Read Maru DAO: ZHAM" 3 Bible Online

DAO: ZHAM" 3 - Maru bible

DAO: ZHAM" 3

¹Nga" zo: we"- ngo mho" shid' ra" khyo re dato" myhid'. Nao re kad' nhao: ra" khyo re khonhae" re: myid: beim" na wa,

²Nga" mho" shid' dao: wa nao re kao so' qhang nhao mung: na: dai nhao: li" nae".

³Lam ga" kyid: ru we' xam: mag mung: ru we' dao: thang" mabaui mabyo, khyo khonhae" dalhaui" pye' co'. Ni" lang zang: mae ve; ci mung: ni" nhag' lam: khug mae tung" xam" to: wa,

⁴Nao airu cao" re Mao"So re:- byu re: nao re ngaui: li" genae".

⁵ASANG re ni" nhag' lam: alhab' yang lam khug: na wa, nao ba: ein: myid: ra" khyo mae khonhae" re: dangha daye, wa,.

⁶Nao kad' ye" ra" khyo alhab' mae ASANG re beim: so: wa, ailao" yao: wa ni" khyo re qhu" shid' byid' li" nae".

⁷Nao yao: pha,jhi" ba: ra" tho' je yang: pha,jhi" ba: ein: khonhae" re: damyid: yu wa,- ASANG re za: gyaug phug' mung: mashab makhyang" ra" khyo re dakad' wa,

⁸Airu: cao" ye" re mocid' re" ru: gai byid' li" nae". Ni" dae jham re gai nhao mung: ni" qug: khai: re yo: lo" nhao nae".

⁹Ni" myid gaung mae" thug' ra" qhovo: mae" gai: thao" ru Mao"So re byid: yang: yao: re phug' myao: nga: yhe' byid: wa,.

¹⁰Airu: kad' re ni" gaug jhi mae qhovo: byang" jo, mung: matho' qaung" to: losho' mung: ra" sabyi qang: qo" yu: li" nae".

¹¹Nga" zo: we"- Mao"So nao re mho" shid' re nyang" za: gyo" yu mung: ta" peim: byid' ra" dao: khyo" khae: yu wa,-

¹²myhi" pho" qe wa yao: bam ngaui: ra" zoshao qere mho" jhao: byid' ru we' dakhyo: ASANG wa yao: jhid'de; ra" mo, re mho" jhao: byid' na: ra".

¹³Pha,jhi" re the' yu mung: ba: gyo" ra" myid qo" yu: ra" yaug wa ngaui lho" ra" wo".

¹⁴Aiwa ngaui mae bo: ra" aphug' tho' mago" aimae bo: ra" qhang tho' mago" re: ni" qhid' mae" phug' de; ra".

¹⁵Aung khug: pha,jhi" wa phug' de; ra" laugsin" tho' je: phug' ra". Nao o: ra" ja: pe" ja: we' re: ai we' magai: tau".

¹⁶Aung khug: pha,jhi" wa nao re kao qhang: ru we' jo,nho" qo" nga: ye; ru byid' ra".

¹⁷Aung khug: pha,jhi" wa ni" byuna pyad re ngaui lho" nhao mung: gug: gam: na nhao: ra".

¹⁸Pha,jhi" bo mo, wa ngaui lho" ako". Aung khug: pha,jhi" wa yao: bam re kao so' byid' li" nae".

¹⁹ASANG wa myid gaung re yao" pha,jhi" yang phan" jaung: to" ra"- mug:gaung rere: yao" pha,jhi" laba lajhao: yang nyhang" to" ra".

²⁰Yao" pha,jhi" jham re: qid gyaung: jham re yug: lo" nhao: ra". Jham thaui: jham wa myid gaung re mug: qu byid' ra".

²¹Nga" zo: we"- ni" khug qag nyan: we' laba lajhao re tang za: zaui" zag: ci wa,- ni" lo, mae" khonhae" re: dalhag' ke'.

²²Ai shid' lam: wa nao re ngaui lho" ra" kao so' byid' li" genae".

²³Ni" gyaung: khyo mae nao yaug yo za: su: mung: khonhae" re: khyid au: mathaung: nae".

²⁴Yab qo vao lo" re magyaug ca" nae"- amung: myikhyeim nyang" za: qo" yab: yu nae".

²⁵Mashab makhyang: yaug jhao" phyad za: joe" li" ba: ra" qug: khai: byo; qeim ja: wa nao jhao" joe" li" nae" mangad:.

²⁶ASANG wa nao re lhaug' zaung" byid' li" nae"- nao re lha" mae gyo" myi" nhao nae" mangad:.

²⁷Bao" thaug' yu ca" mo, re khonhae" re: gai: boe" qhi" bao" yu wa,.

²⁸Ni" yham kyo: cao: re ana" qo" bao" ngad: re- ne, mo" ba joe" sho' lao" shi: ein: khonhae" re: data" ke'.

²⁹Ni" yham kyo: re qug: khai: qhug' nae" ja: dakad'- yao: wa nao re lam khug mung: ni" nhae mae na yaug ngad: ra".

³⁰Nao re dae mate' yaug we' pe" si: mabo: ru myan" dajho" myo: ge,.

³¹Lhad' zo: lhad' shaug' mo, re daqu" nhung- mangad: lao"- yao: bam kad' ruru: kad' nae" damyid.

³²Pe"mung:ga"re ASANG wa magai kad' mo, re nghang: mung:- din:man: mo, re kam" wa yao" lam ga" mo, toe' yu: li" nae".

³³ASANG wa makhyang: mo; yham re nhang: kheim: ke' mung:- din:man: mo; yham re shaman" byid' ra".

³⁴Ngad beim" ra" mo, re yao: nhaung thao" phaug' pye' mung:- nhag' lam: khyo" ra" mo, re- yao: o ngaui: ra" myid qhu" byid' ra".

³⁵Pha,jhi" bo mo, wa mang gai nga: qo" li" genae". Ngadqere: nhag' magyang: mo, wa- yao: bam: aqho' aqhid re za: laung" yu: li" genae".