Read Maru DAO: ZHAM" 2 Bible Online

DAO: ZHAM" 2 - Maru bible

DAO: ZHAM" 2

¹Nga" zo: we"- ngo mho" shid' ru gyo" yu wa,- ngo mho" shid' ra" khyo re dato" myhid' pye'.

²Pha,jhi" bo: ra" khyo re tae" gyo: mung: ba: qu" lag: phad' ra" nyan: qo" sho' mho' yu wa,

³ngad va"- Pha,jhi" laba lajhao re mho' yu wa,- nyan: pha,jhi" re myid' yu wa,

⁴aire ngaui re we' nyham" to" ra" qhang zai re qho: ruru: gai: boe" nho" phin: yang: pha,jhi" re qho: yu wa,

⁵airu: qho: re ASANG re gyaug phug' ra" khyo pe" ngad: rure nao ba: gyo" yu: li" nae". Aimung: ASANG: khyo re mho" yu: rumae aung doe; li" nae".

⁶Pha,jhi" byid: yaug wa ASANG ngad:. Yao: mae" pha,jhi" laba lajhao we' ba: gyo" ra" myid joe" li" ra".

⁷Yao: wa din:man: mung: nhag' lam: zaung" mo, re bao" thaug' byid: mung: gug: gam byid' ra".

⁸Yao: wa su gaje re tarha" din:man" ra" khyo" kad' yaug re gug: gam byid' ra". Yao: re phug' myao: caung:pa" mo, rere: lhaug' zaung" byid' ra".

⁹Ngo ta" ra" dao: re tae" gyo" re jo: ru we' tarha" dangman" rure nao ba: li" nae". Nao pe" kad' ca" ru nao ba: li" nae".

¹⁰Nao pha,jhi" bo: lo mung: ni" laba lajhao ba: ru wa nao re ngaui bau: nhao: li" nae".

¹¹Ni" ba: qu" lag: phad' ra" nyan: we' pha,jhi" laba lajhao wa nao re gug: gam byid' li" nae".

¹²Mangad' ra" khyo maye: nae" qhid' mae" nao re lhaug' zaung" byid' li" nae". Yao: bam ta" ra" dao: thoe: yang lhau: phyo' ra" mo, jhao" maye: nae" qhid' mae" lhaug' zaung" byid' li" nae".

¹³Mug: cad' khug mae na nug mung:- din:man" ra" byuna byuye, re to" pye' co' ra" mo; lo, mae" nao re gug: gam byid' li" nae".

¹⁴Mangad mangung" khyo mae pyo: khyo qho mung: makhyang" ra" khyo mae yug: no qobo khyo mae pyo" qin" mo; lo, mae" nao re gug: gam byid' li" nae".

¹⁵Lam maga" ra" byu qe: lo, mae" gug: gam byid' li" nae".

¹⁶Nhad' yaung" yang: nao re ju" phyo' mhai" yu nae" akyang qeim: ra" myiqe: myhi"-

¹⁷yao" yham sang pho" re jhaug' mazaug lo: gyang" lho" ra" lo, xo' dao:so: re to" pye' ra" myiqe: myhi" re nao qo" ngag: pye' nae" ngad: ra".

¹⁸Ai: myiqe: myhi" yham khyo nao ye" re shid: ru khyo ye" ru ngad: ra". Ai: khyo ye" ru wa movo: mug: khyo te' ye" lo" ru ngad: ra".

¹⁹Ai: myiqe: jhao" ye: mo, khag' re: madam: tug' lo ngad: ako". Ai: yaug wa kao so' daui: na: ra" khyo khonhae" re: madam: tug' lo lo:ngad: ra".

²⁰Aimung: nao wa gai: ra" byu qe: lag re qu" yu mung: din:man" ra" khyo mae daui: na wa,.

²¹Din:man" ra" byu qe- jab byang" mo, wa- ce: ngonhaung" mug: mae daui: na: li" genae".

²²Ngadqere: Mao"So wa makhyang: mo, re ai: mug: myid mae" phoe' yu: pye' mung: yug: no qobo kad' mo, re sag' zo: gae re we' dakhyo:- myid gaung mae" phan" pye' nae".