Read Maru PHA,JHI" DAO: 10 Bible Online

PHA,JHI" DAO: 10 - Maru bible

PHA,JHI" DAO: 10

¹Yao khaung: shid jham wa nae pyo: xau dasoe: geim" re bab sheim qo" nae nhao: pye' ra". Nhag' magyang: kopyad' mau" zo" dajhid' za" ruyang gyai qi" qhang: ra" pha,jhi" re qo" phyo' yhan" pye' ra".

²Pha,jhi" bo yaug jo: ru kad' nae" we' nhag' magyang: yaug shad' ru kad' nae" wa jo, gyae: tarha" ngad: ra".

³Yao" nho: nhag' magyang kopyad' boe" ru wa yao: we' khyo mae qhug' ra" taung bug: byubang" qeyang lao" de: de: ba: qu" myao byid' ako". Yao: kopyad' ngad: ru yaug khao: ngo" re ba nhao: ra".

⁴Ni" mung" zug nao re nhag' yo" re- ni" mau" mae" thug' nae" mugsug' dabyid:- nao sae za: tae" jo; re wa- gyai dae xo: ra" yug: xao su: mau" lao" re qobo khyad' byid' ru qhug' nae".

⁵Ngo wa ce: mug: myid mae matarha" ra" khyo dalam: re the' myao va". Airu wa zug: qeyang boe" nhao ra" matarha" ra" khyo ngad: ra".

⁶Jo,nho" qo" mo, qu" lhaui" pye' qhug' ko" au:- nhag' magyang: mo, wa kheim: so' aya: byid' to: qhug' ako".

⁷Phug' de, nga: lho" mo, jeim qe we' dakhyo: khyid khyo" su" na au:- jeim qe wa myao: dao mae zaung: rure ngo the' myao va".

⁸Nao dung khung: dau" ngad re aimae nao gyo" vao: ra". Nao vang re thad' pye' re lhao maui: yang nao re thoe" li" nae".

⁹Laug zang kho' mau" mae nao mau" zaui" re laug baui: yang nao re dae de' li" nae". Nao thao: baug: re ai yang dae te' li" nae".

¹⁰Ni" vozaung: ngam" byaug mung: aire nao masaui" tho' re- aire ci yang: mau" zaui: nae" nao qam: je: ke' ca" nae". Majoe" shimae" gau: qhid' khae" yang: seim" ci: ru wa myo, jao bo: ra" khyo ngad: ra".

¹¹Lhao maui: yang shi" nao re thoe: nhao: yang: ngad: re- lhao maui re khoru: vha" nhao zo: nae" ba: to" ru pe" akyu" mabo-

¹²Pha,jhi" bo yaug ta" ru wa yao: re nga: yhe' byid' ra". Ngadqere: nhag' magyang: kopyad' wa yao" dao: thoe yang phyo' qheim" pye' ru qhug' ra".

¹³Yao: wa mangad mangung" dao: jhe' jhau: qhid mung: lo" thao" mae ago mau" cin cin mae jhau: thao" ra".

¹⁴Kopyad wa mathang mano: xo' jhau: ra". Thao phyao pe" xo' boe" nae" rure khag' maba- ngonhaung" shid: byaug thao pe" boe" lo nae" rure: ngonhaung" re khag' yang maqo" ta" shid'-

¹⁵Yao: yao" yham phao khyo maba: qho losho' nhag' magyang: yaug za:- yao" gaung yao: mau" khao" myaung" gyi" shid: ra".

¹⁶Ai: mung"dan: nho: kho:kham wa zolau: ngad mung: yao" zug: ade, qe wa myi khyeim khyeim zo: shaug poe kad' na: re mung"dan wa qug: khai: qhug' ra"

¹⁷Ngadqere: mung"dan dalam mae" kho:kham wa yao: yao: myid: phyid' ba mung:- zug: ade, qe wa yao" ayo, we' ayo, mae zo: shaug' yao: bam yao" gaung re khang" mung: ai mung"dan: wa zhau: vha: bo: ra".

¹⁸Byu dayaug wa yao: yao" yham mhao: mug: manug: pho losho' gyai noe" yang: ngad: re mug: yug yug mung: yham gyoe; gyo" lo" li" nae".

¹⁹Zo: shaug' poe poe: ru wa nao re pyo: nhao mung: sabyi qang: wa nao re pyo: nhao: ra". Ngadqere: ngaui maqo" re ai: shid' ja" geim" nao maqo" yu ngad: ra".

²⁰Kho:kham re nug: khyo: gaui damho- sae za: lhao" re: gaui damho- jo,nho" qo" yaug rere: gaui damho'- ni" yab qe, mae anyham: avho' mae lao" re: gaui damho- lau dao: re- ngho' dadau: yang qo" cilo" mung: nao pe" ta" rure yao: bam re gai: lo" ta" ra" i?