Read Maru DAO: ZHAM" 5 Bible Online

DAO: ZHAM" 5 - Maru bible

DAO: ZHAM" 5

¹Nga" zo: we"- nga" pha,jhi" dao: we' ba: qu" lag: phad' ra" nyan: re tae" gyo" yu wa,-

²aire nao wa khoru: nyang" za: na nae" ga" rure ba: yu: li" nae". Ni" dao: thoe re: nao pha,jhi" bo: ga" rure qhu" shid' byid' li" nae".

³Su gayaug: yham sang myhi" nho: nhad' qid wa byoyhid re" ru: cug mung: yao" bobaug baug: ru wa zhanlun xau qhi" jhad' ra".

⁴Ngadqere: lo" thao" mae yao: wa nao re nhag' no nhag' gyid' we' dae jham za: to: co' byid' li" nae".

⁵Yao: wa nao re movo: mug: khyo jhui" gyo" ye" li" nae"- yao: ye" ra" khyo wa shid: ru khyo joe" ra".

⁶Yao: wa kao so' khyo mae maye; jo, lo: mageim: du" dae" qin" mung: pe" boe" li" na: rure mabeim: ngad: ra".

⁷Nga" zo: qe we"- ngo ta" ru gyo: ge,- ngo ta" na: rure khonhae" dato" myhid' pye' ge,.

⁸Airu" ra" myiqe: mae" va: va: khyo na ge,- yao" yham kham: dung: nhae khyo lhao" date' ye:-

⁹nao ye: lao"- nao qo" yu: qu" ra" nga: ye, khyo re gayaug the' yu: pye' li" nae". Nao wa nhag' khyag' myid mabo: ra" mo; lo, khug mae no' mae" shid: li" nae".

¹⁰Ngad va"- taung bug qe wa ni" jo,nho" re yu: pye' byid: mung: nao khao" yang: qo" to" ra" zai jham re su gayaug: lo, khyo gae byid' pye' li" nae".

¹¹Nao wa shid: lo" zo" re" yab jaung: mae nokyang: kyang" na mung:- ni" gaung sho: sa: shogyi: jham jeim" lo" genae".

¹²Alao" nao wa Ngo pe"mung: malhaung" mho" zhao: yu va" laug i? Dayaug yaug: yang mho" shid' nae" ngo pe"mung: maqad va" laug i?

¹³Nga" mho" pho" qenho: dao: re ngo gyo" lhaui" pye' mung: yao: bam: mho dao: magyo: li" nhaung.

¹⁴Ana" dalhang: dae su alhab' myo,nho mae myo,nho jeim: mung: qho' phau: li" nhaung- ga: ta" li" nae".

¹⁵Ni" yham sang myhi" dao mae jhaug' zaug mung: yao: reza: jhid'de; nhag' lam: byid: wa,-

¹⁶myiqe: gatau qemae" qo" yu: ra" ni" zo: qe wa nao re pe" akyu" byid: genae" mangad:.

¹⁷Ni" zo: qe wa taung bug: qhid' mae" mangad:- nao re bao" thaug' byid: nae" qhid' mae" qi" qhang: li" ca" ako".

¹⁸Amung: ni" yham sang myhi" we' ngaui lho" za: na wa,- nao lo, xo' yu: ra" myiqe: mae" ngaui bau: khyo qho: yu wa,-

¹⁹yao: wa shocid we' dakhyo: yaung" mung: baug thug' na: ra"- yao" qu" yaung" taung" ra" lamyhung wa nao re ngaui bau: nhao vashao:. Yao" nho: jhid'de; nhag' lam" yang nao re lhang" kham" nhao wa,.

²⁰Nga" zo: we"- ni" jhid'nhag' re myiqe: gatau re pe"mung: byid' pye' nug: i? Gaje: yham sang myhi" yaung" rure pe"mung: taung" je: qu" ngaui: na: i?

²¹Yao: bam wa yao: bam yao" qobo lha" mae yao: yao: the' myi" ba: ra". Makhyang: mashab: yaug: qobo wa lha" ngad: ra".

²²ASANG wa nao kad' ru ja: khao: ngo" re myao: ra". Nao khai: ye: ye: yao: wa lhaug' qu" na: ra".

²³Yao: bam yao" gaung re malha" yang: yao: bam shid: ru qhug' ako". Yao: bam dae xo nhag' magyang" ra" mau" wa yao: bam re yao: bam yao" lab bug khyo dai" ke' li" nae".