Read Maru DAO: ZHAM" 6 Bible Online

DAO: ZHAM" 6 - Maru bible

DAO: ZHAM" 6

¹Nga" zo: we"- nao wa su gayaug: jhin re vin nae" qhid' mae" dao:so: byid: va" i?

²Nao yao" dao" yang myi" va" i? Nao yao" dao:so: mae laung" va" i?

³Ngad va"- airumung: re nga" zo: we"- nao wa aiyaug: qam: so' khug mae joe" jo; ava". Ngadqere: aimae" loe; thug' lo nae" khyo wa ceru: ngad: lhe". Yao: jhao" phyad ye: mung: nao re lhoe' ke' byid: nae" qhid' mae" mho' wa,-

⁴naoyao" gaung re dayab nhao- lhau" no" yu nae" lhao" re: dathang.

⁵Lha" mae" loe; phao: lo" ra" ngho' re" ru:- mangad: lhao" shokung" yaug: lo, mae" phao: loe; lo" ra" shocid re" ru: phao: thug' lo" wa,

⁶Byunoe" qe wa phyoqug jham kad' ra" khyo mae" mho" yu ca" ra".

⁷Yao: bam mae au: she yaug zug: we' kho:kham maqo" ngadqere:-

⁸xaung: gaung mae zo: nae" zo:ve re zin vao kheim: gyo: mae" ba: qaung" to" ako".

⁹Byunoe" wa khomyhao" joe" sho' yab qo mae lang" jo; li" nae" laug i? Khonhae" she, yab; so" to" li" nae" laug i?

¹⁰Yao: wa ngo dazab lhau" yab: yu shinae"- lo, pyid' thag' pye' mung: lhau" no" yu shinae"- ga: ta" na: ra".

¹¹Ngadqere: yao: airu: yab: jo; ra" au: re myaung sho" ru wa shae lhae ci: ra" damya, cang tau:: re" ru: yao: re khe' lhad' lo: li" nae".

¹²Pe" akyu" mabo: ra" byujad:- makhyang" ra" mo,- mhug' pyag' mo,- wa mhug' dao: ta" hau: mung: lae" qin" ako".

¹³Yao: bam wa nao re mhug' pyag' yu nae" qhid mae" myo, nyag mung: ave, tu" qhu" ako".

¹⁴Yao: bam: makhyang" ra" nhag' lam: mae mashab mangung" ru kad' thug' ke' nae" za: yaung: na mung: khyi" khao: ngo" qug: khai: reza: lhau: thug' na: ako".

¹⁵Ce: mathao mae byo; qeim: ru wa yao: bam jhao" no' mae" mata" peim: lo: joe" zao" lo mung: yao: bam wa shid sho' dae de; li" genae".

¹⁶ASANG nghang: mung: yao: matho' zang" ra" khyo nhad' ja: wa- Ngad beim" ra" myo,khung:- ngad beim" ra" sho- qobo maqo" mo, re se' pye' ra" lo,- Makhyang: mashab: ru kad' nae" seim" ra" nhag' lam:- makhyang" ru kad' nae" qhid' mae" ye" lo" ra" khyid- daja: bin daja: mhug' ta" ra" sagse: we'- byin cao: yao: cao: majho" nge, naekhyo" lhau: phyo' yaug ngad: ako".

²⁰Nga" zo: we"- ni" pho" ta" kyo" ra" dao: re cao" kad' wa,- ni" myhi" mho" byid' ra" khyo rere: khonhae" dato" myhid'.

²¹Yao: tao: nho: dao: thoe re khonhae" re: xam" to: mung:- aung khug nhag' lam: mae xam" ci wa,

²²Yao: tao: nho: mho" shid' dao: wa nao gyaung: su" lo" re khyo shid' byid' li"nae". Myi" re nao re lhaug' zaung" byid: mung:- na" re wa nao re pha,jhi" byid' li" nae".

²³Yao: tao: nho: mho" shid' khyo wa bo" bao ngad: ra"- Kao so' khoru: daui: na nae" khyo re qo" mho" shid' byid' li" nae".

²⁴Aiwa magai: ra" myiqe: qemae" nao re va: va: khyo qo" jao" pye' nhao mung:- su gaje qe: yham sang myhi" qeyang kung" lham" yu: ra" dao: mae" re: nao re gug: gam byid' li" nae".

²⁵Yao: bam: qu" yaung" lamyhung re daqu" ngaui. Yao: bam: langa: kad' ra" myo,jid' yang khae: ra" lha" mae damyi" nhao.

²⁶Yauggai dayaug wa mug dakhai" phug' byid: yang:- shava myhi" dayaug re gai: ngho" yu: ra". Ngadqere: su: myi: lhad' yaug wa yao: qo" ra" jo,nho" alhab' khyug' pye' ca" li" nae".

²⁷Ni" mai bau: manga" losho' myi: re qao gao mae qo" kai" ci nae" i?

²⁸Ni" khyid maphad' khyad' losho' myi:gyoe: laung dao mae qo" su: nae" i?

²⁹Su gaje: yham sang myhi" we' yab yaug re: ai we' dakhyo: gyaug ci" ca" ra". Airu: kad' yaug khag' ngadqere: dae kham zo" li" nae".

³⁰Vae: moe; yang: khug' zo" ra" khug' hab' re qobo khag' maqho nug ngad: ra".

³¹Ngadqere: yao: re qhug' taung: lao" wa yao: nhad' zhao" dam: khyug' byid: ca". Yao: qo" gu: alhab' byid' pye' ca" nae".

³²Ngadqere: su: myi: shad' yaug wa nhag' gyang" mabo yaug ngad: ra". Yao: yao" gaung re phyo' qheim" pye' na: ra".

³³Yao: wa qho' phyo' qhug' mung: ceim" be; ru qhug' zo" li" nae". Yao: wa ayo, byang" sho' myo,nho sham: li" nae".

³⁴Yham sang pho" dayaug wa yham sang myhi" mathao mae nhung: ra" myid bo: au: tho' nhag' yo" ru khonhae" majo,- yao: lage, phaug' ra" dae wa athao" majo, ngad: ra".

³⁵Khonho" yang yug: khyug' yang: re: yao: khyo" yang lham: khae: yu byid: nae" mangad:- yao: nhag' jam: yo" ru wa jhaung qhu" khonho" yang re: nhag' qo" shid nhao nae" mangad:.