Read Maru PHA,JHI" DAO: 11 Bible Online

PHA,JHI" DAO: 11 - Maru bible

PHA,JHI" DAO: 11

¹Ni" ngaui re taung bug: mang mae" phaga: mau" mae bun ke' to: wa,- aire ce gu: mae" daba: ba nao gau pai: the' zo: nae".

²Ni" bun ngaui re jo, qo myo: sho' khyi" ke' to: wa,- pe"mung:ga"re- ce: mug: myid dao mae nao khoru" magai: ra" zhau: vha: khyo" the' phau: zo: nae" ga" rure nao khonhae" maqo" ba: to:-

³Sag' gae dagae wa khoshad' khyo gyang: gyo" gyo"- yao: gyang: lang" lo" ra" mae jo; jo; li" nae". Jham thaui: byang" jo; lao" re: mug: qu: li" nae".

⁴Nao wa la we' yo,gin mug: ve,- ba ve, ayo, gai mung: yo" yo" boe" lo nae" lao" na: re- khonhae" re: pe" qo" qho: nae" mangad:- aimung: pe" daja: re: qo" yad: yu nae" mangad:-

⁵Mao"So wa- ja: khao: ngo" re phan" phaug' to" ra". Aimung: nao wa gaung la" ra" myiqe: dayaug: nho: vae: dug: khug mae kao so' khoru: boe" qhid: li" ru maba: ru we' dakhyo: Mao"So yao: kad' rure nao maba: gyo: nae".

⁶Ne, seim we' myi" thao mae re: qhovo: qhoshi: sin: wa,- aijham wa alhab' yaug: gai: li" nae" laug i? mangad: lao" dagae wa gatau tho' je: yaug: gai: li" nae" laug ga" rure nao khonhae" re maba.

⁷Na" ayo, mae" yaug yo: ra" bo" bao mae pyo: pyo: qo" na: ru wa gai: ra".

⁸Nao daui: na: ra" zin na khao: ngo" mathao mae jeju beim: so: wa,- nao khomyhao" myao" na myao" na- ai: tho' je: myao" sho' nao shid: jo, nae" ein: rure myid: beim: wa,- Qhid' khyo myid: lao" nae" pe" daja: re: majo,

⁹Ve, qae" qe we"- naonhaung" ve, qae" yo, re pyo: pyo: na ge,- naonhaung" apyad ngai shi" au: re ngaui bau" na ge,- nao kad' nug: rure kad' mung:- ni" nhag' lam: myid: o kao bau ra" khyo re cao" wa,- ngadqere: Mao"So wa nao kad' ru ja: khao: ngo" re dao: kho' li" nae" rure myid: beim: wa,-

¹⁰Nao yao" gaung re pe" yang re myid damyo: nhao no re: dano nhao- Nao wa gyai myao" sho' apyad ngai: na nae" mangad:-