Read Maru PHA,JHI" DAO: 3 Bible Online

PHA,JHI" DAO: 3 - Maru bible

PHA,JHI" DAO: 3

¹Ce: mug: myid: dao mae boe" ru ja: khao: ngo" wa Mao"So khyin: to" ra" ayo, mae boe" ako".

²Yao: wa khau: ra" ayo, we' shid: ra" ayo, re so" to" ra". Qho" ra" ayo, we' lao" phan" pye' nae" ayo,-

³Se' pye' nae" ayo, we' no gai byid: nae" ayo, phyo' khyo" pye' nae" ayo, we' zao: to: nae" ayo, so" to: byid' ra".

⁴Yao: wa- kaug' qhui nae" ayo, we' ngaui bau: nae"ayo, kaug' ngug nae" ayo, we' go" nhan" nae" ayo, re so" to: byid' ra".

⁵Gaung sho: zam" nae" ayo, we' gaung sho: majho" zam" nae" ayo,- bobaug baug nae" ayo, we' bobaug mabaug nae" ayo, re so" to: byid' ra".

⁶Yao: wa- qho: myao nae" ayo, we' byaug: lo" ra" ayo,- zam" to: nae" ayo, we' shalhaui" pye' ra" ayo, re so" to: byid' ra".

⁷Lao" cad' pye' ra" ayo, we' khyab' pho: ra" ayo,- sae za: na: ra" ayo, we' dao: jhau: ra" ayo,-

⁸Yao: wa- jhid'de; ra" ayo, we' nghang: ra" ayo, gyekhe' ra" ayo, we' mang dae: ra" ayo, re so" to: byid' ra".

⁹Ngonhaung" zaui" ra" mau" alhab' mae" pe" the' yu: i?

¹⁰Mao"So: yang ngonhaung" nho: dao mae kai: byid' ra" qola: re ngo ba:-

¹¹Yao: wa ja: khao: ngo" qhid' mae" jo: ra" ayo, re so" to: va"- yao: wa ngonhaung" re joe" lo nae" ayo, re ba nug: ra" nhag' lam: ke' byid: va". Ngadqere:- yao: kad' rure jab byang" sho' ba mung: nhag' dag nae" akhang" ngonhaung" re khonhae" re mabyid: to:.

¹²Aimung: ngonhaung" khyo" qo" boe" thao" kad nae" khyo wa ngonhaung" daui: na shi: au:- ngaui bau: taung" na mung: gai: boe" thao" kad' nae" za: ngad: rure ngo myid: beim: va".

¹³Ngonhaung" alhab' wa ngonhaung" zaui" thug' ra" ja: re zo: shaug' mung: ngaui pyo" na nae" ang: ra". Aiwa Mao"So: jhaung qhu" ngad: ra".

¹⁴Mao"So kad' ru ja: khao: ngo" apyad ato mae gang" tang: jo, nae" rure ngo ba: ra". Nao: yang aimae daja: re maqo" laung" ke'- aimae" daja: re: maqo" yu: pye'- aimung: Mao"So kad' ru daja: wa- ngonhaung" yang yao: re gyaug phug' nae" ru ngad: ra".

¹⁵Boe" ru we' gai: boe" lo: ru pe" ngadqere: qhid' phyao: bin: boe" lai: lo va" ru ngad: ra". Mao"So wa daja: za" rure dam: boe" nhao nhao mung: kad' na: ra".

¹⁶Ai: thao' mago"- ce: mug: myid dao mae tarha" din: nyang: ru we' jo: ru qhug' myao nae" jo, qo mae makhyang: mashab: rure the' myao: ru ngo qu" xam" ci:-

¹⁷Ngo wa- ngoyao" gaung re ceru: ein: ta" ra"- Mao"So wa din:man: yaug we' makhyang: mashab: ra" mo, re dakhyo: za: dao: kho' li" nae". Pe"mung:ga"re ja: khao ngo"- lo, mau" khao: ngo" wa yao: yao" qhid' mae" so" to" ra" ayo, mae boe" li" genae".

¹⁸Ngonhaung" wa gug'nyhug' jham tho' pe" maje: gai ga" ru qhu" byid: nae" qhid' mae" Mao"So: yang ngonhaung" re jham" qu" va" rure- ngo myid phyid' to: va".

¹⁹Lo" thao" mae- xao su byu we' gug'nyhug' qe: qhid' mae" au: pa lo, kyo' dakhyo: za: lao" na: ra". Xao su byu qere:- gug'nyhug' we' dakhyo: za: shid: lo" ra"- yao: bam wa daja: za" gug'nyhug' ngad: ako". Xao su byu dayaug wa gug'nyhug' dadau: tho' pe" maje: gai ngad: ra". Pe"mung:ga"re byu we' gug'nyhug' khoyaug: qhid' mae" re: kao so' wa pe" lajheim: mathug' ngad: ra".

²⁰Shid' ja" geim" dajo, qo za: ngad: ra" phalhug bam khyo ye" lo" na: ako". Shid' ja" geim" ai: phalhug mae" li" mung:- shid' ja" geim" ai: phalhug khyo dam: lo" ako".

²¹Byu dayaug nho: byo wa tho' khyo do, lo" ru mado, lo" ru we' gug'nyhug' dadau" nho: byo wa myid gaung khyo gyo" lo" ru magyo" lo" rure khag' khoru: tho' ba nae" i?

²²Aimung: ngo wa- ngonhaung" mau" zaui" ra" mathao mae qo" yu rure pyo: pyo: qo" ci yhung: mung: na: ru wa gai: thao" mau" zo" ngad: rure the' myid: beim"- aimae" je yang ngonhaung" gatau pe" maqo" kad' ngad: ra". Ngonhaung" shid: byaug thao re pe" boe" li" nae" rure ngonhaung" qo" ba nae" khyo majo, ngad: ra".