Read Maru DAO: ZHAM" 17 Bible Online

DAO: ZHAM" 17 - Maru bible

DAO: ZHAM" 17

¹Nhag' lam: yaug yo za: mug kyaug' dayho' qo" zo" ru wa qug: khai: byang" ra" yham mae zo: shaug' poe zo" ra" tho' je: gai: ra".

²Qag: ra" okaung wa Asang: akyu" mabo: ra" yauggai zo: dao mae kheim: so' qo" mung: ma daqhae: re qo" khae: yu: li" nae".

³Qhang we' ngaui re myi" yang phad' kyang" yu: ra". Amung: byu dayaug: nhag' lam: re wa ASANG: yang ca: qu" byid' ra".

⁴Makhyang: mashab mo, wa makhyang: mashab: ra" myid: thug' khyo re tae" gyo" ako". Mhug' hab' qe wa mhug' dao: re tae" gyo" ako".

⁵Nao wa myaung mo, re qi byid: lao" wa yao: bam re phan" to" ra" Mao"So re maphug' makhyad' kad' ru ngad: ra". Dayaug yaug gyin nhae" rure nao qu" ngaui: re wa qobo dae byid' ru qhug' li" nae".

⁶Zoshao qe wa yao: bam: yao: pho" qe: mathao mae langa: yu: ruru: phug' mao: qe wa yao: bam: yao: myid: qe: mathao mae langa: yu: ako".

⁷Phug' myao: tho' ra" byu qe wa mhug' dao: mata". Nhag' magyang: mo, wa phug' de; ru pe" mata".

⁸Byu damyo" wa khug vag: re vha" ra" pha,jhi" ru: qo" boe" nae" ga: myid: jho: ako". Yao: bam wa ja: khao: ngo" re qo" kad' boe" nae" ga: khug vag: re myid: lam: ako".

⁹Su: yang nao re ngaui genae" rure nao o: ngad: re yao: bam nao re shad' ra" au: yao: bam: qobo khyad' byid: wa,- jho" shad' to" ra" qobo xam" ci: re ba nam gao: ba: ra".

¹⁰Nhag' magyang: kopyad' dayo dae be, kham mung: zhao: ba: yu: ra" tho' au: naug: gai yaug wa qeim: mho" dao: dakheim" yang je: ba: zhao: yu: ra".

¹¹Khonhae" re: qug: khai: lhau: thug' ke' ra"- makhyang: mo, tau shid: ru wa gyai thin: ra" lagyo: we' dakhyo: phyad za: joe" li" nae".

¹²Pe" mau" maboe" ra" ja: re kad' na: ra" kopyad' we' qhug' nae" tho' mae wa yao: zo: lhad' yu: pye' qhug' ra" vae myhi" we' qhug' re je: gai: ra".

¹³Agai re magai: ruyang tug' byid' re ni" yham mae" makhyang: mashab: rure khonhae" re: maqo" yu: pye' li" nae".

¹⁴Jho" ta" ngag: qhid: ru wa tang" to" ra" qid tham: yug: bung" qhid: li" ru we' dau: ra". Je: malae: byaug shimae" tam" pye' wa,.

¹⁵Qobo maqo" yaug re dao: phyid' ru we' makhyang" ra" yaug re loe, nhao: ra" ru shid' ja" geim" re ASANG nghang" ra".

¹⁶Kopyad' re pha,jhi" mho" byid: nae" qhid' mae" ngaui yhung" ru wa pe" akyu" mabo. Pe"mung:ga"re yao: mae ba: myid: ra" au: naug: mabo yang: ngad: ra".

¹⁷Ba nam yao: cao: wa jhid'de; nhag' lam: khonhae" re: qhu" byid' ra". Qug: khai: qhug' re majho" bao" ra" mao:nhaung: wa pe" akyu" bo: i?

¹⁸Au: naug: mabo: ra" byu za: su gayaug: qhid' mae" jhin kham" yu: li" nae".

¹⁹Qobo re o: ra" yaug wa qug: khai: re boe" nhao nug yaug ngad: ra". Ayo, byang" phug: ta" na: re nao wa qug: khai: re qho: na yaug ngad: ra".

²⁰Makhyang: mashab: rure myid mung: jhau yaug wa gai: ru pe" the' nae" myid: lao" khyo majo,- byo; qeim: ru we' kyi" khyag' ru za: qhug' nae".

²¹Ako" asho: lo, mau" kad' thug' ra" yauggai zo: wa yao: pho" qhid' mae" nhag' kaug' nhag' ngai nae" ru za: ngad: ra".

²²Ngaui bau: taung" ba: na: re qao" zin" nhao: ra". Ayo, byang" sho' myo, nho sham: ru wa zo" mae" shid: lo" na: ru ngad: ra".

²³Akyang qeim: ra" tarha" agyi qe wa khug' byid' ra" khug vag: re jhaung qhu" yu zo" ako". Aimung: tarha" din: nyang khyo majo, lo:ngad: ra".

²⁴Au: naug: gai yaug wa pha,jhi" bo: ra" mau" re qu" yaung: qang: na: ra". Kopyad' wa khyi" khao: ngo" khyo du" lae" qin" ra".

²⁵Nhag' magyang" ra" yauggai zo: wa yao: pho" re kaug' nhao mung: yao: myhi" re nhag' lam: thao" nhao: ra".

²⁶Qobo maqo" yaug re yug: khyug' nhao: ru wa majo ngad: ra". Byugai qere qobo dae byid' re wa tarha" khyo" maboe" thug' li" lo:-

²⁷Yao: yao" gaung re khyag' za: myid: beim: mo, wa dao: myo: sho' majhau ca" ngad: ra". Sae za: tae" to: mo, wa khug qag nyan: bo mo, ngad: ako".

²⁸Ai: tho' mago"-yao: sae za: tae" to: mung: yao" nhad' re pyid' ci: re- kopyad' yaug re lhao" re: pha,jhi" bo mung: au: naug: gai yaug khyo" jho: ru qhug' ra".