Read Maru DAO: ZHAM" 18 Bible Online

DAO: ZHAM" 18 - Maru bible

DAO: ZHAM" 18

¹Su gaje we' mange, mo, wa yao: bam yao" khyo re za: myid: ako". Yao: bam wa su alhab' yang jo: ga: ba: ta" rure mavang" li" genae".

²Kopyad' wa pe" ba: gyo: maba: gyo: re: xan: masun:. Yao: khonho" ba: ga" ruza: qhu" nug: ra".

³Qobo we' aqho' axag' ru wa daga" ngad: ra". Nga: yhe' ru cilhag' ke' lao" ai: atha" ceim" jung" ru qhug' li" nae".

⁴Byu dayaug: dao: jham wa nammugdara re" ru: no, mung: qid gyaung: zo: re" ru: gyang" ra" pha,jhi" apan gai: boe" ra".

⁵Qobo qo" yaug re gug: gam byid: mung: qobo maqo" yaug re yao: kham: yu ang: ra" khyo makho' phyid' byid: re wa majo ngad: ra".

⁶Kopyad' yaug ngag: qhid: ke' re yao: wa dae re mho' na: ru ngad: ra".

⁷Kopyad' dao: jhau: re yao: yao" gaung re phyo' qheim" na: ru ngad: ra". Yao: yao" dao: thoe lha" mae yao: yao: myi" ra".

⁸Su: gaui mho: ru wa gyai myho' ra". Aire ngonhaung" khoqhi" sho' myug: ke' nug: ra" i?

⁹Byunoe" wa phyo' qheim" yaug we' dakhyo: za: magai yaug ngad: ra".

¹⁰ASANG wa gang" tang: ra" gyebyu zaung we' dau: ra". Ai: khyo din:man: mo, qo" ye: mung: gug: gug: qo" khug: na: ako".

¹¹Jo,nho" qo" mo, kam" wa yao: bam: jo,nho" yang yao: bam re vogaung: zang mae lhang" kham" to" ra" vang we' dakhyo: gug: gam byid' li" nae" ga: myid: ako".

¹²Nhag' lam: makhyo" yaug re khag' maphug'- ngad beim: mo, wa byo; qeim: lo" khyo mae ngad: ako".

¹³Maphaug' tau: shire tae" gyo: wa,. Airu: makad' re nao wa nhag' magyang: mung: su re roe" na: ru ngad: ra".

¹⁴Nao no: na: re- daui: na nug: ra" nhag' lam" yang qo" byan" lo: ra". Ngadqere: ai: nhag' lam: re ciphyaug' pye' re wa- ni" lo" thao" myid: lao" khyo baui" lo" byaug: ra".

¹⁵Au: naug: gai mo, wa khonhae" re: kao bau mung: mho" yu nae" jin" jin" ngad: ako".

¹⁶Akhyag: ra" byuqi: dayaug yaug re nao yeqhug' nug: re- yao" qhid' mae" jhaung qhu" ciye: wa,- aire laui: li" nae".

¹⁷Yao: re gye kad' yaug dao: myid: yo, joe" sho'- tarha" yung" mae dao: qhid' jhau yaug wa khonhae" re: jo nhohab ngad: ra".

¹⁸Tarha" yung" mae lau: gai shid' yaug mau" dalam: jho" ta" re ai: mau" re pha" be; ruyang gai: pin" pye' ra".

¹⁹Ni" mao:nhaung: re bao" thaug' wa, nao re gang" ra" vogaung: vang re" ru: gug: gam byid: li" nae". Ngadqere: yao: we' jho" byo; re kam" wa nao re yao: kham: lham: thaug' lhaung" pye' li" nae".

²⁰Nao ta" thug' ke' ra" dao: thoe: yang boe" lo: ru alhab' we' nao kao so' daui ca" li" nae".

²¹Nao ta" thug' ke' ra" dao: wa kao so' re qo" daui: na nhao: ru we' dakhyo: qo" shid nhao: ra". Aimung: ni" dao: kheim: mathao mae boe" lo: ru alhab' re khae: yu ca" ra".

²²Yham sang myhi" yu wa,- aiwa gai: ru ngad: ra". Aiwa ASANG nao re gai kad' byid' rure qhu" byid' ru ngad: ra".

²³Myaung yaug dao: jhau: re mho' ra" khyo" yin yo" jhau: ra". Jo,nho" qo" yaug kam" wa akhyi: akyaung ga: phaug' tau" ra".

²⁴Ba nam damyo" wa myao" sho' makham ngad: ako". Ngadqere: ba nam damyo" wa co' xo' mao:nhaung: tho' je: gang" ako".