Read Maru DAO: ZHAM" 30 Bible Online

DAO: ZHAM" 30 - Maru bible

DAO: ZHAM" 30

¹Cejham wa Yake nho: yauggai zo: Agu nho: phug' de; mungdao: jham ngad: ra". Mao"So wa ngo we' mana- Mao"So wa ngo we' mana- ngo yao: za: sho: jhin: na:-

²Ngo wa byu tho' mae" gug'nyhug' we' je: dau: ra". Byu dayaug mae bo ca" ra" laba lajhao ngo mae mabo.

³Pha,jhi" re khonhae" maqhug' mho" yu: qu" Mao"So: khyo rere: pe" maba-

⁴Mug:gaung mae" lo: ra" laba lajhao re khag' ba jhao: i? La re khag' yang yao" lo, mae qo" zhab' ci: i? Mangad: lao" pin: cug' dacug' mae qid re khag' qo" zeim: ci: i? Mangad: lao"- myid gaung mug: kyo: re khag' qo" kyae" to" i? Yao: khag' ngad: ra" i? Nao ba: re ta" qu" shi:- Yao: khag' ngad: i? Yao: zo: wa khag' ngad: i?

⁵Mao"So wa yao: ta" to" ra" dao:so: re cao" pyang" ra". Yao" yang gug: gam byid: nae" qho mo, re yao: wa go we' dakhyo: boe" byid' ra".

⁶Yao: khonhae" mata" ra" dao: re ta" ga: nao mho lao" nao re qeim mung:- nao mhug' hab' ngad: rure yao" yang de: de: myao: thug' li" nhao nae".

⁷Mao"So we"- nao re ngo mho' ra". Ngo mashid shire khyo shid' ja: qo" yu nhao la,

⁸Mhug' ta" ra" khyo ngore dacao" nhao- ngore gyai re: daqo" nhao- gyai re: damyaung nhao la,- aimung: ngo zo: ca" ra" nho" za: ngore byid: la,.

⁹Ngo mae ca" tho' jo,nho" qo" lao" nao re maca" lo: ga: ngo ta" li"nae". Mangad: lao" ngo myaung: na: re khug' zo: mung: nga" Mao"So re mang qeim nhao: li" nae".

¹⁰Okaung dayaug: gaui re yao" ASANG jhao" khonhae" re: dagaui: kyo:- yao: wa nao re nhang: mung: nao dae qhug' kham zo" li" nae".

¹¹Yao: pho" qere nhang: mung: yao: myhi" qere maba: phug' te' mo, byu damyo" na: ako".

¹²Lo" thao" sho' maca' majhad' boe" na ngadqere: yao: yao" gaung re gyai gyang" san: ga: myid: yu: to: mo, byu damyo" na: ako".

¹³Yao: yao" gaung re gyai gai: ga: myid: jho: yu mo, damyo" na: ako". Yao: bam: gaung re khoqhi" gai: ga: myid: jho: yu ko" laug?

¹⁴Byu damyo" wa myaung sho: mo, we' qo ca" qug: khai: mo; dao mae nhag' makhyag' lo: gau pai: phyid' zo" ako". Yao: bam wa airu: kad' mung: vae: dug: khau: na: ako".

¹⁵Vhe' nyug wa myiqe: zo: shid' yaug qo" ra". Yao: shid' zo" geim" nho: mang wa- Byid: la,- ga: mang: ako". Khonhae" re: nhag' maba: shid: ru byid ja: jo; ra".

¹⁶Aijham wa movo: mug:- zo: dau mamyhung: ra" myiqe:- mug: qid ca" ra" myid kyaug'- maqo" se' losho' nga" ra" myi: jham ngad: ako".

¹⁷Yao: pho" re qinug tu" pye' mung:- yao: myhi" mao" lo" re manug makhyad' kad' yaug khag' ngadqere: nangda jham: yang zo" pye' nae" man: qi" ra"- Mangad: lao" yao" myo,jid' re kano, jham: yang phaug' thad' pye' byid' ru qhug' nae" man: qi" ra".

¹⁸Ngo maba: tho' gyo: losho' mug: pho" ru byid ja: jo; ra".

¹⁹Aijham wa mug:gaung mae dao" lhang: qin" ra" zeim baung: dadau:- laung: mo" baui dao mae su" qin" ra" lhao maui dadau:- panglai: dao mae khyo qho: ye" lo" ra" qid sang pho dalam: we'- myiqe: we' yauggai shid' zo: jho" jhid'de; ru jham ngad: ra".

²⁰Dao:so: mazaung: ra" myhi" zang wa ceru: kad' ra". Lao shad' thao gaung yecid' pye' mung: ngo pe" mashad' va" re -ga: ta" ra".

²¹Myid gaung matho' zang" ra" khyo byid ja: jo; ra".

²²Kho:kham boe" li" ra" jeim pho"- yao: nug: ra" nho" qo" zo" ra" kopyad'-

²³Nghang: myid byang" ci mung: yham qo" lo" ra" myiqe:- yao: yao" ASANG myhi" jo, qo lhad' yu: pye' ra" okaung myhi"- ngad: ako".

²⁴Mug: myid dao mae gaung ngai qere: matho' ta" losho' pha,jhi" bo: ra" gug'nyhug' byid ja: na: ako".

²⁵Aijham wa yao: bam qam: nang: qere: zin gaung: qhid' mae" zo: shaug' ba: qaung" to" ra" phyoqug jham-

²⁶Qam: mabo qere: laug bam gyo: mae yham ba: kad' laung" ra" jalha: jham.

²⁷Kho:kham maqo" qere: vang" vang" ba: byaung" qin" ko" ra" khyag' phaung" jham.

²⁸Yao: re ni" lo, vo: mae za: re: qo" taung" ci ngadqere: kho:kham kho" jham mae nao qo" myao: ra" yham lhaug' jham ngad: ako".

²⁹Khyosu" re qu" yaung" sho' mung: ru byid ja: na: ako".

³⁰Aijham wa gug'nyhug' alhab' mae" qam: bo: thao" mung: khag' rere: magyaug: ra" khang khyi jham.

³¹Cad' be, jham- go" lhang" qin" ra" qo, pho" jham we'- mung" byu qe: agaung: mae su" qin" ra" kho:kham jham ngad: ako".

³²Nao wa nhag' magyang: mung: ngad beim" ru we' makhyang: mashab: mau" re kad' thug' nae" myid: yaung: na: re dazab thang mung: amyid: qu" shi: wa,.

³³Nung: nug' re lhau: re nug' xau pe' qo" yu: ra". Su: nho re yethaung" zao" re sa: yug: li" ra". Su nhag' yo: nae" khyo: lhau: zhung" re qug: khai: qhug' li" nae".