Read Maru DAO: ZHAM" 20 Bible Online

DAO: ZHAM" 20 - Maru bible

DAO: ZHAM" 20

¹Yhid saung" shaug' re mageim: hug' mung: ko" qin" ra" yaug boe" nhao: ra". Yhid yid: ru wa nhag' magyang" ra" mau" ngad: ra".

²Nhag' jam: yo" na: ra" kho:kham re kyid' na: ra" khang khyi re we' dakhyo: gyaug wa,- yao: re zai" yho" ke' yaug wa yao: yao" gaung yao: yao: se' shid: yu: ru ngad: ra".

³Kopyad' khag' ngadqere: jho" ta" ngag: rure gai: zai" thug' ke' ra". Airu: jho" byo; rumae mabo:bo lo: na: ru wa gai shab: ru ngad: ra".

⁴Yo phaug' yo, re yo maphaug' lo: noe" ra" yomau" zaui: yaug wa xaung: thug' li" re gaug pe" maba: yad: yu nae".

⁵Byu dayaug myid: to" ra" khyo jham wa gyai no; ra" qid thaung: khug mae" qid we' dau: ra". Ngadqere: khug qag nyan: bo yaug wa aire qo" khae: yu: ra".

⁶Byu yaug khao: ngo" wa yao: yao: khonho" din:man" ru we' kyid: ra" khyo re ta" ako". Ngadqere: yao: ta" ru we' dakhyo: gaigai: dinman: kyid yaug re qho: qu" wa,-

⁷Nhag' lam: din: mung: jo: ra" khyo cao" ra" yao: pho" qo" ra" zoshao qe wa zhau: vha: bo: ako".

⁸Kho: kham wa yao" tarha" zaung tao" mae zaung mung: makhyang: mashab: mau" re ba: myao byid' ra".

⁹Yao: yao" aung khug: nhag' lam: mae sho' sho' za: qobo maqo" ga: khag' qo" ta" nae" i?

¹⁰Madangman" ra" jao laug: we' jo, lag jham ci mo, re ASANG nghang" ra".

¹¹Zoshao lhao" re: yao: kad' ra" lo, mau" yang yao: khoru" yaug ngad: ru qhu" byid' ra". Yao: din:man: yaug ngad: la,- gai yaug ngad: la, ga" rure nao qo" ba: qu" thug' ra".

¹²ASANG wa ngonhaung" re qu" myao: yu nae" myo,jid' we' gyo" yu nae" nokhye' byid' to" ra".

¹³Yab za: yab: jo; re nao myaung sho: qhug' nae". Mau" khao" wa,- aire zo: shaug' magan: mago"qo" li" nae".

¹⁴Zai vai yaug wa gau jho do; ga: khonhae" re: amyang: na: ra". Ngadqere: aimae" lo" yang: gau khonho" qo" khyo" yu: ga: phug: ta" lhau: ra".

¹⁵Nao pe" ta" na: ru nao ba: re wa qhang we' phug' de; ra" laug sin" daja: ja: tho' je: phug' ru qo" yu: ava".

¹⁶Byubang" dayaug: jhin kham: yaug wa nhag' magyang: yaug ngad: ra". Airu" yaug mae" wa yao: qo" ra" zai daja: ja: re pakham: khyo" yu: to: ca" ra".

¹⁷Madin: man" ra" khyo" qo" yu: ru wa zo: shaug' gai re" ru: zo" myho' na qere: mataung" myao" re ai: zo:ve wa danhad' geim" ma coe re" ru: boe" byaug: li" nae".

¹⁸Gai: ra" pha,jhi" byid: dao: re tae" gyo: wa- ailao" nao aung doe; lo nae". Nyang" maseim" cilo: gye dakhe'-

¹⁹Lau mho: ra" yaug wa zug' to" ra" dao: khonhae" re: maqo" nyham" to:- dao: saung" jhau mo, mae" va: va: na wa,

²⁰Ni" myhi" pho" tao re nao nhang" re ni" kao so' wa mug: cad' mae shid: byaug: ra" myi: re" ru: mung: li" nae".

²¹Jo,nho" re je: laui laui za: qo" yu: rumae ni" qhid' mae" akyu" je: nang: nae".

²²Shad' rure nao yao: lage, daphaug'- ASANG re lam ngha wa,- aire yao: wa jo: ra" khyo" boe" li" nhao nae".

²³Madangman" ra" jao we' jao laug: jham ci mo, re ASANG nghang" ra".

²⁴ASANG wa ngonhaung" khyodang re myid: phyid' to" ava". Aire yao: yao" khyo khoshad' khyo qang: ye" re khag' khoru: qo" ta" nae" i?

²⁵ASANG re xeim: ngaui" byid: nae" qhid' mae" mamyid: phyid' shire nyang" za: myid: qu" wa,- nao wa thao re naenhaung myid bo: li" nae".

²⁶Pha,jhi" bo: ra" kho:kham wa khag' shad' rure qhug' myao: mung: nhag' makhyag' lo: qobo dae byid' li" nae".

²⁷ASANG wa ngonhaung" re ba: ra" myid we' aung khug nhag' lam: byid' to: va". Amung: yao: yao" gaung re maqo" nyham: ngad: ra".

²⁸Kho:kham wa din:man" ru tarha" din: vang" ru we' tarha" din: nyang: ra" khyo" aeib: na na wa kheim: so' tang: jo; li" nae".

²⁹Ve, qae" qam: re ngonhaung" caung:khin" byid: mung:- mao: zo: au: phyu re phug' myao" ra".

³⁰Dalhang lhang ngonhaung" nho: khyo re tha" nae" qhid' mae" no: ru thaung" qhug' ca" ra".