Read Maru PHA,JHI" DAO: 2 Bible Online

PHA,JHI" DAO: 2 - Maru bible

PHA,JHI" DAO: 2

¹Ngo wa ngoyao" gaung re pyo: sho' na: yu mung: myid pyo" ga" ru pe" ngad: ru qho: yu nae" ein: myid: phyid' to". Ngadqere: ceru re: akeim ngad rure ngo the' myao: yu:-

²Qi: ru wa nhag' magyang" ko: pyad' mau" za: ngad: rure the' myao: yu va". Pyo: ja: re pe" akyu" maboe" byid' ru the' myao:-

³Ngo wa- Pha,jhi" re the' yu nae" kao bau: ru we' sabyi qang: shaug' mung: ngo yao" gaung re pyo: sho' na: qu" nae" ein: myid: phyid' va". Ceru wa- myid gaung: dao mae lang" ra" yao: bam: apyad re byu qe na: ye: nae" qhid' mae" gai: thao" khyo ngad na va" ein: ngo the' myid: jho va".

⁴Ngo wa qi" qhang: ra" mau" zo" re kad' boe" to: va". Ngo yao" qhid' mae" yham jham zhaug' mung: sabyi khyae jham qho" to: va".

⁵Ngo wa bin: khyae jham we' shi: khyae jham mae shi: gae aja: ja: byang" sho' qho" yhaug' to: va".

⁶Ngo wa aijham re qid byid: nae" qhid' mae" qid tham: jham dau: va".

⁷Ngo wa- jeim myo: sho' yaug re vai mung: nga" yham khaung mae jeim nau" jham khau: li" ako". Yerusalem mae na: lai: lo mo, alhab' tho' ngo wa gug'nyhug' kyaung" je: myo: sho' qo" sang va".

⁸Ngo wa- ngo eib: ra" mug: myid: jham mae" kho:kham ngaui ban" jham mae" ngaui: we' qhang re abam azao qaung" to: va". Yauggai myiqe: qe wa ngore shangaui shapyo: mung: ngo wa yauggai dayaug myid o: ra" nho" myiqe: alhab' re qo" sang: yu: ra".

⁹Ngad va"- ngo wa qi" qhang va"- Yerusalem mae na: lai: lo: ra" mo, gayaug alhab' tho' ngo je: qi" qhang va". Amung: nga" pha,jhi" re ngo mae" khonhae" mayeim: lo".

¹⁰Ngo o: ru alhab' ngo qo" va". Ngo wa pyo: ja: daja: re maha: pye'. Ngo zaui" lo: ra" mau" zo" ja: khao: ngo" nho: mathao mae ngo ngad beim: na:- aimung: cegu: alhab' wa nga" nho: aphug' jhaung qhu" ngad:-

¹¹Ailao" ngo wa- ngo kad' lai: lo: ru alhab' khyo we' aire khoqhi" qam: phin: yang: mau" khao" lo: rure myid: qu" re- aijham wa pe" mangad: rure ngo myid: beim" li" va". Aiwa la re cao" khe' ru we' dau: ra". Pe" dajhid' re: akyu" mabo ngad: ra".

¹²Lo" thao" mae wa- kho:kham dayaug: wa qhid' phyao: mae" kho:kham jham kad' lai: lo va" rure za: aqo" kad' ra". Aimung: ngo wa pha,jhi" bo: ru we' nhag' magyang" ra" khyo pe" ngad: ru ba: yu nae" myid: qu" qhid va".

¹³O"- ngo ba va". Mug: bo" wa mug: cad' tho' je: gai: ru we' dakhyo: pha,jhi" wa nhag' magyang" ru tho' je: gai: ra".

¹⁴Pha,jhi" bo mo, wa yao: bam khai: khyo ye" lo" na: rure ba: ako". Nhag' magyang" mo, wa maba ngad: ako". Ngadqere: alhab' mo, qhid' mae" daja: za" au: pa lo, kyo' wa ngonhaung" alhab' re- lao" na: rure ngo ba: ra".

¹⁵Ngoyao" gaung re ngoyao: myid: qu" re nhag' magyang: mo, phau: zo" ra" au: pa re yao: ngo phau: zo" li" nae". Aire ngo ai nho" daja: re: pha,jhi" bo: ru pe" akyu" qo" yu: i? Pe" maqo" yu ein: ngo tau" ra".

¹⁶Pha,jhi" bo mo, rere: khag' mamyid: beim:- nhag' magyang: mo, rere: khag' mamyid: beim: joe" lo nae" ra" ayo, mae wa ngonhaung" alhab' mo, re ceim" to" myhid' pye' li" genae". Pha,jhi" bo mo, nhag' magyang: mo, we' ngonhaung" alhab' mo, dakhyo:- za: shid: lo" ca" ra".

¹⁷Aimung: byu: kao so' apyad wa nga" qhid' mae" pe" lajheim: mabo- pe"mung:ga"re ai pyad mae" ja: khao: ngo" wa ngore qug: khai: mae" lai yang: pe" daja: re: ma cili" byid: ngad: ra". Alhab' wa akeim yao: ngad: ra". Ngo wa la re alhaung" cao" khe' na nhaung.

¹⁸Ngo mau" khao" mung: qo" yu: to" ru pe" daja: re: nga" qhid' mae" lajheim: mabo- pe"mung:ga"re ai: gu: re nga" khu mae xo' zaung yaug: lo, khyo to: byid: co' ca" nae" ngad: rure ngo ba: ra".

¹⁹Aimung: yao: wa pha,jhi" bo: re bo nae" nhag' magyang" re magyang: nae"- khag' ba: i? Ngadqere: yao: wa- ngo mau" khao" ra" akyu" ja: khao: ngo" re- nga" pha,jhi" yang qo" qho: to" ru ja: khao: ngo" sang: yu: li" nae".

²⁰Aimung: ngo aqhi" anho" qam: phin: mung: mau" khao" pye' rure amyid: avho: myid: mung: va".

²¹Nao wa ni" pha,jhi" alhab'- laba lajhao alhab' jhao: ru alhab' yang mau" zaui: mung: qo" qho: to" ru alhab' re- ai: qhid' mae" pe" makad' pe" mau" makhao" to: yaug: qhid' mae" to: co' ca". Aiwa akeim ngad: ra"- ai wa majo lhe".

²²Nao wa mau" khao" mung:- pyad thao" sho' sang: kho" na:- ai: qhid' mae" qhu" byid: nae" pe" qo" i?

²³Nao adaui: na na mae nao kad' ru ja: khao: ngo" wa sang: kho: sang: lhe' we' nhag' lam: no: ru zai: boe" nhao: ra". Myi" mug: cad' yo mae lao" re: ni" nhag' lam: wa maqo" dugno: ngad: ra". Aigu: alhab' wa akeim ngad: ra".

²⁴Byu dayaug: qhid' mae" gai: thao" ru wa yao: yao: qo" zaui" yu: to: rure zo: yang: shaug' yang: ngaui bau: taung" na: ru ngad: ra". Ngadqere: ceru lao" re: Mao"So mae" li" rure ngo myid: beim" ra".

²⁵Aimae" lai yang gatau khokhyo" nao yao" gaung naoyao: pyo: sho' qo" zo: qo" na nae" i?

²⁶Mao"So wa yao: re ngaui nhao mo, re pha,jhi" laba lajhao we' ngaui bau: khyo byid: ra". Ngadqere: qobo jab qere wa mau" khao" nhao- qo" nhao qaung: nhao mung:- yao: bam the' qho: yu ru yao: re nhag' dag nhao mo; qhid' mae" byid' pye' nae". Alhab' wa akeim ngad: ra". Aiwa la re cao" khe' ru we' dau: ra".