so' re khyad' byid: nae".

³ASANG wa byugai qere vae:moe, qid shab' nhao: li" nae" mangad:- makhyang: mo, re kam" wa yao: bam o: ra" khyo re maqo" yu sho' kad' li" nae".

⁴Noe" shoe: ru wa nao re myaung sho: nhao mung: mau" khao" qam: ke' ru wa nao re qo" nhao: li" nae".

⁵Aqhid' athao ba: myid yaug wa qhovo: mhang" au: re zhang: yu: to" ra". Gaug yad yo, re yab: jo, yaug wa aqho' axag' ngad: ra".

⁶Byugai qe wa shaman" byid' ru qo" khae: yu genae". Makhyang: mashab yaug ta" ra" dao: jham mae se' da: be, khyad' ru nyham" to" ra".

⁷Byugai qere shaman" jeju khyo" ceim" beim: so" ru qhug' nae". Makhyang: mashab yaug re wa khomyhao" mangad: re to" myhid' pye' li" genae".

⁸Aqhid athao ba: myid mo, wa pha,jhi" byid' ra" dao: gai re gyo" yu: ako". Mangad mangung: jhau yaug wa byo; qeim: lo" li" nae".

⁹Dangman" ra" byu qe wa gug: gam cae: tae" na: ako". Madang maman" yaug kam" wa taung" pye' ru qhug' nae".

¹⁰Din:man" ra" khyo re mata" thug' lo: zug' to: yaug wa qug: khai: boe" nhao: ra". De: de: ta" phung" yaug kam" wa yaug yo cae: tae" khyo re kad' na: ra".

¹¹Byugai: nho: dao: jham wa kao so' qid thug' ngad: ra". Makhyang: mashab yaug ta" ra" dao: mae se' da: be, khyad' ru nyham" to" ra".

¹²Nghang" ru wa qug: khai: lhau: thug' ke' ra". Jhid' de, myid kam" wa shad' nghung" ra" khyo myo: sho' re qo" nghoe' pye' byid' ra".

¹³Au: naug: gai mo, wa gyang: gyang: za: ta" ako". Nhag' magyang: mo, kam" wa qobo dae qhug' kham zo: ca" ako".

¹⁴Pha,jhi" bo mo, wa laba lajhao re qo" yu: qhi" qho: yu: ako"- ngadqere: nhag' magyang: yaug jhau: ke' re qug: khai: wa mava: lo:ngad: ra".

¹⁵Jo,nho" wa jo,nho" qo" yaug re gug: gam byid: mung: myaung sho" ru wa myaung yaug re phyo' pye' ra".

¹⁶Gai: ra" mau" zaui" ra" aphug' jhaung qhu" wa kao so' ngad: ra". Qobo kam" wa qobo za: dam: laung" yu: ra".

¹⁷Mho" shid' au: re tae" gyo: mo, wa kao so' daui: na genae". Yao: yao" qobo re malham: yu mo, kam" wa gyaug lha" ca" nae".

¹⁸Yao: yao" nhag' lam: khug mae nghang: myid nyham" ci yaug wa mhug' yaug ngad: ra". Gaui mho: qin" yaug khag' ngadqere: nhag' magyang" yaug ngad: ra".

¹⁹Nao je: jhau re je: qobo boe" ra". Nao pha,jhi" bo: re wa sae za: na: li" nae".

²⁰Byugai ta" ra" dao: jham wa ngaui gyang" we' dau: ra". Makhyang: yaug myid: thug' ke' ru wa pe" phug' made,.

²¹Byugai ta" ra" dao: jham wa byu myo: sho' re akyu" byid' li" nae". Ngadqere: nao yao: nhag' magyang" ruyang naoyao: re naoyao: se' yu ba: ra".

²²Nao jo,nho" qo" ru wa Mao"So: shaman" jeju ngad: ra". Mau" jam: khao" yang: za: re:- je: qo" li" nhao nae" mangad:.

²³Mangad mangung" ru kad' ra" yaug wa nhag' magyang" ru ngad mung: au: naug: gai mo, wa pha,jhi" mae ngaui bau: khyo qho: ako".

²⁴Din:man: mo, wa yao: bam o: ru qo" yu: ako". Makhyang: mo, kam" wa yao: bam gyaug: thao" ra" ja: yethe' yu: li" genae".

²⁵La qam" lo: re makhyang: mashab mo, bobo: lo" ako". Dangman: mo, kam" wa khonhae" re: gug: gug: za: qo" na: ako".

²⁶Byunoe" re ni" qhid' mae" pe" dakad' nhao- Yhid jhin qang: wa ni" zaui re kyam nhao: ru we' dakhyo: mangad: lao"- myikhug' wa ni" myo, re yag nhao: ru we' dakhyo: yao: ngad: li" nae".

²⁷ASANG: mho dao: gyo: yang: na wa,- aire nao kao so' qhang yang: qo" na: li" nae"- Makhyang: mashab mo, wa yao: bam: ayo, matho' joe" shire no' no' mae" shid: ako".

²⁸Byugai qe myid: to" ra" khyo wa yao: bam re ngaui bau: nhao: ra". Makhyang: mashab mo, kam" wa pe" qo" yu nae" magai: myid: lao" ngad: ra".

²⁹ASANG wa din:man: mo, re gug: gam byid' ra". Mangad mangung: kad' mo, re kam" wa phyo' qheim: pye' ra".

³⁰Din:man: mo, wa khonhae" re" gug: gam qo" yu: li" genae". Makhyang: mashab mo, kam" wa ce: mug: myid mae qo" na: dang genae" mangad:-

³¹Din:man: mo, wa pha,jhi" dao: ta" thug' ako". Magai mashab: ra" dao: ta" thug' mo, re tam" pye' byid' ru qhug' li" genae".

³²Din:man: mo, wa nhag' khyag' dao: ba: jhau: ako". Makhyang: mashab mo, kam" wa su re no nhao: ra" dao: za: khonhae" re: ata" thug' na: ako".