Read Maru DAO: ZHAM" 7 Bible Online

DAO: ZHAM" 7 - Maru bible

DAO: ZHAM" 7

¹Nga" zo: we"- ngo ta" ru xam" ci wa,- nao re cao" nhao: ra" khyo khonhae" re: dato" myhid'.

²Ngo ta" ra" khyo cao" ye" re nao kao so' daui: na: ru qhug' nae". Ni" myo,jid' jham re gug: gam byid' ruru:- nga" mho" shid' dao: re lha" yang: cao" ye: wa,.

³Nga" mho" shid' dao: jham re khonhae" re: phug' cao" wa,- ni" nhag' lam: khug mae tung" xam" to: wa,

⁴Pha,jhi" re ni" nhae: mo" re we' dakhyo: zam" khug: na wa,.

⁵Aijham wa nao re nhad' yaung" yang: ju" phyo' lham" yu: na: ra" myiqe:- su gaje: yham sang myhi" qemae" kung" lham" ra" dao: jhau: ra" myiqe: qemae" loe; beim nhao: li" nae".

⁶Dalhang: mae" ngo wa nga" yham bao: zo: kham: khyo" qu" ke' re-

⁷aja: ja: maqhug' qu" shi" ra" zolau: dapau: re myao:- ai bam: phaung mae je yang: nhag' magyang" ra" zolau: dayaug re qu" xam" ke'.

⁸Yao: wa myiqe: dayaug na: ra" khyokao: shad' khyo hau" mo" khyo" su" ye" lo" ra". Yao: wa mug: sham" sham" cad' lo" re ai: myiqe: myhi" yham nhae khyo" lai: ye" lo" ra".

¹⁰Ailao" ai: myiqe: myhi" wa yao: re lham: qhug' ra". Ai: myiqe: wa shava myhi" re" ru: shaung: ve; ci mung:- lo, mau" khyo" pha,jhi" khyug' na: ra".

¹¹Yao: wa qho' ga" ru majo, myo, qao" mung: hau" mo" khaung: khonhae" re: lhaung" su" qin" yaug ngad: ra".

¹²Dalhang lhang khyokao: khaung:- dalhang lhang hau" mo" khyogaung: mae- dalhang lhang gai vang" mae lhaung" na: qin" ra".

¹³Yao: wa ai: zolau: re lang zang: mae" lham: ge; vo; yu mung: bobaug baug byid' ra".

¹⁴Ana" ba shi" xeim: ngaui" byid' yang: yham mae ai: xeim: ngaui" mae" sho: yu: to".

¹⁵Amung: thug' li" mung: nao re qhug' sho' ein: qho: na: re ana" qhug' va".

¹⁶Nga" yab qo rere: Egutu mae" jid: mo" mai myhung: tung" yang myhung" to: va".

¹⁷Ai: yab qo mai myhung: rere: nae pyo" ra" mura: xau nae pyo" ra" bin: xau aja: ja: gyad; to: va".

¹⁸Li" lo ri:- myi khyeim jho" ngaui: keim" lang:- nyhao: shid' yaug yao: cao: jho" po yang: pyo: pyo: zam" na lang:-

¹⁹nga" yham sang pho" wa yham mae mana- va: khyo gyaung: su" lo" byaug va".

²⁰Yao: wa ngaui myo: sho' vin: ye" lo" ra". Amung: shid' laban gyo: mae laui za: malo nae" ga: yao" myo,jid' re zhaug' qu" yang: ta" ra".

²¹Amung: yao: wa ai: zolau: pho" re yao" qu" yaung" lamyhung: yang lham" yu: pye' ra". Ai: zolau: re: myiqe: myhi" nho: nhad' yaung" mae myi" ava".

²²Ailao" jao" yao: wa se' nae" khyo ye" lo" ra" nung: lo: we' dakhyo: ai: myiqe: myhi" jhao" cao" ye" lo" ra". Lha" khug khyo jhu" byae: vao lo" ra" shocid we' dakhyo:-

²³sang: kheim: mae myokhe' yang thug' kyao" pye' ru qhug' nae". Yao: wa geim khug khyo vao ye" lo" ra" ngho' we' dakhyo: ngad mung:- yao: kao so' jeim: nae" ru maba ngad: ra".

²⁴Ana" nga" zo: qe we"- ngo mho" ru gyo: ge,- ngo ta" ra" dao: re nyang" za: gyo" yu ge,.

²⁵Airu" nho: myiqe" yang naonhaung" nhag' lam: re daaung: pye' nhao ge,- yao: jhao" dalae" ye: ge,.

²⁶Yao: wa yauggai myo: sho' mo; nho: byo; qeim khyo boe" lai: lo mung:- yao" yang jhui" se' pye' va" mo, matho' nghe' lo:-

²⁷yao" yham khyo ye" lo" re nao wa movo: mug: khyo ye" lo" ru ngad: ra". Aiwa shid nae" ra" khyo ye" ra" khyojhao" ngad: ra".