Read Maru PHA,JHI" DAO: 12 Bible Online

PHA,JHI" DAO: 12 - Maru bible

PHA,JHI" DAO: 12

¹Nao ngai shi" ayo, mae ai: nhag' lam: thao" ra" ba na jham- kao so' gyaung: khyo mae ngo mapyo: ga: ta" nae" zin na jham majoe" shi: re- ni" phan" ASANG re myid: beim: wa,-

²Daba na mae- ni" qhid' mae" ba kyi lho" mo" jham: nho: abao sham: lo" mung: mug: qid bo: ra" jham thaui: wa Khonhae" re: malai: lo" ra" ayo, joe" li" nae".

³Ai: ayo, mae- nao yao" gaung re lhaung" gug: gam byid' lai: lo: ra" ni" lo, jham nin" mung: ana" qam: bo: ra" ni" khyid jham qam: nang" lo" li" nae". Ni" zaui jham malaug: byaug mange: byaug mung: ni" zo:ve re maqo" vo: lo nae"- ni" nho: myo, jid' jham re: thab: lo" na mung: qang: qang: mamyao: lo: genae".

⁴Ni" nokhye' jham wa hau" mo" mae" thoe jham re mathe' gyo: lo: genae". Nao wa laug lhang: gyag: myhang" thoe we' nghaui"caung: ji: peim thoe re dajhid' jhid' za: qo" the' gyo: nae". Ngadqere: ngho' myang thoe: yang lao" re: yab so: li" nae".

⁵Nao wa myhao: ra" jo, qo jham re gyaug mung: khyo su" rure gyaug ci" ja: boe" li" nae". Ni" xae phyu: byaug mung: nao yao" gaung re lao" sokhyeim khyeim qo" yoe" du" qin" li" nae". Aimung: nao myid o: kao bau: ra" ja: alhab' baui" byaug nae". Ngonhaung" wa ngonhaung" nho: lo" thao" dugno: jo, qo khyo ye" lo" na:- Ailao" hau" mo" khyo jham mae kaug' ngug: ru jo; li" nae".

⁶Ngaui jao co: wa byid: lo" li" nae". Aimung: qhang myikaug' wa gyang: lang: mung: go; lo" li" nae" qid thaung: mae" taui: wa byid: byaug nae" ai: mung: qid kang: wa go; sin" lo" byaug nae".

⁷Ngonhaung" gaung khyao jham wa myid gaung: phalhug khyo dam: tug' lo" nae". Kaoso' wa ngonhaung" re kao so' byid yaug ngad: ra" Mao"So jhao" dam: tug' lo" li" nae".

⁸Myid: qu" pha,jhi" bo yaug wa- ai wa akeim- akeim- ga: ta" ra". Alhab' wa akeim za: ngad: ra".

⁹Ngadqere:- myid: qu" ba yaug wa pha,jhi" bo: rumung:- su re yao: ba: ci: ru xo' yang: mho" byid' ra". Yao: wa dao: zham" jham re mho" zhao: yu mung:- dangman" ru wa aijham jo: rure qhu" byid' ako".

¹⁰Myid: qu" ba yaug wa- yao yao" gaung re nhag' tang" byid:nae" khyo qam: ke' qho: ra". Ngadqere: yao: tung" to" ra" dao: kheim: jham din:man" ra".

¹¹Pha,jhi" bo mo, nho: mho" shid' dao: jham wa yao jham re khyo shid' nae" qhid' mae" yao zam: yaug ci: ra" zaung: bao" vosae: ceim: jham we' dau: ako". Aimung: khyui: zhang: to" ra" pha,jhi" dao: zham" jham wa tang sho' be; zhaug' to" ra" jo, to' tin" zi: jham we' dau: ako". Aijham wa ngonhaung" alhab' mo, nho: yao zam: yaug ngad: ra" ASANG Mao"So: yang byid' to" ru ngad: ra".

¹²Nga" yauggai zo: we"- ai tho' mae lha" nae" khyo gatau dalam: jo; ashi"- Mugsug' paug' jham tung" ru wa thao" ga" ru majo,- aimung: xo sho' mho" zhao: yu: rure nao re myaung: nhao: li" nae".

¹³Cegu: alhab' thao mae- ta" nae" daja: za: ajo, lo"- Mao"So re gyaug phug' mung: yao" amyin" dao: jham re phug' cao" na wa,- pe"mung:ga"re- ai: qhid' mae" yao: byu re phan" to" ru ngad:-

¹⁴Mao"So wa ngonhaung" kad' ru ja: khao: ngo" re gai: ru ngad ngad magai: ru ngad ngad- anyham: avho' khug' kad' ra" mau" jham re lhao" re dao: kho' li" nae".